ޕާކިސްތާނުގެ ހަނގުރާމަވެރި ޖަމާއަތް، ލަޝްކަރޭ ތައިބާ އަދި އެ ޖަމާއަތުގެ އިންސާނީ އެހީގެ ގޮފި، ޖަމާއަތު ދާވާ ގެ ވެރިޔާ، ހާފިޒް މުހައްމަދު ސައީދު އެ ގައުމުގެ މެދުތެރޭގެ ސިޓީއެއްކަމަށްވާ ގުޖުރަންވާލާގެ ކޯޓަކަށް ދަނިކޮށް ހުއްޓުވައި ފުލުހުން އޭނާ ހައްޔަރުކޮށްފިއެވެ.

ޖަމާއަތުދާވާގެ ތަރުޖަމާނު ނަދީމް އަވާން އަލް ޖަޒީރާގައި ބުނެފައިވަނީ ބުދަ ދުވަހު ކައުންޓަރ ޓެރެރިޒަމް ޑިޕާޓްމަންޓުގެ ފުލުހުން ސައީދު ހައްޔަރުކޮށްފައިވަނީ ޕާކިސްތާނުގެ ދެވަނަ ސިޓީ ލާހޫރުގެ އުތުރުން 50 އަކަށް ކިލޯމީޓަރ ދުރުމިނުގައި ހުންނަ ކަމޮކެ ޓޮލް ޕްލާޒާއިން ކަމަށެވެ.

އަވާން ބުނެފައިވަނީ އޭނާއާ ގުޅޭ ހުރިހާ މައްސަލަތަކަކީވެސް ފަންޑްރެއިސް ކުރުމާ ބެހޭ މައްސަލަތައް ކަމަށާއި އޭނާގެ މައްޗަށް ދައުވާކޮށްފައިވަނީ ޓެރެރިޒަމަށް ފައިސާ ޚަރަދުކުރިކަމުގެ ދައުވާކަމަށެވެ.

ޖަމާއަތު ދާވާއިން ބުނީ ސައީދު ހައްޔަރުކުރުމާ ދެކޮޅަށް ކޯޓުގައި ވަކާލާތުކޮށް އޭނާ ކަފާލާތުގެ ދަށުން ދޫކޮށްލުމަށް ހުށަހަޅާނެކަމަށެވެ.

"އަޅުގަނޑުމެން ހައިކޯޓަށް ދާނަން އަދި އަޅުގަނޑުމެންނާމެދު އޮތް ނާއިންސާފަށް ގާނޫނީގޮތުން ކުރެވެންހުރި ހުރިހާކަމެއް ކުރާނަން،އަޅުގަނޑުމެން ގަބޫލުކުރާގޮތުގައި ކޯޓުން އަޅުގަނޑުމެންނަށް ތާއީދުކުރާނެ" އަވާން ބުނެފައިވެއެވެ.

ލަޝްކަރޭ ތައިބާ އުފެއްދި ސައީދު ބުނަމުންދަނީ 2001 ވަނަ އަހަރުން ފެށިގެން އެ ޖަމާއަތުގައި އޭނާގެ އެއްވެސް ދައުރެއް ނޯންނަކަމަށެވެ. ނަމަވެސް 2008 ވަނަ އަހަރު މުމްބާއީގައި ދިން ހަމަލާގެ މޭސްތިރިއަކީ އޭނާކަމަށް އަވަށްޓެރި އިންޑިއާއިން ތުހުމަތުކުރެއެވެ. އެ ހަމަލާގައި 160 އަށްވުރެ ގިނަ މީހުން މަރުވިއެވެ.