ޓިއުނީޝީއާއަށް އެތެރެވި ބެލަރުސް ބައެއްގެ އަތުން ދިވެހި ޕާސްޕޯޓްތަކެއް ފެނުނު ކަމަށް ރިޕޯޓް ކޮށްފައިވާތީ އެ މައްސަލަ ބަލަމުން އަންނަ ކަމަށް ދިވެހިރާއްޖޭގެ އިމިގްރޭޝަނުން ބުނެފިއެވެ.
ޕާސްޕޯޓްތައް ފެނިފައިވާނީ ޓިއުނޭޝީއާގެ ދެވަނައަށް އެންމެ ބޮޑު ސިޓީގެ ހޮޓަލެއްގެ ކޮޓަރިއެއް ތެރެއިންނެވެ.
ޓިއުނޭޝިއާގެ ފުލުހުންނާއި ހަވާލާދީ ރިޕޯޓްތައް ބުނާ ގޮތުން އެ މައްސަލާގައި ހަ މީހަކު ވަނީ ހައްޔަރު ކޮށްފައެވެ. އެ މީހުންގެ އަތުން ޔޫކްރެއިންގެ އިތުރުން ޕޮލެންޑްގެ ޕާސްޕޯޓް ތަކެއްވެސް ވަނީ ފެނިފައެވެ.
ރާއްޖޭގެ އިމިގްރޭޝަނުން އެކަމާއި ގުޅޭ ގޮތުން ކުރި ޓްވީޓެއްގައި ބުނީ، ރާއްޖޭގެ ވަގު ޕާސްޕޯޓްތަކެއް ބޭނުން ކުރި ކަމުގެ މައުލޫމާތު ލިބިފައިވާ ކަމަށާއި، އެ މައްސަލައިގެ ސައްހަކަން ބަލަމުން އަންނަ ކަމަށެވެ.
އިމިގްރޭޝަނުން ބުނީ، ރާއްޖޭގެ ޕާސްޕޯޓަކީ ސެކިރިޓީ ފިޗާސްތައް ވަރުގަދަކޮށް އެންމެ ފަހުގެ ފީޗާސްތައް ބޭނުންކޮށްގެން ނަކަލު ނުކުރެވޭ ގޮތަށް ހަދާފައިވާ ޕާސްޕޯޓެއް ކަމަށެވެ. އަދި ރާއްޖޭގެ ވަގު ޕާސްޕޯޓް ބޭނުންކޮށްގެން އެހެން ގައުމަކަށް އެތެރެވުމުގެ ފުރުސަތު ކުޑަކަމަށްވެސް އިމްގްރޭޝަނުން ބުންޏެވެ.
ރާއްޖޭގެ ވަގު ޕާސްޕޯޓްތަކެއް ފެނިފައިވާ ކަމަށް ރިޕޯޓްކޮށްފައިވާއިރު، ދެކުނު އޭޝިއާ ސަރަހައްދުގެ އެންމެ ބާރުގަދަ ޕާސްޕޯޓެއްގެ ދަރަޖަ ދިވެހި ޕާސްޕޯޓަށް ވަނީ ދާދިފަހުން ލިބިފައެވެ.
