ދިވެހި ރާއްޖޭގެ ދީނީ އެއްބައިވަންތަކަން ދެމެހެއްޓުމަށް ކްލަބްތަކާއި ޖަމިއްޔާތަކަށް ޔޫތު މިނިސްޓްރީން ގޮވާލައިފިއެވެ.
ޔޫތު މިނިސްޓްރީއިން މިހެން ގޮވާލާފައިމިވަނީ "މޯލްޑިވްސް ޑިމޮކްރަސީ ނެޓްވޯރކް" އެމްޑީއެން އިން ނެރުނު ރިޕޯޓާއި ގުޅިގެން ހޮނިހިރު ދުވަހު ޢާއްމުކުރި ބަޔާނެއްގައެވެ.
ޔޫތު މިނިސްޓްރީއިން ނެރުނު ބަޔާނުގައި ރާއްޖޭގައި ރަޖިސްޓްރީކޮށްގެން ހިންގާ ހުރިހާ ކްލަބް ޖަމިއްޔާތައް ރާއްޖޭގެ ދީނީ އެއްބަިއވަންތަކަން ދެމެހެއްޓުމަށް ސަރުކާރުން ކުރަމުންދާ މަސައްކަތްތަކަށް އެއްބާރުލުންދީ، ރާއްޖޭގެ ޤާނޫނު އަސާސީއާއި ޢަމަލުކުރަމުންދާ ގާނޫނުތަކާއި ގަވާއިދުތަކަށް ފުރިހަމަޔަށް އިހްތިރާމް ކުރުމަށް އިލްތިމާސްކޮށްފައިވެއެވެ.
އެމްޑީއެން އިން ނެރުނު ރިޕޯޓްގައި އިސްލާމްދީނާއި ރަސޫލާއަށް ނިޞްބަތްކޮށް ފުރައްސާރަކޮށްފައިވާ މައްސަލަ މިނިސްޓްރީ އޮފް އިސްލާމިކް އެފެއަރޒުން ވަނީ ފުލުހުންނަށް ހުށަހަޅައިފައެވެ. އިސްލާމިކް މިނިސްޓްރީއިން ބުނީ އެ ރިޕޯޓުގައި އިސްލާމްދީނުގެ އަޞްލުތަކާއި ޚިލާފު އަދި ދިވެހިންގެ ދީނީ އެއްބައިވަންތަކަން ގެއްލޭ ގޮތަށް ވާހަކަ ދައްކާފައިވާތީ އެކަން ތަހުޤީގުކޮށް ފިޔަވަޅު އެޅުމަށް ބުރާސްފަތި ދުވަހުގެ 13:46 ގައި ފުލުހުންނަށް މައްސަލަ ހުށަހަޅާފައިވާ ކަމަށެވެ. އަދި ފުލުހުން ވެސް ވަނީ އެ މައްސަލަ ހުށަހަޅާފައިވާކަން ކަށަވަރުކޮށްދީފައެވެ. ފުލުހުން ދަނީ އެ މައްސަލަ ބަލަމުންނެވެ.
