ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިނިސްޓަރ އޮފް އިކޮނޮމިކް ޑިވެލޮޕްމަންޓުގެ ނައިބުގެ މަޤާމަށް ބޭފުޅަކު އައްޔަނު ކުރައްވައިފިއެވެ. އެމަގާމަށް އައްޔަނުކުރައްވާފައިވަނީ ގއ. ދާންދޫ، ކާމިނީގެ، އަޙްމަދު މުޖާހިދުއެވެ.
މުޖާހިދު މަޤާމަށް އައްޔަނު ކުރައްވާފައިވަނީ މި ދިޔަ ބުރާސްފަތި ދުވަހުއެވެ. އަޙްމަދު މުޖާހިދަކީ މެލޭޝިޔާގެ އޯޕަން ޔުނިވަރސިޓީއިން މާސްޓަރ އޮފް އެޑިއުކޭޝަން ހާސިލުކުރައްވައިފައިވާ ބޭފުޅެކެވެ.
މީގެ ކުރިން މުޖާހިދު އަދާކުރައްވައިފައިވާ މަޤާމުތަކު ތެރޭގައި އިމާދުއްދީން ސްކޫލްގެ ޕްރިންސިޕަލްގެ މަޤާމާއި، އިސްކަންދަރު ސްކޫލްގެ ޑެޕިއުޓީ ޕްރިންސިޕަލްގެ މަޤާމާއި، އިސްކަންދަރު ސްކޫލްގެ ލީޑިން ޓީޗަރގެ މަޤާމުގެ އިތުރުން މޯލްޑިވްސް ނެޝަނަލް ޔުނިވަރސިޓީގެ ޕާޓް ޓައިމް ލެކްޗަރަރގެ މަޤާމު ހިމެނެއެވެ.
މުޖާހިދުއަކީ މީގެ ކުރިން ޓީވީއެމްގައި ގިނަ ޕްރޮގުރާމްތަކެއް ހުށައަޅާދީފައިވާ މަގްބޫލު ޓީވީ ޕްރެޒެންޓަރެކެވެ.
މުޖާހިދަށް ޑެޕިއުޓީ މިނިސްޓަރުކަން ދިނުމުން، ކޮމްޕެނީ ރެޖިސްޓްރާ މަރިޔަމް ވިސާމްއާ އެކު އިކޮނޮމިކް މިނިސްޓްރީގެ ނައިބުންގެ ޖުމްލަ އަދަދު ފަހަކަށް އެރީ އެވެ.
