ރައީސުލް ޖުމްހޫރިއްޔާ އިބްރާހިމް މުހައްމަދު ސާލިޙުގެ ދައުވަތަކަށް ސްރީލަންކާގެ ބޮޑު ވަޒީރު ރަނިލް ވިކްރަމަސިންހަގެ ދެކަނބަލުން ރާއްޖެ ވަޑައިގަތުމަށް ހަމަޖެހިފައިވާ ކަމަށް ރައީސް އޮފީހުން ބުނެފިއެވެ.
ރަސްމީ ދަތުރުފުޅުގައި ރަނިލް ރާއްޖެ ވަޑައިގަތުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 2 ގައެވެ.
ރަނިލް އާއި އެކު މިދަތުރުފުޅުގައި ސަރުކާރުގެ އިސްވެރިންނާއި ކެބިނެޓްގެ ހަތަރު ވަޒީރުން ބައިވެރިވެ ވަޑައިގަންނަވާނެ ކަމަށް ރައީސް އޮފީހުން މައުލޫމާތު ދެއެވެ.
ރަނިލްގެ މި ދަތުރުފުޅުގައި ދެ ގައުމުގެ ދެމެދު އެއްބާރުލުން ދިނުމުގެ މަޝްވަރާތައް ކުރާނެ ކަމަށާއި ދެގައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާ ކުރައްވާނެ ކަމަށް ރައީސް އޮފީހުން މައުލޫމާތު ދެއެވެ.
ރަނިލް ރާއްޖެއަށް ކުރައްވާ މި ދަތުރުފުޅުގައި ސެޕްޓެމްބަރު 3 އަދި 4 ގައި ޕްރެޑައިސް އައިލެންޑް ރިސޯޓްގައި ބޭއްވުމަށް ހަމަޖެހިފައިވާ އިންޑިއަން އޯޝަން ކޮންފަރެންސް 2019 ޗެއަރ ކުރެއްވުމަށް ވަނީ ހަމަޖެހިފައެވެ.
އިންޑިއަން އޯޝަން ކޮންފަރެންސް އަކީ އިންޑިއާ ފައުންޑޭޝަނާއި ދިވެހި ސަރުކާރާއި ގުޅިގެން ބާއްވާ ކޮންފަރެންސެކެވެ. ސިންގަޕޫރުގެ އެސް ރާޖަރަތުނަމް ސްކޫލް އޮފް އިންޓަނޭޝަނަލް ސްޓަޑީސް އަކީ ވެސް މި ކޮންފަރެންސްގެ ޕާޓްނަރެކެވެ.
