ހއ. ކެލާ ގައި ވަރުގަދަ ހުމެއް ފެތުރި، ރަށު ސިއްހީ މަރުކަޒުގައި ހުރި ހަމައެކަނި ޑޮކްޓަރުވެސް އެޑްމިޓް ކޮށްފިއެވެ.

ކެލާ ސިއްހީ މަރުކަޒުގެ ސީނިއާ އެޑްމިނިސްޓްރޭޓަރ އިބްރާހިމް ރުޝްދީ ރާއްޖެ.އެމްވީ އަށް ވިދާޅުވީ، ގަދަޔަށް ހުން އައިސް ހޮނޑުލުމުގެ ސަބަބުން ގިނަ އަދަދެއްގެ ބަޔަކު ޑޮކްޓަރަށް ދައްކާފައިވާ ކަމަށެވެ. އެރަށުގައި އެންމެ ޑޮކްޓަރެއް ހުންނައިރު ހުން އައިސްގެން އޭނާ ވެސް ވަނީ އެޑްމިޓްކޮށްފައިކަމަށް ރުޝްދީ ވިދާޅުވިއެވެ. ބަލިމީހުން މިހާރު ބަލަމުންދަނީ އެ ރަށުގައި ހުންނަ ހެލްތް ވޯކަރުންނެވެ.

ރުޝްދީ ވިދާޅުވީ، ހުން އައިސްގެން 10 އަހަރުން ދަށުގެ ދިހަ ވަރަކަށް ކުދިން ޑޮކްޓަރަށް ދައްކާފައިވާ ކަމަށެެވެ. އަދި އޭގެ ތެރެއިން ދެ ކުއްޖަކު އެޑްމިޓްކޮށް ފަރުވާދެމުންދާ ކަމަށް އޭނާ ވިދާޅުވިއެވެ. ދެން ތިބި ކުދިން އޮބްޒަވޭޝަންގައި ބޭއްވުމަށް ފަހު ވަނީ ދޫކޮށްލާފައެވެ. ބޮޑެތި މީހުންވެސް ޑޮކްޓަރަށް ދައްކާފައިވާ އޭނާ ވިދާޅުވިއެވެ.

ރަށަށް އިތުރު ޑޮކްޓަރަކު ބޭނުންވާތީވެ އެކަން ހެލްތް މިނިސްޓަރީ އަށް ވަނީ އަންގާފައެވެ. ރުޝްދީ ވިދާޅުވީ، މިރޭގެ ވަގުތެއްގައި އެ އަތޮޅު ވެރިކަން ކުރާ ދިއްދޫ އިން ޑޮކްޓަރަކު ކެލާއަށް ފޮނުވުމަށް ހަމަޖެހިފައިވާކަމަށް ހެލްތު މިނިސްޓްރީން ބުނެފައިވާކަމަށެވެ.