މޯލްޑިވްސް ޑިމޮކްރަސީ ނެޓްވޯކުން "ޕްރިލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސް" ގެ ނަމުގައި ނެރެފައިވާ ރިޕޯޓާމެދު ކަންބޮޑުވުން ފާޅުކޮށް 2016 ވަނަ އަހަރު ދީނީ ޖަމިއްޔާއަކުން އެ މިނިސްޓްރީއަށް މައްސަލަ ހުށަހެޅިކަމަށް މިނިސްޓްރީ އޮފް އިސްލާމިކް އެފެއަރޒުން ބުނެފިއެވެ.
ހޯމަ ދުވަހު އެ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިސްލާމިކް މިނިސްޓްރީގެ ސްޓޭޓް މިނިސްޓަރ އިލްޔާސް ޖަމާލް ވިދާޅުވީ ކޮންމެ އަހަރަކު ވެސް މި ދިރާސާއަށް އިތުރު އަޕްޑޭޓްތައް އަންނަމުންދާ ކަމަށެވެ.
2015 ގައި 2016 ގައި އަދި ކޮންމެ އަހަރަކު ވެސް މިއަށް އަޕްޓޭޑްތަކެއް އެބައާދޭ، ތަންތަން ކޮޅު ލެވިފައި މިވަނީ. މިއީ 2016 ގައި ވެސް އިސްލާމިކް އެފެއާޒްއަށް ކަންބޮޑުވުން ފާޅުކޮށް ދީނީ ޖަމިއްޔާއަކުން މައްސަލަ ލާފައިވާ ކަމަށް ވަރަށް އިތުބާރު ހުރި ގޮތަކުން މައުލޫމާތު ލިބޭ. އަޅުގަނޑުމެން މިކަހަލަ ކަންކަން ވަންހަނާއެއް ނުކުރާނަންއިލްޔާސް ވިދާޅުވިއެވެ.
މި ދިރާސާކޮށްފައިވަނީ ބޭރު ޤައުމެއްގެ މާލީ އެހީތެރިކަމާއެކުގައި ކަން ފާހަގަކުރައްވާ އިލްޔާސް ވިދާޅުވީ، އެ މުއްދަތުގެ ތެރޭގައި ނެޓްވޯކްގައި މަސައްކަތްކުރި ބައެއް ކުދިންނަށް ވިހި ހާހާއި އަށާރަ ހާހާއި ދެމެދުގެ އުޖޫރައެއް ދީފައިވާކަން އިނގޭކަމަށެވެ. ރިޕޯޓު އެކުލަވާލާފައިވަނީ ރިޕޯޓެއްގައި ގެންގުޅެންޖެހޭ ދިރާސާ މިންގަނޑުތަކައް ފެތޭގޮތައް ނޫންކަމަށް ބަޔާންކުރައްވާ، މި ރިޕޯޓަށް މިނިސްޓްރީގެ ފަރާތުން އިލްމީ ދިރާސާއެއް ކުރާނެ ކަމަށް އޭނާ ވިދާޅުވިއެވެ.
ދިރާސާ އެއް ކުރާއިރު ދިރާސާއެއްގައި ހުންނާނެ ރިސާޗް އެތިކްސްތަކެއް. އެ މިންގަނޑުތަކެއް އެއްވެސް ގޮތަކަށް މި ރިޕޯޓްގައެއް ނެތް. އަޅުގަނޑުމެން އިލްމީ ދިރާސާއެއް ކުރުމަށްފަހު ރައްޔިތުންނާއި ހިއްސާކުރާނަން، އެ ދިރާސާއިން ހާމަވެގެންދާނެ ކަންތައްތަކެއް ބަޔަކު ލައި ދިނީމައި އަމިއްލައަށް ޖަޖްކޮށްގެންކަން އެ ރިޕޯޓް ހަދާފައިވަނީއިލްޔާސް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ އޮފް އިސްލާމިކް އެފެއަރޒް ޑރ. އަޙްމަދު ޒާހިރު ވިދާޅުވީ އެ މައްސަލައަކީ އެއްވެސް ގޮތަކަށް މިނިސްޓްރީން ބަލައިގަންނާނެ ކަމެއް ނޫން ކަމަށާއި ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އަޅާނެ ކަމަށެވެ.
އެ ރިޕޯޓްގައި ހުރި ކަންތައްތަކަކީ އަޅުގަނޑުމެން ބަލައިގަންނަ ކަންތައްތަކެއް ނޫން. އޭގައި އެބަހުރި އިސްލާމްދީނަށް ފުށޫއަރާ ކަންތައްތަކެއް، އޭގައި އެބަހުރި ކީރިތި ރަސޫލާއަށް ނިސްބަތްކޮށް ބެނުންކުރަން ނުޖެހޭ ބަސްތައް، އަޅުގަނޑުމެން އެފަދަ ފަރާތްތަކުގެ މައްސަލަ ކަމާބެހޭ ފަރާތްތަކަށް ހުށަހަޅައިގެން ދޭންޖެހޭ އަދަބު ދޭނަން. ފިޔަވަޅު ވެސް އަޅާނަންއަޙްމަދު ޒާހިރު ވިދާޅުވިއެވެ.
އެމްޑީއެންގެ ރިޕޯޓާއި ގުޅިގެން ގިނަ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. އަދި އާންމުންގެ ފާޑު ކިޔުންތައް އަމާޒުވުމުން އެ ރިޕޯޓް ނެގުމަށް ފަހު އެމްޑީއެންއިން ވަނީ މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ. އެ ރިޕޯޓުގެ މައްސަލަ އިސްލާމިކް މިނިސްޓްރީން ފުލުހުންނަށް ހުށަހަޅާފައިވާއިރު ފުލުހުން ވެސް ވަނީ އެ މައްސަލަ ސީރިއަސް މައްސަލައެއްގެ ގޮތުގައި ތަހުޤީޤު ކުރަމުންދާ ކަމަށް ބުނެފައެވެ.
