ކުރިޔަށް އޮތް ދުވަސްތަކުގައި މާލޭގެ މަގުތަކަށް ބޮޑެތި ބަދަލުތަކެއް ގެންނާނެކަމަށް މާލެސިޓީ ކައުންސިލްގެ މޭޔަރ ޝިފާ މުހައްމަދު ވިދާޅުވެއްޖެއެވެ.

ރާއްޖެއެމްވީއަށް ދެއްވި ހާއްސަ ބަސްދީގަތުމެއްގައި ޝިފާ ވިދާޅުވީ، މާލެ ހިތްފަސޭހަ ތަނަކަށް ހެދުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅެއްކަމަށާއި، ރައްޔިތުންގެ ހިޔާލާއި ޝަކުވާތަކަށް ބަލައި މާލޭގެ އިންޓީރިއަރ ބަދަލުކުރުމުގެ މަސައްކަތް ކުރަމުންދާ ކަމަށެވެ.

ޝިފާ ވިދާޅުވީ، މާލެ ސިޓީ ކައުންސިލްގެ ލަފަޔާއި މާލެ އެކި ދާއިރާތައް ތަމްސީލުކުރައްވާ މެމްބަރުންނާއި ސަރުކާރުގެ ވުޒާރާތަކާއި ދައުލަތުގެ އެކި ކުންފުނި ތަކުގެ އިތުރުން މުވާސަލާތީ ހިދުމަތްތައް ދޭ ފަރާތްތަކާއެކު ކުރެވުނު މަޝްވަރާގެ މައްޗަށް ހާއްސަ ޕްރޮޖެކްޓެއް އެކުލަވާލައި އެންމެ ފަހުން ބޭއްވުނު ވަޒީރުންގެ މަޖިލީހަށް ހުށަހަޅާފައިވާކަމަށެވެ.

ޒަމާނުއްސުރެ ވާރޭ ވެހޭއިރަށް، މާލޭގެ މަގުތައް ފެންބޮޑުވާކަން ފާހަގަކޮށް ޝިފާ ވިދާޅުވީ މި ޕްރޮޖެކްޓްގެ ނިމޭއިރު، އުންމީދަކީ އެ ހުރިހާ ކަމަކަށް ހައްލެއް ލިބުންކަމަށާއި ނެއިބާރހޫޑް ގޯޅިތަކާއި ބޮޑެތި މަގުތަކަށް ވެސް ވަރަށް ބޮޑެތި ބަދަލުތަކެއް ގެންނާނެކަމަށެވެ. ކުރީ ސަރުކާރޭ އެއްގޮތަށް މި ސަރުކާރުގެ އަމާޒަކީ މާލޭގެ މަގުތަކުގެ މަލަ މަތި ރީތިކޮށްލުން ނޫންކަމަށް ޝީފާ ވިދާޅުވިއެވެ.

އިތުރަށް ވާހަކަ ދައްކަވަމުން ޝިފާ ވިދާޅުވީ، މިހާރުވެސް 2 ސަރަހައްދެއްގައި މަސައްކަތް ފަށާފައިވާ ކަމަށާއި ، ބަދަލުތަށް ގެންނައިރު އެންމެ ފުރަތަމަ ބަދަލުކުރުމަށް ނިންމާފައިވަނީ ބޮޑެތި މަގުތައް ކަމަށެވެ. މާލޭ ގެ މަގުތަކުގެ ތޮއްޖެހުން ހައްލުކުރުމަށް ސަރުކާރުން ގިނަ މަސައްކަތް ކުރައްވަމުން ގެންދަވާއިރު، ޕަބްލިކް ޓްރާންސްޕޯޓާއި އެކު އެކަންތައް ހައްލު ވެގެން ދާނެ ކަމަށް ކަމާބެހޭ އިދާރާތަކުން މީގެކުރިން ވަނީ ބުނެފައެވެ. އެންމެ ފަހުގެ ހިސާބުތަކަށް ބަލާއިރު ވެރިކަން ކުރާ މާލޭގައި 70000 ސައިކަލު ހުރި އިރު، ތޮއް ޖެހުން ހައްލުކުރުމަށް މާލޭގައި ބަހުގެ ހިދުމަތް ތައާރަފްކުރުމަށް ވަނީ ނިންމާފައެވެ. މޭޔަރ ޝިފާ ވިދާޅުވީ މަގުތަށް ބަދަލުކޮށް ނިމުމާއެކު، ކޮންމެ 5 މިނެޓަކުން ނުވަަތަ 10 މިނިޓަކުން ބަހުގެ ހިދުމަތް އޮންނާނެކަމަށެވެ.

ޝިފާ ވިދާޅުވީ ޕްރޮޖެކްޓައި ގުޅޭ އިތުރު މައުލޫމާތު ރައްޔިތުންނާއި މަޝްވަރާކުރުމަށްފަހު އާންމުކުރާނެކަމަށެވެ.