ޖުޑީޝަލް ސަރވިސް ކޮމިޝަން(ޖޭއެސްސީ) އިން މިވަގުތު ވަކިވުމަކީ ލިބޭނެ އެންމެ ބޮޑު "ބޮނޑި" ގެ ގޮތުގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ސިފަކުރައްވައިފި އެވެ.
ހޮނިހިރު ދުވަހުގެ ޖަލްސާގައި ސުޕްރީމް ކޯޓުގެ ފަނޑިޔާރު ކަމުގެ މަޤާމަށް އަލްއުސްތާޒު ޙުސްނުއްސުޢޫދު ޢައްޔަނުކުރުމާއި ގުޅޭގޮތުން ރައީސުލްޖުމްހޫރިއްޔާ ފޮނުއްވާފައިވާ މައްސަލަ ޖުޑީޝަރީން ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސްކުރައްވަމުން މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފު ވިދާޅުވީ ޖުޑީޝަރީ އިޞްލާޙުކުުރުމަށް މިވަގުތަށް ކުރެވޭނެ އެންމެ ރަނގަޅު ކަންތަކަކީ ޖޭއެސްސީން ރައްޔިތުންގެ މަޖިލީހުގެ ރައީސް، ރައީސް ނަޝީދު ދުރަށް ވަޑައިގަތުން ކަމަށެވެ. ސަބަބެެއްކަމަށް އާދަމް ޝަރީފު ވިދާޅުވީ ރައީސް ނަޝީދަކީ ސިޔާސީ ބޭފުޅަކަށްވާތީ ކަމަށާއި، މިދެބައި އެއްކޮށްގެން މަސައްކަތް ކުރުމަކީ ރަނގަޅު ކަމެއްކަމަށް ދެކެވަޑައިނުގަންނާތީ ކަމަށެވެ.
ރައްޔިތުންގެ ކަންބޮޑުވުމެއް ޖޭއެސްސީގެ ކޮމްޕޮޒިޝަން ގެ މައްސަލައަކީ. އަޅުގަނޑަށް ޤަބޫލުކުރެވޭ ގޮތުން ވަރުގަދަ ސުޕަރމެޖޯރިޓީ އެއް ލިބިގެން މަސައްކަތް ކުރަމުންދާއިރު، ޖޭއެސްސީއަށް ނުފޫޒު ފޯރުވާ މައްސަލައިގެ ކަންބޮޑުވުން އޮވޭ. ޝަރުޢީ ނިޒާމު ރަނގަޅު ކުރަން ކުރަންޖެހޭ އެންމެ މުހިންމު ކަމަކީ ޖޭއެސްސީގެ ކޮމްޕޮޒިޝަން ބަދަލުކުރުން. އެތަނުން ރައްޔިތުންގެ މަޖިލީހުގެ ރައީސް ދުރަށް ވަޑައިގަތުމަކީ ރާއްޖޭގެ ޝަރުޢީ ނިޒާމު އިޞްލާޙުކުރުމަށް ކުރެވޭނެ އެންމެ ރަނގަޅު ކަންތައް. އެއީ އެމަނިކުފާނަކީ ސިޔާސީ ބޭފުޅަކަށްވެފައި ސިޔާސީ މަސައްކަތްކުރަން މިއަށްވުރެ ރަނގަޅު މަސައްކަތްކުރުމުގެ ފުރުޞަތުތައް މުސްތަޤުބަލުގައި އޮންނާނެތީ. މިދެބައި އެއްކޮށްގެން މަސައްކަތްކުރުން ރަނގަޅުކަމަށް އަޅުގަނޑަށް ނުފެންނާތީ.މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް
އާދަމް ޝަރީފުގެ މިވާހަކައަށް ރައްދުދެއްވަމުން ރައީސް ނަޝީދު ވަނީ އެމަޤާމުގައި ހުންނަވައިގެން ރައްޔިތުން ބޭނުންވާ ގޮތަށް ޖުޑީޝަރީ އިޞްލާޙުކުރުމުގެ ކަންކަން ކުރައްވާނެ ކަމަށް ވިދާޅުވެފަ އެވެ.
އަޅުގަނޑު ޖޭއެސްސީގައި މިވަގުތު މިއިން މަގާމުން ވަކިވުމަކީ މިވަގުތަށް ލިބޭނެ އެންމެ ބޮޑު "ބޮނޑި". އަޅުގަނޑު އެތާ އިނދެގެން އިރާދަކުރެއްވިއްޔާ ދިވެހި ރައްޔިތުން ތި އެދިވަޑައިގަންނަވާ ގޮތަށް މިކަން ކޮށް ނިންމާދޭނަމޭ...ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ސުޕްރީމް ކޯޓަށް އަލްއުސްތާޛު ހުސްނުއްސުޢޫދު ޢައްޔަނުކުރުމާމެދު އާދަމް ޝަރީފު ވިދާޅުވީ ހުސްނުއްސުޢޫދަކީ ސިޔާސީ ބޭފުޅެއްކަމަށާއި އެހެންކަމުން ސުޕްރީމް ކޯޓުގެ ފަނޑިޔާރު ކަމަށް އެފަދަ ބޭފުޅަކު ޢައްޔަނުކުރާތީ އެކަމާއި ކަންބޮޑުވެ ވަޑައިގަންނަވާކަމަށެވެ. ސިޔާސީ މަޤާމަކަށް ހުސްނުއްސުއޫދު ރަނގަޅުކަމަށާއި، ނަމަވެސް ސުޕްރީމް ކޯޓުގެ ފަނޑިޔާރަކަމަށް ޢައްޔަނުކުރުމަށް ފެނިވަޑައިނުގަންނަވާކަމަށް އާދަމް ޝަރީފު ވިދާޅުވި އެވެ.
މީގެއިތުރުން އާދަމް ޝަރީފް ވިދާޅުވީ ރައީސް ނަޝީދު ފިޔަވައި ދެން ރާއްޖޭގައި ހުރި ސިޔާސީ އެންމެ ވަރުގަދަ ބޭފުޅެކީ ހުސްނުއްސުޢޫދު ކަމަށެވެ.
މުހައްމަދު ނަޝީދު ވަރުގެ ސިޔާސީ ބޭފުޅެއް މިފަހުގެ ތާރީޚުގައި ހިއެއް ނުވޭ އުފެދުނު ހެނެއް. ހަމައެވަރުގެ ބޭފުޅެއް ހުސްނުއްސުޢޫދަކީ. އެހެންވީމާ އެވަރުގެ ބޭފުޅެއް ސުޕްރީމް ކޯޓުގެ ފަނޑިޔާރަކަށް ޢައްޔަނުކުރާތީ ކަންބޮޑުވޭ. ސުވާލަކީ ހަމަ އެވަރުގެ ބޭފުޅެއް ނުފެނުނީ ބާއޭ ނުވަތަ ރަނގަޅު އިޚޫލާސްތެރި ކަމެއްނެތީބާއޭ ސަރުކާރުގައި މިކަން ކުރަން.މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް
އާދަމް ޝަރީފް ވިދާޅުވީ ސުޕްރީމް ކޯޓުގެ ފަނޑިޔާރުކަން ކުރަންވާނީ ސިޔާސީ ކަންކަމުގައި ޙަރަކާތްތެރި ނުވާ ބޭފުޅެއް ކަމަށެވެ.
