ފަހަކަށް އައިސް ސަރުކާރުގެ މިނިސްޓަރުންގެ ތެރޭގައި އެންމެ ފާހަގަކޮށްލެވޭ އަދި އެންމެ ޖެހިލުންކުޑަ މިނިސްޓަރަކީ ޓްރާންސްޕޯޓް މިނިސްޓަރު އައިޝަތު ނަހުލާއެވެ. ނަހުލާއަކީ ވަރަށް ތަފާތު ޕަރސަނަލިޓީއެއް ގެންގުޅެއްވާ ބޭފުޅެކެވެ. ނަމަވެސް ބޮޑާކަމެއް ކިނބުރުވެރިކަމެއް އެކަމަނާގެ ފަރާތަކުން ނުފެނެއެވެ.

"ރާއްޖެ ޓީވީ" ގެ ފަށާއިރު ޕްރޮގްރާމުގައި މެހެމާނެއްގެގޮތަށް ވަޑައިގެން ޓްރާންސްޕޯޓް މިނިސްޓަރ އައިޝަތު ނަހުލާވަނީ ވަރަށް ޒާތީ އަދި ތަފާތު ވާހަކަތަކެއް ޙިއްސާ ކުރައްވާފައެވެ. އެކަމަނާގެ މީގެ މީޑިއާއަށް ތިލަ ނުކުރައް ބައެއް ޝައުގުވެރި ވާހަކަ އަންގާރަ ދުވަހުގެ ޕްރޮގްރާމުގައި ވަނީ ހިއްސާ ކުރައްވާފައެވެ.

މިނިސްޓަރ ނަހުލާގެ ވާހަކަތަކުން އެންމެ ސަމާލުކަން ދަމައިގަނެވުނީ ޒަވާޖީ ޙަޔާތުގެ ވާހަކައެވެ. އެގޮތުން އެކަމަނާގެ ފިރިކަލުން އަދި މާމިގިލިދާއިރާގެ މަޖިލިސް މެންބަރު ޤާސިމް އިބްރާހިމާ ބައްދަލުވެވަޑައިގެންނެވި ވާހަކައިން ފެށިގެން ދެބޭފުޅުންގެ ޒަވާޖީ ޙަޔާތުގެ ޞަފުޙާތާކުގެ ތެރެއިން ބައެއް ޞަފުޙާތައް ނިއުޅުވާލެއްވިއެވެ.

މިނިސްޓަރ ވިދާޅުވީ ޤާސިމާ ބައްދަލުވެވަޑައިގަތީ، ޤާސިމުގެ ކުރީގެ އޮފީސް ހުންނަ އެވިލާއިން ކަމަށާއި، އެދުވަހު އެތަނަށް ވަޑައިގެންނެވީ ދޮންބައްޕައާއެކު ކަމަށެވެ. އަދި އެއީ ޤާސިމާ ބައްދަލުވެވަޑައިގެންނެވި ދުވަސް ކަމަށާއި، ކައިވެންޏަށް އެއްސެވީ ޤާސިމް ކަމަށެވެ،

މިނިސްޓަރ ވިދާޅުވީ ޤާސިމް އޭނާއާ ތަފާތު ނަންނަމުން މުޚާތަބު ކުރައްވާ ކަމަށެވެ. އެގޮތުން ބައެއް ފަހަރު "ދޫނި" އަދި ބައެއް ފަހަރު "ކަނބާ އައިސާ" ގެ ނަމުން މުޚާޠަބު ކުރައްވާ ކަމަށެވެ.

ކެއުން ބެއްލެވުމުގައި ވެސް މިނިސްޓަރ ނަހުލާއަކީ ސީދާ ދިވެހި ވަންތަ ދަރިއެކޭ ބުނުމަކުން ދޮގަކަށް ނުވާނެއެވެ. މިނިސްޓަރ ވިދާޅުވީ އޭނާއަކީ ކުޑައިރުއްސުރެ ކާއެއްޗެހީގެ ތެރޭގައި ދިވެހި އެއްޗެހި ރަނގަޅު ބޭފުޅެއް ކަމަށެވެ. އަދި ޚާއްޞަކޮށް ރިހާކުރާއި ގަރުދިޔަ ވަރަށް މީރު ކަމަށާއި، އެ ބީޓްކޮށްލެވޭނެ އެހެން ކާ އެއްޗެއް ނުހުންނާނެ ކަމަށެވެ.

މިނިސްޓަރ ނަހުލާ ޒީނަތްތެރިވުމާއި ގުޅޭގޮތުން ވެސް މީގެ ކުރިން ނުދައްކަވާ ބައެއް ވާހަކަތައް ޙިއްސާ ކޮށްލެއްވިއެވެ. ފެޝަންގެ ގޮތުން އެންމެ އުހުގައި ފިޔަޖަހަމުންދާކަމަށް ގިނަ ބަޔަކު ޤަބޫލުކުރާ އައިޝަތު ނަހުލާ ވިދާޅުވީ ހެދުން އެޅުމުގައި އަދި ޒީނަތްތެރިވުމުގައި ވަކި ޝަހުޞިއްޔަތެއް ކޮޕީ ނުކުރައްވާ ކަމަށެވެ. އަދި ސަބަބަކީ އެކަމަށް ވަގުތު ވެސް ނުވަނީ ކަމަށާއި، ނަމަވެސް ވަގުތު ވާނަމަ ބައްލަވާ ލައްވާނެ ކަމަށެވެ.

އޭނާ ވިދާޅުވީ އަބަދުވެސް އަމިއްލައަށް ވިސްނައިގެން އަމިއްލައަށް ފަސޭހަގޮތެއް، އަމިއްލައަށް ރީތިވާނެ ގޮތެއް އިހްތިޔާރު ކުރައްވާ ކަމަށެވެ. އަދި ވަރަށް އަމިއްލަ ގޮތް އަމިއްލަ ކަންތައްތަކުގައި ގެންގުޅުއްވާކަމަށް ވިދާޅުވިއެވެ.

މިނިސްޓަރ ނަހުލާ ވަނީ މީރުވަސް ދުވާއެއްޗެއްސަށް އަބަދުވެސް ލޯބިކުރައްވާ ކަމަށް ވިދާޅުވެފައެވެ. އެގޮތުން ސެންޓް އެއީ ވަރަށް މުހިންމު އެއްޗެއް ކަން ފާހަގަކުރައްވާ މިނިސްޓަރ ވިދާޅުވީ އަބަދުވެސް މީރުވަހަށް ލޯބިކުރައްވާ ކަމަށެވެ.

ބިޒީކޮށް މަސައްކަތް ކުރައްވަމުންވެސް އާއިލާއަށް ވަގުތު ދެއްވާކަމަށް މިނިސްޓަރ ނަހުލާ ވިދާޅުވިއެވެ. އެގޮތުން ކުދިންނާއެކު ގިނަ ވަގުތު ހޭދަކުރައްވަން މަސައްކަތް ކުރައްވާ ކަމަށާއި، ސޯޝަލް މީޑިއާއިން ނުފެނުނު ނަމަވެސް، ކުދިންނާއެކު ވަގުތު ހޭދަކުރާ އިރު، ކުދިންނާއެކު ވަރަށް ފޮޓޯ ނަންގަވާ ކަމަށެވެ. އެގޮތުން ޑްރެސްއަޕް ކޮށްފައި، އެއްކުލައިން ހެދުން އަޅައިގެން ކުދިންނާއެކު ފޮޓޯ ނަންގަވާކަމަށް މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ އުފަންދުވަސް ވެސް ފާހަގަކުރައްވާ ކަމަށެވެ. ނަމަވެސް އުފަންދުވަހަށް ވަކި އެއްޗެއް ބޭނުންވާކަމަށް ބުނުން ނުވަތަ ދޭނެ އެއްޗެއްގެ ވާހަކަ އައްސަވައިފިނަމަ، އެއީ ޖަވާބުދޭން އެންމެ އުނދަގޫ ސުވާލުކަމަށް މިނިސްޓަރ ވިދާޅުވިއެވެ.

މިނިސްޓަރަކީ 6 ކުދިންގެ މަންމައެކެވެ. ނަމަވެސް މިނިސްޓަރުގެ ލޫޅާފަތިކަމުން އެކަން ގަބޫލުކުރާ މީހުން ވަރަށް މަދެވެ. މިނިސްޓަރ ވިދާޅުވީ ރީތިކޮށް ހުންނަވަން އަބަދުވެސް މަސައްކަތް ކުރައްވާ ކަމަށާއި، ފެށުނީއްސުރެ ކަސްރަތު ކުރައްވާ ކަސްރަތުކުރަން ލޯބި ކުރައްވާ ކަމަށެވެ. ނަމަވެސް ރިޔާސީ ކެމްޕޭންގެ ތެރެއިން އެކަމާ އަލްވަދާޢުކީ ނަމަވެސް، މިދިޔަމަހުން ފެށިގެން ކޮންމެވެސް ވަރަކަށް ކަސްރަތު ކުރަން ފަށާފައިވާ ކަމަށާއި، ކެއުމުގެ ކަންތައްތަކަކީ އަބަދުވެސް ކަންބޮޑުވާ ކަމެއް ކަމަށެވެ.

ޤާސިމާއި ކައިވެނި ބައްލަވައިގެން ހުންނެވި ނަމަވެސް، މިނިސްޓަރ ނަހުލާ އާންމުންގެ ތެރެއަށް މަޝަހޫރުވެގެން ދިޔައީ މިދިޔަ އަހަރު އޮތް ރިޔާސީ ކެމްޕޭނަށް ނުކުންނެވި ހިސާބުންނެވެ. އަދި އެކަމަނާއަކީ މިހާރުގެ ސަރުކާރުގެ ކެބިނެޓްގައި ހުންނެވި އެންމެ ޖެހިލުންކުޑަ އަދި ކަންކަން ނިންމެވުމުގައި ފަސްޖެހިވަޑައިނުގަންނަވާ ބޭފުޅެއް ކަމަށް ގިނަ ބަޔަކު ބުނެއެވެ.