ބޭނުން ކުރަންޖެހޭ ވަރަށް ވުރެ އިތުރަށް ބާރުގެ ބޭނުންކޮށް ފުލުހުންގެ އޮފިސަރުންތަކެއް، މީހަކަށް އަނިޔާ ކުރި މައްސަލާގައި ބައިވެރިވި ފުލުހުންގެ މައްސަލަ ހިއުމަން ރައިޓްސް ކޮމިޝަނަށް ހުށަހަޅައިފިއެވެ.
މި މައްސަލައާއ ގުޅިގެން ޕޮލިސް ކޮމިޝަނަރ މުހައްމަދު ހަމީދު ކުރެއްވި ޓްވީޓެއްގައި ވިދާޅުވެފައިވަނީ އާދައިގެ ހެދުމުގައި ތިބި ފުލުހުންތަކެއް ގެއަކަށް ވަދެ ބާރުގެ ބޭނުންކޮށް މީހަކަށް އަނިޔާ ކުރި ފުލުހުންގެ ނަންތައް ވާނީ މިހާރު ވާނީ ހިއުމަން ރައިޓްސް ކޮމިޝަނަށް ހުށަހަޅާފައި ކަމަށެވެ.
އެގޮތުން، ކޮމިޝަނަރ ހަމީދު ވަނީ މި މައްސަލަ ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑް އަދި ހިއުމަން ރައިޓްސް ކޮމިޝަން ގައި މި މައްސަލަ ތަހުގީގު ކުރުމަށް އެދިވަޑައިގެންފައެވެ.
ހަމީދު ކުރިން ކުރެއްވި ޓްވީޓެއްގައި ވިދާޅުވެފައިވަނީ މި މައްސަލައަކީ އެއީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށާއި އެ އަމަލުގައި ބައިވެރިވި އޮފިސަރުން ސަސްޕެންޑް ކުރައްވާ، މައްސަލަ އިތުރަށް ތަހުގީގު ކުރައްވާނެ ކަމަށެވެ.
މި މައްސަލައާ ގުޅިގެން ފުލުހުންގެ މީޑިއާ އޮފިޝަލް ވިދާޅުވީ އަނިޔާ ކޮށްފައިވަނީ ބިދޭސީއަކަށް ކަމަށެވެ.
މިކަން ހިނގާފައިވަނީ މަސްތުވާތަކެތި ޓްރެފިކް ކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ފުލުހުންގެ ޑްރަގް އެންފޯސްމެންޓް ޑިޕާޓްމެންޓުން ހިންގި އޮޕަރޭޝަނެއްގައި ކޯޓު އަމުރެއްގެ ދަށުން މ. އުޖާލާގެއަށް ހުކުރު ދުވަހުގެ 19:35 ހާއިރު ވަދެ އެ ގެ ބަލާ ފާސްކުރުމުގެ ތެރޭގައެވެ.
