އިދިކޮޅު ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ފުލުސް އޮފީހަށް ހާޒިރުކޮށް ބަޔާން ނަގައިފިއެވެ.
އޭނާ ފުލުސް އޮފީހަށް ހާޒިރުކޮށް ބަޔާން ނަގާފައިވަނީ ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ)އިން ހުށަހެޅި މައްސަލައަކާ ގުޅިގެންނެވެ. އެ މައްސަލައިގައި ހޮނިހިރު ދުވަހުގެރޭ 8:00 ގައި ފުލުސް އޮފީހަށް ހާޒިރުކުރި އިރު، ބަޔާން ނެގުމަށްފަހު ފުލުހުން ވަނީ އޭނާ ފޮނުވާލައިފައެވެ.
އޭނާގެ މައްސަލަ ޑީޖޭއޭއިން ފުލުހަށް ހުށަހެޅީ ކޯޓުގެ ހުރުމަށް ކެނޑުމުގެ މައްސަލައެއްގެ ގޮތުގައެވެ. އެގޮތުން ފުލުހުން ބަލަމުން ދަނީ ޔާމީނުގެ މައްސަލަ ބެއްލެވި ފަނޑުޔާރުންގެ ބެންޗުގައި ހިމެނޭ ކްރިމިނަލް ކޯޓުގެ ފަސް ގާޒީން ޖަލަށް ލާނެކަމަށް ވިދާޅުވި މައްސަލައެވެ.
ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމެއްގައި އަދުރޭ ވަނީ އޭނާ ފަނޑިޔާރުންނަށް އިންޒާރު ނުދެއްވާ ކަމަށް ވިދާޅުވެފައެވެ.
