ދިވެހި ރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ޗާންސެލަރ ކަމަށް ޑރ. ހަސަން ހަމީދް އަދި ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)ގެ ޗާންސެލަރކަމަށް ޑރ. މުހައްމަދު ޒާހިރު ހުސައިން އައްޔަން ކުރައްވައިފިއެވެ.
ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހް މި ދެ ބޭފުޅުންނަށް މަގާމުގެ ފަތްކޮޅު އަރުއްވާފާވަނީ އަންގާރަ ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވި ހާއްސަ ރަސްމިއްޔާތެއްގައެވެ.
އިސްލާމީ ޔުނިވަރސިޓީގެ ޗާންސެލަރުކަމަށް އައްޔަނު ކުރެއްވި ޑރ. ޒާހިރު ހުސައިން ވަނީ މީގެ ކުރިން އެމްއެންޔޫ އަދި އައިޔޫއެމްގެ ޗާންސެލަރ ކަމުގެ މަގާމުވެސް ފުރުއްވާފައެވެ. ޑރ. ޒާހިރު ހުސައިނަކީ އެކިއެކި ވުޒާރާތަކުގެ ވަޒީރުކަމާއި ރައީސުލްޖުމްހޫރިއްޔާގެ އޮފީހުގެ ވަޒީރުކަމުގެ އިތުރުން ދައުލަތުގެ އެކިއެކި އިސް މަގާމުތައް ފުރުއްވާފައިވާ ބޭފުޅެކެވެ. އެ މަނިކުފާނު އެންމެފަހުން އަދާކުރައްވާފައިވަނީ އެޑިއުކޭޝަން މިނިސްޓްރީގެ މުޝީރުކަމުގެ މަގާމެވެ.
ގައުމީ ޔުނިވަރސިޓީގެ ޗާންސެލަރ ކަމަށް އައްޔަން ކުރެއްވި ޑރ. ހަސަން ހަމީދު ވަނީ މީގެ ކުރިން އެމްއެންޔޫގެ ވައިސް ޗާންސެލަރކަމުގެ މަގާމާއި މޯލްޑިވްސް ކޮލެޖް އޮފް ހަޔަރ އެޑިއުކޭޝަންގެ ރެކްޓަރގެ މަގާމުގެ އިތުރުން ތައުލީމީ ދާއިރާގެ އެކިއެކި މަގާމުތައް ފުރުއްވާފައިވެއެވެ.
