ވިލިފުށީ ދާއިރާގެ ކުރީގެ މެމްބަރު ރިޔާޒު ރަޝީދުގެ މަސްލަހަތު އޮންނަ މެރީޑިއަމް ސާވިސަސް ޕްރައިވެޓް ލިމިޓެޑްގެ ތެލާގުޅޭ ލިޔެކިޔުންތައް ފެނިފައިވާ ކަމަށް އެސްޓީއޯ އިން ބުނުމަކީ ޝަރީއަތަށް ނުފޫޒު ފޯރުވުން ކަމަށް މެރީޑިއަމުން ބުނެފިއެވެ.

ބުދަ ދުވަހު ބޭއްވި ރައްޔިތުންގެ މަޖިލީހުގެ ސްޓޭޓް އޯން އެންޓަޕްރައިސަސްގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން އެސްޓީއޯގެ މެނޭޖިންގ ޑިރެކްޓަރު ހުސައިން އަމްރު ވިދާޅުވީ، ފޮނަދޫގައި ބަހައްޓާފައި ހުއްޓާ ގެއްލުނީ މެރީޑިއަމުން ދައްކަންޖެހޭ 19 މިލިއަން ރުފިޔާއާ ގުޅޭ ޕްރިންޓް ޑޮކިއުމެންޓްސްތައް ކަމަށެވެ. އެކަމަކު އަސްލު ލިޔެކިޔުންތައް ކޮމްޕިއުޓަރު ސިސްޓަމުގައި އެބަހުރި ކަމަށް އޭނާ ވިދާޅުވިއެވެ.

އަމްރު ވިދާޅުވީ، ލިޔެކިޔުންތައް ކޯޓަށް ހުށައަޅައި އެ މައްސަލަ މިހާރު އޮތީ ހައި ކޯޓުގެ ހުކުމް ކުރާ މަރުހަލާގައި ކަމަށެވެ. އިލެކްޓްރޯނިކްސް ޑޮކިއުމެންޓްސްތައް އިތުރަށް ޗެކް ކުރުމަށް ފުލުހަށް ވަނީ ހުށައަޅާފައެވެ.

އަމްރު މި ވާހަކަތަކާއި ގުޅިގެން މެރީޑިއަމް ކުންފުނިން ބުރާސްފަތި ދުވަހު ނެރުނު ބަޔާނެއްގައި ބުނީ، އެ މައްސަލަ ހައިކޯޓުގައި ބަލަމުން ދަނިކޮށް ކުއްލިއަކަށް އިތުރު ލިޔުން ތަކެއް ފެނިފައިވާ ކަމަށް ބުނުމަކީ ޝަރީއަތަށް ނުފޫޒު ފޯރުވުމަށްޓަކައި ކުރަމުންދާ ކަމެއް ކަމަށް ބުނެފައެވެ.

މެރީޑިއަމްގެ ބަޔާނުގައި ބުނީ، އެ ކުންފުނިން އަބަދުވެސް މަސައްކަތް ކޮށްފައިވަނީ ގާނޫނާއި ގަވާއިދުގެ ތެރެއިން ކަމަށެވެ.