މޯލްޑިވްސް މީޑިއާ ކައުންސިލް (އެމްއެމްސީ)އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އެއްކޮށްލުމަށްފަހު، މީޑިއާ ކޮމިޝަނެއް އުފެއްދުމަށް ރައްޔިތުންގެ މަޖިލީހުން ފަށައިފި އެވެ.
އެމްއެމްސީއާއި ބްރޯޑްކޮމް އެއްކޮށްލުމަށްފަހު، މީޑިއާ ކޮމިޝަނެއް އުފެއްދުމަށް ރައްޔިތުންގެ މަޖިލީހަށް ހުށަހެޅާފައިވާ މީޑިއާ ކޮމިޝަންގެ ބިލާ ގުޅިގެން މަޖިލީހުގެ މިނިވަން މުއައްސަސާތަކާބެހޭ ކޮމެޓީން މަސައްކަތް ފަށާފައިވާއިރު، އާދިއްތަ ދުވަހުގެ ރޭ ވަނީ އެކޮމިޓީން އެ ބިލް ދިރާސާ ކުރުމަށް ހޮއްވަވާފައިވާ ކުޑަކޮމެޓީގެ ބައްދަލުވުމެއް ބާއްވާފަ އެވެ.
އެ ކޮމެޓީން އާއްދިއްތަ ދުވަހުގެ ރޭ ބޭއްވި ބައްދަލުވުމުގައި މީޑިއާ ކައުންސިލްގެ މެމްބަރުންނާއި ބޮރޯޑް ކޮމްގައި މިހާރު ތިއްބެވި މެމްބަރުންނާ ވަނީ ބައްދަލުކުރައްވާ މަޝްވަރާ ކުރައްވާފަ އެވެ.
މީޑިއާ ކައުންސިލާއި ބްރޯޑްކޮމްގެ މެމްބަރުންގެ މައިގަނޑު ވިސްނުން ހުރި، އެދެ މުއައްސަސާ އެއްކޮލުމަށްފަހު، މީޑިއާ ކޮމިޝަނެއް އުފެއްދި ނަމަވެސް އެކޮމިޝަނަކީ މިނިވަން މުސްތަޤިއްލު ކޮމިޝަނެއްގެ ގޮތުގައި ބޭއްވުމަށެވެ. އަދި ރައްޔިތުންގެ މަޖިލީހަށް ޖަވާބުދާރީ ކުރެވޭ ކޮމިޝަނެއްގެ ގޮތުގައި ހެދުމަށެވެ.
މީޑިއާ ކައުންސިލްގެ މައިގަނޑު ވިސްނުންހުރީ، މީޑިއާ ކައުންސިލްގެ ޤާނޫނު އަސްލަކަށް ބަލައި، އަދި ބްރޯޑްކާސްޓިން ދާއިރާގެ ކަންކަން ބްރޯޑްކޮމްގެ ގާނޫނުގައިވާ ކަންކަން ހިމަނައިގެން، އެކޮމިޝަނުގައި ނުވަ މެމްބަރުން ހިމެނުމަށެވެ. ނަމަވެސް ބްރޯޑްކޮމްގެ މެމްބަރުންގެ ވިސްނުންހުރީ އެކޮމިޝަންގެ މެމްބަރުންގެ އަދަދު ކަމަށްވާ ހަތް މެމްބަރުން އަދަދު ހަމަ އެގޮތުގައި ބޭއްވުން ރަނގަޅު ކަމަށެވެ.
މީޑިއާ ކައުންސިލުން ވަކާލާތު ކޮށްފައިވަނީ އެ ކައުންސިލް އުފެދިފައިވާ ގޮތަށް މީޑިއާގެ ތެރެއިން ވަކިވަރަކަށް މެމްބަރުން ތިބުމާއި އާއްމުންގެ ތެރެއިންވެސް މީޑީއާގެ ތަޖުރިބާހުރި ފަރާތްތައް ހިމެނޭގޮތަށް ކޮމިޝަން އުފެއްދުމަށެވެ.
ނަމަވެސް ކޮމެޓީގެ ވިސްނުންހުރީ، މީޑިއާ ކޮމިޝަނުގެ މެމްބަރުންގެ އަދަދު ތިން މެމްބަރުންނަށް ހެދުމަށެވެ. ނުވަތަ ފުލްޓައިމް ދެ މެމްބަރުން ތިއްބެވުމަށްފަހު، "ސިޓިން އެލަވަންސް" ލިބޭގޮތަށް އިތުރު މެމްބަރުން ހިމަނައިގެން ކޮމިޝަން އުފެއްދުމަށެވެ. ކޮމެޓީގެ ވިސްނުން އެގޮތަށް ހުރީ، އެކޮމެޓީން މީގެ ކުރިން ބްރޯޑްކޮމްއާއެކު ބޭއްވި ބައްދަލުވުންތަކާއި، އެކޮމިޝަނުން ކޮށްފައިވާ މަސައްކަތްތަކަށް ބަލާއިރު، އެކޮމިޝަނުގައި މާބޮޑު މަސައްކަތްތަކެއް ކުރަންއޮތް، ނުވަތަ ކުރާ ކޮމިޝަނެއްގެ ގޮތުގައި ފާހަގަ ކުރެވިފައި ނުވާތީ އެވެ.
މީީޑިއާ ކައުންސިލުން ބުނީ މީޑިއާ ކޮމިޝަނުގެ މައިގަނޑު އަމާޒަކަށްވާންޖެހޭނީ، މީޑިއާތަކަށް ރެގިއުލޭޓްކޮށް، މީޑިއާ ކުރިއަރުވަން މަސައްކަތްކުރާ ކޮމިޝަނެއްގެ ގޮތުގަ ކަމަށެވެ. މިހާރު އޮތް ބްރޯޑްކޮމް ހިނގާގޮތަށް، މީޑީއާތަކާމެދު ހަރުކަށި ފިޔަވަޅުއަޅާ، ބޮޑެތި ޖޫރިމަނާތައް ކުރާ ކޮމިޝަނެއްގެ ގޮތުގައި މީޑިއާ ކޮމިޝަން ވެއްޖެނަމަ މީޑިއާތައް އިނދަޖެހި، މީޑިއާއަށް ބޮޑެތި ގޮންޖެހުންތަކާ ކުރިމަތިވެދާނެ ކަމަށް މީޑިއާ ކައުންސިލުން ބުނެއެވެ.
މީޑިއާ ކައުންސިލުން ބުނީ މީޑިއާތަކުގެ ސުލޫކީ މިންގަނޑެއް އެކުލަވާލައި، ވީހާވެސް ލިޔުންތެރިކަން ނުވަތަ މީޑީއާ ކުރިއަރާނެ ގޮތަކަށް ކަންކަން ބައްޓަން ކުރުމަކީ ވަރަށް މުހިއްމު ކަމެއް ކަމަށެވެ.
އެ ކޮމެޓީން ވަނީ މީޑިއާތަކުގެ އިސްވެރިންނާ ބައްދަލުކުރުމަށް ވެސް ނިންމާފަ އެވެ. އަދި ކޮމެޓީގެ މެމްބަރުން ވިދާޅުވީ މީޑިއާ ކޮމިޝަންގެ ބިލް ނިމޭއިރު، މީޑީއާތަކުގެ ބޭފުޅުން ހިތްހަމަޖެހޭފަދަ ހެޔޮ ބަދަލުތަކެއް ފެންނާނެ ކަމަށް އުއްމީދު ކުރައްވާ ކަމަށެވެ.
