ކުރީގެ ރައީސް މައުމޫނު އަބްދުފް ޤައްޔޫމް އިސްކޮށް ހުންނަވައިގެން އުފައްދަވާ ޕާރޓީ މޯލްޑިވްސް ރިފޯރމް މޫވްމަންޓް (އެމްއާރްއެމް) އުފެއްދުމަށްޓަކައި ބޭނުންވާ ފޯމު އިލެކްޝަންސް ކޮމިޝަން (އީސީ) އަށް ހުށައަޅައިފިއެވެ.
ބުރާސްފަތި ދުވަހު އިލެކްޝަންސް ކޮމިޝަނަށް ފޯމުތައް ހުށައަޅާފައިވާއިރު، އެކަމާ ގުޅޭގޮތުން މީޑިއާއަށް މައުލޫމާތުދެއްވަމުން ރައީސް މައުމޫނުގެ ދަރިކަނބަލުން ޔުމްނާ މައުމޫނު ވިދާޅުވީ، އެމްއާރްއެމް އުފެއްދުމަށްޓަކައި ޖުމުލަ 3313 ފޯމު އިލެކްޝަންސް ކޮމިޝަނަށް ހުށައަޅާފައިވާ ކަމަށާއި، އެކަމުގައި ޕާޓީއަށް ތާއީދުކުރައްވާ ވަރަށް ގިނަ ބައެއްގެ ބުރަ މަސައްކަތާއި ބައިވެރިވުން ހިމެނޭ ކަމަށެވެ. އެގޮތުން އެމްއާރްއެމް އަބަދުވެސް މަސައްކަތް ކުރާނީ ޤައުމުގެ އިސްލާހަށް ކަމަށާއި، އަބަދުވެސް މަސައްކަތް ކުރާނީ ޕާޓީތަކާއި ގުޅިގެން ޤައުމަށް ރަނގަޅު ގޮތް ހޯދައިދެއްވުމަށްޓަކައި ކަމަށްވެސް ޔުމްނާ ވިދާޅުވިއެވެ.
އޭރުން ފެށިގެން ހަޤީޤަތުގައި އަޅުގަނޑުމެން މަސައްކަތް ކުރަމުން މި އަންނަނީ ރާއްޖޭގެ ކަންކަން އިސްލާހު ކުރުމުގެ މަގުގައި، އޭރު މަސައްކަތް މިކުރީ ކޯލިޝަންގައި، ދެން މިހާރު އަޅުގަނޑުމެން މި ތިބީ ކޯލިޝަން ސަރުކާރެއްގައި، މިދިޔަ އަހަރު ރައީސް މައުމޫނު ހުންނެވީ ގަލުގައި، ދެން އޭގެ ކުރިންސުރެ ފެށިގެން ފާރިސް މައުމޫނުވެސް ޖަލުގައި ވަގުތުތަކެއް ހޭދަކުރެއްވި، ދެން ނަދީމްވެސް ހުންނެވީ ޖަލުގައި، މިހުރިހާ ބޭފުޅުން ޖަލަށް ވަޑައިގެންނެވީ ހަޤީޤަތުގައި ފެއްޓެވި އިސްލާހީ ހަރަކާތްތަކާ ގުޅިގެން.
ރައީސް މައުމޫން އެމްއާރްއެމްއަށް ސޮއިކުރެއްވީ އެ ޕާޓީގެ މެންބަރޝިޕް އިތުރުކުރުމުގެ މަސައްކަތް ކުރަމުންދާ އެންދެރިމާގޭގައި ފެބްރުއަރީމަހުގެ 22 ވަނަ ދުވަހުގައެވެ. އެގޮތުން އޭރު ޕީޕީއެމްގެ ރައީސްއަކަށް ހުންނަވަނިކޮށް، އެ މަނިކުފާނު އެ މަގާމުން ވަކިކޮށް، ސިވިލް ކޯޓަށް ހުށަހަޅައިގެން ޕާޓީ ހިންގެވުމުގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު އަބްދުﷲ ޔާމީން ނެންގެވި އެވެ.
ޕާޓީ އުފެއްދުމަށް ބޭނުންވާ ފޯމު ހަމަކޮށް ކޮމިޝަނަށް ހުށައަޅާފައިވާއިރު، މޯލްޑިވްސް ރިފޯމް މޫވްމަންޓްގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަން ކޮމިޝަނުން ދީފައިވަނީ ފެބްރުއަރީ މަހުގެ 19 ވަނަ ދުވަހުއެވެ.