ގާނޫނާއި ގަވާއިދާ ހިލާފަށް ވެލި ނެގުމުގެ މަސައްކަތް ކުރާނަމަ ފިޔަވަޅު އަޅާނެ ކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.

ޖުލައި 10 ވަނަ ދުވަހު އެ އެޖެންސީ އިން ނެރުނު ބަޔާނެއްގައި ބުނެފައިވަނީ ފަހަކަށް އައިސް ގަވައިދާ ހިލާފަށް ވެލި ނެގުމުގެ މަސައްކަތް ކުރުން އާންމުވެފައިވާ ކަމަށެވެ. ހުއްދަ ހޯދުމަކާއި ނުލާ މެޝިނަރީ ބޭނުންކޮށްގެން ވެލިނެގުމަށް ކަނޑައަޅައިފައިވާ ސަރަހައްދުތަކުގެ ބޭރުން ރަށްރަށުގެ ގޮޑުދޮށް ތަކުންނާއި ފިނޮޅުތަކުން ވެލިނަގަމުން ގެންދާކަން އެޖެންސީއަށް ފާހަގަކުރެވިފައި ވާކަން ބަޔާނުގައިވެއެވެ.

ޕަމްޕު ބޭނުން ކޮށްގެން ވެލި ނެގުމާއި ތިމާވެއްޓަށް އަސަރު ފޯރާ މިންވަރު ބަޔާންކުރާ ރިޕޯޓު ހަދައި ހުއްދަ ހޯދައިގެން ހިންގާ މަޝްރޫއުތަކުގައި ހުއްދަ ދީފައިވާ މިންވަރަށް ވުރެ އިތުރަށް ވެލި ނެގުމަށް ފަހު ވިއްކުމާއި ކަނޑަށް އަޅައި ރިސޯސް އިސްރާފުކުރުން ފަދަ ކަންކަމުގެ ޝަކުވާ ވެސް އީޕީއޭ އަށް ލިބިފައިވާ ކަމަށް ބަޔާނުގައި ބުނެފައިވެއެވެ.

މަސައްކަތް ކުރާ ފަރާތްތަކުންނާއި ކައުންސިލްތަކުން ހެދިފައިވާ ގާނޫނީ އިމުގެ ތެރެއިން ވެލި ނެގުމުގެ މަސައްކަތް ކުރުމަށް އެ އެޖެންސީ އިން ވަނީ އިލްތިމާސް ކުރައްވައިފައެވެ.