ރާއްޖޭގައި މިހާރު ކުރުއަށްދާ ސާކް އަރޓިސްޓް ކޭމްޕް އެންޑް އެގްޒިބިޝަންގެ އާރޓިސްޓް ކޭމްޕް މިރޭ ނިންމާލުމަށްފަހު އެގްޒިބިޝަން މިރޭ ފަށާނެއެވެ.

ރާޢްޖޭގައި ދެ ވަނަ ފަހަރަށް ބާއްވާ މި ކޭމްޕް އަދި އެގްޒިބިޝަންގައި ސާކްގެ ގައުމުތަކުން ޖުމްލަ 27 ބައިވެރިވިން ވަނީ ބައިވެރިވެފައެވެ. ގައުމު ތަކުގެ މެދުގައި އޮންނަ ގުޅުން ބަދަހި ކުރުމުގެ މަގްސަދުގައި ކުރިއަށް ގެންދާ މި ކޭމްޕް އަދި އެގްޒިބިޝަންގެ އަރޓިސްޓް ކޭމްޕް ކުރިއަށް ގެންގޮސްފައިވަނީ ހުޅުމާލެ ބީޗް ސަރަހައްދުގައެވެ.

މިރޭ ފެށުމަށް ހަމަޖެހިފައިވާ އެގްޒިބިޝަންގައި ކޭޕްގައި ބައިވެރިން ކުރަހާ ތައްޔާރު ކޮށްފައިވާ ކުރެހުންތައް ފެނިގެންދާނެއެވެ. މި އެގްޒިބިޝަންގައި 50 އަށް ވުރެ ގިނަ ކުރެހުންފެނިގެން ދާނެއެވެ.

ނޫސްވެރިންނާއި ވާހަކަ ދައްކަވަމުން، މިނިސްޓްރީ އޮފް އާރޓްސް، ކަލްޗަރ އެންޑް ހެރިޓޭޖްގެ ސީނިއަރ އެގްޒެކެޓިވް ޑިރެކްޓަރ، ހުސައިން އަލީ މަނިކް ވިދާޅުވީ، މި ކޭޕްގެ ސަބަބުން ރާއްޖޭގެ ޒުވާން އަދި އަރަމުން އަންނަ އަރޓިސްޓުންނަށް ސަރަހައްދީ ފެންވަރުގެ ހުނަރުތައް ދަސްކުރުމުގެ ފުރުސަތު ލިބިގެންދާނެ ކަމުގައެވެ. އަދި މިއީ ރާއްޖޭގެ އަރޓިސްޓުންނަށް ލިބިގެންދާ ރަނުގެ ފުރުސަތެއްކަން އަލީ މަނިކް ވަނީ ފާހަގަ ކުރައްވާފައެވެ.