އިރާނުން މުޅިން އާ މިސައިލް ޑިފެންސް ސިސްޓަމެއް ތައާރަފްކޮށްފި އެވެ.

އިރާނުގެ ވެރިރަށް ތެހްރާންގައި އަންގާރަ ދުވަހު ބޭއްވި ހާއްސަ ހަފްލާއެއްގައި އިރާނުން އުފައްދާފައިވާ, މިސައިލް ޑިފެންސް ސިސްޓަމް, ތައާރަފް ކޮށްދެއްވީ އެ ގައުމުގެ ރައީސް ހަސަން ރޫހާނީ އެވެ.

ބަވަރް-373 ނަމަކަށް ކިޔާ މި ސިސްޓަމް އިރާނުން އިފްތިތާހްކޮށްފައި މިވަނީ އިރާނާ އެމެރިކާއާއި ދެމެދު އޮންނަ ހޫނުކަން އިތުރުވެފައިވާ ދުވަސްވަރެއްގަ އެވެ. އެމެރިކާއިން ވަނީ ނިމިދިޔަ އަހަރު އިރާނާ ދުނިޔޭގެ ބާރުތަކާއެކު ނިއުކްލިއަރ ހަތިޔާރާ ބެހޭގޮތުންވެފައިވާ އެއްބަސްވުމުން ވަކިވެ އިރާނާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ.

އިރާނުގެ އޮފިޝަލުން ވަނީ ބަވަރަކީ އިރާނުން އުފެއްދި ފުރަތަމަ ދުރު ރާސްތާ މިސައިލް ޑިފެންސް ސިސްޓަމް ކަމުގައި ބުނެފައެވެ. މި ސިސްޓަމްގެ މަސައްކަތް އިރާނުން ފަށާފައިވަނީ 2010 ވަނަ އަހަރު ރަޝިޔާގެ S-300 ސިސްޓަމް ސަސްޕެންޑް ކުރުމުންނެވެ.

ޑިފެންސް ސިސްޓަމް އިފްތިތާހްކުރުމުގެ ހަފްލާގައި ވާހަކަދައްކަވަމުން ރައީސް ރޫހާނީ ވިދާޅުވީ މި ސިސްޓަމްގެ މޯބައިލް ސާފޭސް ޓު އެއަރ ސިސްޓަމް S-300 އަށް ވުރެ S-400 އާ ގާތްވާނެ ކަމަށެވެ.