ފެމެލީ ކޯޓުގެ އިސް ގާޒީ ހަސަން ސައީދު ކްރިމިނަލް ކޯޓަށް ބަދަލުކޮށްފިއެވެ.
ބުދަ ދުވަހު ޖޭއެސްސީން ނެރެފައިވާ ބަޔާނެއްގައި ބުނީ، ގާޒީ ސައީދުއާ ބެހޭ ގޮތުން އެ ކޮމިޝަނުން ބެލި ސުލޫކީ މައްސަލަތަކާއި ގުޅިގެން، ފަނޑިޔާރުގެ ސުލޫކަށް އަސަރުކުރާ ފަދަ ކަންތައްތަކެއް ސާބިތުވާކަމަށް ތަހުގީގު ކޮމިޓީން އެކުލަވައިލި ރިޕޯޓް ކޮމިޝަނުން ބަލައިގަނެފައިވާ ކަމަށެވެ. އަދި ރިޕޯޓަށް ގާޒީ ސައީދު ޖަވާބު ހުށައެޅުމުން އެއަށް ރިޔާއަތްކޮށް ނަސޭހަތް ދިނުމަށް ފަހު އޭނާ ކްރިމިނަލް ކޯޓަށް ބަދަލުކޮށްފައިވާ ކަމަށެވެ.
ގާޒީ ސައީދު ކްރިމިނަލް ކޯޓަށް ބަދަލުކޮށްފައިވާއިރު، ފެމެލީ ކޯޓުތެރޭގައި ހައްޖު ގުރޫޕުގެ މަސައްކަތް ކުރަމުންދިޔަ މައްސަލައެއް ފެންމަތިވުމުން ޖޭއެސްސީން ވަނީ މި އަހަރުގެ ޖުލައި މަހު އެ މައްސަލައިގެ އަޑުއެހުން ބާއްވާފައެވެ. ހައްޖު ގުރޫޕްގެ މަސައްކަތް ކުރަމުން ދިޔަ ކަމަށް ސައީދު ވަނީ އަޑުއެހުމުގައި އިއުތިރާފްވެ ވަޑައިގަންފައެވެ.
މީގެ ކުރިން 2016 ވަނަ އަހަރު ޖޭއެސްސީން ގާޒީ ހަސަން ސައީދާ ގުޅޭ ގޮތުން ބެލި މައްސަލައެއްގައި އޭނާ ސަސްޕެންޑްކުރިއެވެ.
