ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) އާއި ޕީޕަލްސް ނެޝަނަލް ކޮންގްރެސް(ޕީއެންސީ)އާ ގުޅިގެން "އަންނަނީ، އަންނަނީ" ނަމުގައި ސިޔާސީ ޙަރަކާތެއް ބާއްވަން ނިންމައިފިއެވެ.
އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ސެކެޓްރީ ޖެނެރަލް މުޙައްމަދު ޙުސައިން ޝަރީފް (މުންދު) ވިދާޅުވީ ދެ ޕާޓީ ގުޅިގެން ބާއްވާ ބައްދަލުވުން ބާއްވާނީ ހުކުރުދުވަހުގެ ރޭ 8.30 ގައި ކާނިވާ ޞަރަޙައްދުގައި ކަމަށެވެ.
އެ ބައްދަލުވުމުގައި ކުރީގެ ރައީސް އަބްދުﷲ ޔާމީން ޢަބްދުލް ޤައްޔޫމް، ބައިވެރިވެވަޑައިގަންނަވާނެ ކަމަށް މުންދު ވިދާޅުވިއެވެ. އަދި ޕާޓީގެ އިސްފަރާތްތަކުން މި ޖަލްސާގައި ވާހަކަދައްކަވަން ހަމަޖެހިފައިވާއިރު، މި ވަގުތު ޤައުމަށް ކުރިމަތިވެފައިވާ މުހިންމު މައްސަލަތަކައް އަލިއަޅުއްވާލާ ވާހަކަދައްކަވާނެ ކަމަށެވެ.
ވީހާވެސް ގިނަ ބަޔަކު މި ޙަރަކާތުގައި ބައިވެރިވެ ވަޑައިގަތުމަށް މުންދުވަނީ އެދިވަޑައިގެންފައެވެ. މުންދު ވިދާޅުވީ އިދިކޮޅު ސިޔާސީ ޕާޓީއެއްގެ ގޮތުގައި ޕީޕީއެމާއި ޕީއެންސީ ކުރިއަށް އޮތްތާގައި ވަރަށް ވަރުގަދަވެގެންދާނެ ކަމަށާއި، ސަރުކާރު ޖަވާބުދާރީ ކުރުވުމުގެ މަސައްކަތުގައި ދެމިތިބޭނެ ކަމަށެވެ.
