ދިވެހި ފިލްމު އިންޑަސްޓްރީއަށް މުޅިން އާ ފިލްމު ކުންފުންޏެއް ކަމަށްވާ "މައި މޯލްޑިވްސް ޕްރޮޑަކްޝަން" ގެ ފުރަތަމަ ފިލްމު "މާސްޓަރމައިންޑް" ލޯންޗުކޮށް ފިލްމުގެ ކާސްޓުންނާއެކު ސޮއިކޮށްފިއެވެ.

އެ ފިލްމަކީ އިންޑިއާގެ ޑައިރެކްޓަރަކު ދިވެހި ފިލްމީ ތަރިން ހިމަނައިގެން ގެނެސްދޭ ފުރަތަމަ ފީޗަރ ފިލްމެވެ. "މާސްޓަރމައިންޑް"ގެ ތަރިން ފިލްމަށް ސޮއިކުރީ ސަލްސާ ރޯޔަލް ރެސްޓޯރެންޓުގައި ބުދަ ދުވަހުގެ ހަވީރު ބޭއްވި ހަފުލާއެއްގައެވެ.

އެ ހަފުލާގައި ވާހަކަދައްކަމުން ފިލްމުގެ ތަރިއެއް ކަމަށްވާ އަމަން އަލީ (ޓޮމް) ބުނީ، ފިލްމުގައި ފެނިގެންދާ ހުރިހާ އެކްޓަރުންގެ އެކްޓިންވެސް އެ ފިލްމުގައި ބޮޑުވެފައި ފުރިހަމަވާނެ ކަމަށެވެ.

އެ ފިލްމަކީ ލޯބީގެ ބައިވެސް ހިމަނައިގެން ހަދާ ސަސްޕެންސް ފިލްމެކެވެ.

"މާސްޓަރމައިންޑް"ގައި ފެނިގެންދާނީ ދިވެހި ފިލްމު އިންޑަސްޓްރީގެ ފުންނާބު އުސް ތަރިންނެވެ. އޭގެ ތެރޭގައި ޝަމީލް، ލަހުފާ، ޔޫއްޕެ، ރިޝްފާ، ޝީލާ، މަނިކު، ޝަހުޒާ، ދޮން އައްޔަ އަދި އަމަން ފަދަ ތަރިން ފެންނާނެއެވެ. އޭގެ އިތުރުން ކުރިން ދިވެހި ފިލްމުތަކުން ފެނުނު މަރިޔަމް ރަޝީދާ ވެސް ފިލްމުގެ މުހިއްމު ރޯލަކުން ފެންނާނެއެވެ.

ފިލްމުގެ ސްކްރިޕްޓް ތައްޔާރު ކުރި މުހުތާރު ޔޫސުފް ބުނީ، އެ ފިލްމަކީ އޭނާގެ އަންހެނުން ބޭނަޒިރުގެ ވަރަށް ބޮޑު ހުވަފެނެއް ކަމަށާއި ދެމީހުން ވާހަކައެއް ތައްޔާރުކޮށް ފިލްމެއްގެ ސިފައިގައި ބެލުންތެރިންނަށް ގެނެސްދޭން މަސައްކަތްކުރާ ކަމަށެވެ. ފިލްމާއި މެދު ފިލްމުގެ ޓީމުން ކުރާ އުންމީދު ބޮޑުކަން ފާހަގަކޮށްލެވެއެވެ.

ފިލްމާއި ދޭތެރޭ ތަރިންގެ އުންމީދުވެސް ބޮޑުވެފައިވާއިރު ހުރިހާ ތަރިންވެސް ތިބީ ބޭރުގެ ޑައިރެކްޓަރެއްގެ ޑައިރެކްޝަނެއް ދަށުން މަސައްކަތް ފަށަން ކެތްމަދުވެފައެވެ. ފިލްމުގެ ޝޫޓިން އަށް ބުދަ ދުވަހުގެ ރޭ ފިލްމުގެ ބައެއް ތަރިންނާއި ޓީމުން އައްޑޫ ސިޓީއަށް ފުރުމަށް ވަނީ ހަމަޖެހިފައެވެ. މުޅި ފިލްމު ޝޫޓް ކުރުމަށް ހަމަޖެހިފައިވަނީ އައްޑޫ ސިޓީގައެވެ.

"މާސްޓަރމައިންޑް" ގެ ހުރިހާ މަސައްކަތެއް ނިމި ބެލުންތެރިންނަށް ގެނެސްދޭނެ ނިންމާފައިވަނީ އަންނަ އަހަރުގެ ފެބްރުއަރީ މަހުގެ 14 ވަނަ ދުވަހުއެވެ.