ޕްރޮސިކިއުޓަރ ޖެނެރަލްގެ މަޤާމަށް ޢައްޔަނުކުރުމަށް ރައްޔިތުންގެ މަޖިލީހުން ރުހުން ދިން ހުސައިން ޝަމީމަކީ އެމަޤާމަށް އެންމެ ކަމުވޮށިގެންވާ ބޭފުޅާ ކަމަށް ކުރީގެ ރައީސް އަދި މޯލްޑިވްސް ރިފޯމް މޫވްމަންޓުގެ އިންތިޤާލީ ރައީސް، މައުމޫން ޢަބްދުލް ޤައްޔޫމް ވިދާޅުވެއްޖެއެވެ.

ޕްރޮސިކިއުޓަރ ޖެނެރަލްގެ މަޤާމަށް ބޭފުޅު ޢައްޔަނުކުރުމަށް ރައްޔިތުންގެ މަޖިލީހުގައި ހޮނިހިރު ދުވަހު ބޭއްވި ޖަލްސާގައި، ޝަމީމު މަޤާމަށް ޢައްޔަނުކުރުމަށް ރައްޔިތުންގެ މަޖިލީހުގެ 74 މެމްބަރުން ވޯޓުދެއްވާފައިވާއިރު، މަޤާމަށް ޝަމީމު ހޮވިވަޑައިގަތުމުން، މަރުޙަބާ ދަންނަވައި ކުރީގެ ރައީސް މައުމޫން ކޮށްފައިވާ ޓުވީޓެއްގައި ވިދާޅުވީ، ޝަރުޢީ ދާއިރާ އިޞްލާޙުކުރުމަށް ސަރުކާރުން ބޮޑު އަހައްމިއްޔަތުކަމެއްދީގެން އެމަސައްކަތް ކުރަމުންދާ ނާޒުކު ދަނޑިވަޅުގައި އެ މަޤާމަށް ހޮނިހިރު ދުވަހު ޢައްޔަނުކުރުމަށް ރުހުންދީފައިވަނީ މަޤާމަށް އެންމެ ޤާބިލު އަދި ކަމުވޮށިގެންވާ ބޭފުޅާކަމަށެވެ.

ކުރީގެ ރައީސް މައުމޫން 1 ފެބްރުއަރީގެ ޙުކުމާއި ގުޅިގެން ކުރީގެ ރައީސް ޔާމީނުގެ ސަރުކާރުގައި ޖަލަށް ލާން ޙުކުމް ކުރިއިރު ރައީސް މައުމޫންގެ ވަކީލެއްގެ ގޮތުގައި ހުންނެވި ބޭފުޅަކީވެސް ޝަމީމެވެ. އަދި މާފުށީ ޖަލުގައި ރައީސް މައުމޫނާއި ޝަމީމް ބައްދަލުކުރެއްވި އިރު ޢަރަބި ބަހުން މުޚާޠަބު ކުރެއްވުމާއި ގުޅިގެން ވަކީލުން ޖަލު ޙުކުމްގައި ތިއްބަވާ ބޭފުޅުންނާއި ބައްދަލުކުރައްވާއިރު މުޢާމަލާތް ކުރެވޭނީ ހަމައެކަނި ދިވެހި ބަހުންކަމަށްވެސް އެއިރުގެ ސަރުކާރުން ވަނީ ނިންމާފައެވެ.

ޕީޖީގެ މަޤާމަށް ބޭފުޅަކު ޢައްޔަން ކުރެއްވުމަށްޓަކައި ރައީސް އޮފީހުން ކުރެއްވި އިޢުލާނާ ގުޅިގެން، ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު، ރައްޔިތުންގެ މަޖިލީހުގެ ރުހުން އޮތްތޯ ބެއްލެވުމަށް ފޮނުއްވީ ނަންފުޅަކީ ޝަމީމުގެ ނަންފުޅެވެ.

ޝަމީމުގެ އިތުރުންވެސް އެމަޤާމަށް ކުރިމަތި ލެއްވި ބޭފުޅުންގެ ނަންފުޅުތައް ރައީސް ޞާލިހު މަޖިލީހަށް ފޮނުއްވާފައިވާއިރު ޕީޖީގެ މަޤާމަށް ޢައްޔަން ކުރެއްވުމަށް ރައީސް ޞޯލިހު އިސްކަން ދެއްވާފައިވަނީ ޝަމީމަށްކަންވެސް ފާހަގަކޮށްލެވެއެވެ. މަޖިލީހުގެ ޖުޑީޝަރީ ކޮމެޓީން އިންޓަވިއު ކުރައްވާފައިވަނީ ވެސް ޝަމީމާ އެކަންޏެވެ.

ޝަމީމަކީ ޖިނާއީ ޢަދުލުގެ ނިޒާމުގެ ތެރޭގައި މަސައްކަތްކުރައްވާ އަދި މިހާރު ޢަމަލުކުރަމުންދާ އައު ޤާނޫނުއަސާސީގެ ދަށުން ޕީޖީގެ މަޤާމާއި އޮފީހެއް ކަނޑައެޅިގެން ދިޔައިރު، ޕީޖީގެ މަޤާމަށް އޭރު ޢައްޔަން ކުރެއްވި އަޙްމަދު މުޢިއްޒާއެކު މަސައްކަތްކުރެއްވި އެ އޮފީހުގެ ދެވަނަ މުވައްޒަފެވެ. ޕީޖީގެ މަޤާމުން މުޢިއްޒު އިސްތިޢުފާ ދެއްވުމާއި ގުޅިގެން، ޝަމީމު ވަނީ ޕީޖީގެ މަޤާމުގެ ޒިންމާ ދުވަސްތަކެއް ވަންދެން ފުރުއްވާފައެވެ. އޭރު ޝަމީމަކީ ޑެޕިއުޓީ ޕީޖީ އެވެ. މީގެއިތުރުން ޝަމީމަކީ، މިހާރު ޢަމަލުކުރަމުންދާ ޤާނޫނުލްއުޤޫބާތަށް އެންމެ ފަރިތަ އެއް ޤާނޫނީ ވަކީލެވެ. އޭނާ ވަނީ ޤާނޫނުލްއުޤޫބާތަށް ކަމާބެހޭ ފަރާތްތައް އަހުލުވެރިކުރުމަށް ގިނަ ޕްރޮގުރާމުތަކެއް ހިންގަވާފަ އެވެ.

ޕްރޮސިކިއުޓަރ ޖެނެރަލްގެ މަޤާމުގައި ހުންނެވި އައިޝަތު ބިޝާމް މަޤާމުން އިސްތިޢުފާ ދެއްވާފައިވަނީ މިދިޔަ ނޮވެމްބަރު މަހުގެ 28 ވަނަ ދުވަހު އެވެ. ޝަމީމުގެ އިތުރުން ޕީޖީ ކަމަށް ދެން ކުރިމަތިލެއްވީ ކުރީގެ ޑެޕިއުޓީ ޕީޖީންގެ ގޮތުގައި މަސައްކަތް ކުރެއްވި މަރިޔަމް ނިހާޔަތާއި، ޤާނޫނީ ވަކީލު އަޙްމަދު ޒަނީނެވެ.