ޖިނާއީ ތަހުގީގުތަކުގައި އިންޑިއާ އާއި ދިވެހިރާއްޖެ އެއްގައުމު އަނެއް ގައުމަށް އެއްބާރުލުން ދިނުމުގެ ގޮތުން ސޮއިކޮށްފައިވާ "މިއުޗުއަލް ލީގަލް އެސިސްޓަންސް ޓްރީޓީ" ބަލައިގަތުމާ މެދު ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގައި މެމްބަރުންގެ ކަންބޮޑުވުންތައް ފާޅުކޮށްފިއެވެ.
ހޯމަ ދުވަހު އޮތް ކޮމިޓީގެ ބައްދަލުވުމުގައި ބައެއް މެމްބަރުން ވަނީ އެއްބަސްވުން ބަލައިގަންނަން ވާނީ އޭގައި ހިމެނޭ ކަންބޮޑުވުންތައް އޮޅުންފިލުވުމަށް ފަހުގައި ކަމަށް ވިދާޅުވެފައެވެ. އެގޮތުން މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް ވިދާޅުވީ އެއްބަސްވުމާ މެދު ގޮތެއް ނިންމަން ވާނީ އޭގައި ހުރި ކަންކަން ރަނގަޅަށް އޮޅުން ފިލުވުމަށް ފަހުގައި ކަމަށެވެ. އޭގެ އިތުރުން ހައިތަމް ވަނީ މިހާރު ސޮއިކުރެވިފައި އޮތް މުއާހަދާގައި ލިމިޓޭޝަންސް އޮން އެސިސްޓަންސް (ހުށައެޅުންތަކަށް ނޫނެކޭ ބުނެވޭނެ ހާލަތްތައް) ބަޔާންކޮށްދޭ މާއްދާއެއް އެއްބަސްވުމުގައި ހިމެނިފައި ނެތުމުން އެކަމާ މެދު ކަންބޮޑުވުން ފާޅުކޮށްފައެވެ.
ހައިތަމް ދެއްކެވި ވާހަކަފުޅަށް ތާއީދުކޮށް ވިލިމާލެ ދާއިރާގެ މެމްބަރު އަހްމަދު އުޝާމް ވިދާޅުވީ، އެއްބަސްވުމުގައިވާ ބައެއް ކަންކަން އޮޅުން ފިލުވަން ހުށައަޅުއްވާފައެވެ. އުޝާމް ވިދާޅުވީ ދިވެހިރާއްޖޭގެ ގާނޫނުތަކުގައި ވެސް އެފަދަ އެއްބާރުލުން ފޯރުކޮށްނުދެވޭނެ ހާލަތްތައް ބަޔާންކޮށްފައިވާ ކަމަށެވެ. އޭގެ އިތުރުން ބޭންކިންގ ސީކްރެސީ އާ ބެހޭގޮތުން މުއާހަދާގައިވާ މާއްދާތަކުގައި ބައެއް ފުށުއެރުންތައް އެބަހުރި ކަމަށާއި އެކަންކަން އޮޅުން ފިލުވަން ޖެހޭ ކަމަށް ދެކެވަޑައިގަންނަވާ ކަމަށް ވިދާޅުވިއެވެ.
ގައްދޫ ދާއިރާގެ މެމްބަރު އަހްމަދު ޒާހިރު ވެސް ވަނީ ހުޝާމް އާއި ހައިތަމްގެ ވާހަކަފުޅަށް ތާއީދުކޮށް، މުއާހަދާ ބަލައިގަންނަން މަޖިލީގުގެ ތަޅުމަށް ހުށައެޅުމުގެ ކުރިން އޭގައިވާ ކަންކަން ރަނގަޅަށް ސާފުކުރަން ޖެހޭ ކަމަށް ހިޔާލު ފާޅުކުރައްވާފައެވެ.
ކޮމިޓީގައި ވާހަކަފުޅު ދައްކަވަމުން ދުވާފަރު ދާއިރާގެ މެމްބަރު އިސްމާއިލް އަހުމަދު ވަނީ މިހާރު ވެސް ކަންބޮޑުވުންތައް އޮޅުންފިލުއްވައި ދެއްވާފައި ހުރިކަމަށް ވިދާޅުވެ އެއްބަސްވުން އެއޮތްގޮތަށް ފާސްކުރަން އެއްވެސް ހުރަހެއް އޮތް ކަމަކަށް ގަބޫލުފުޅު ނުކުރައްވާ ކަމަށް ވިދާޅުވެފައެވެ. އެގޮތުން މިއީ ރާއްޖެއަށް ފައިދާ ކުރަނިވި އެއްބަސްވުމެއް ކަމަށާއި އޭގައި ހުރި ކަންބޮޑުވުންތައް މިހާރު ވެސް އޭޖީ އޮފީހުން އޮޅުންފިލުއްވައި ދެއްވާފައިވާކަން ފާހަގަކުރައްވާފައިވެއެވެ.
ހޯމަ ދުވަހު އޮތް ކޮމިޓީގައި މަޖިލީހުގެ ކުރީގެ ރައީސް ގާސިމް އިބްރާހިމް ވަނީ ކޮމިޓީގެ މުގައްރިރު އިބްރާހިމް ޝަރީފް މެމްބަރުން ވާހަކަދައްކަން ފުރުސަތު ނުދެއްވާކަމަށް ވިދާޅުވެ ކޯފާއިސްކުރައްވާ ވާހަކަފުޅު ދައްކަވާފައެވެ. އަދި ޝަރީފާ ދެ ބޭފުޅުން ކޮންމެވެސް ވަރަކަށް ބަހުގެ ހަމަލާތައް ބަދަލުކޮށް، ޝަރީފް ވަނީ ގާސިމް ކޮމިޓީން ނިކުމެވަޑައިގަތުމަށް ވިދާޅުވެފައެވެ. ރައްދުގައި ގާސިމް ވިދާޅުވީ ކޮމިޓީން ބޭރުކުރަން ޖެހޭނީ ސިފައިން ގެނެސްގެން ކަށެވެ.
ގާސިމް ވިދާޅުވީ ކޮންމެ މުއާހަދާއެއްގައި ސޮއިކުރިޔަސް ދިވެހިރާއްޖޭގެ މިނިވަންކަމާ އިސްތިގުލާލަށް ބުރޫއަރާ ފަދަ އެއްވެސް ކަމެއް ކޮށްގެން ނުވާނެ ކަމަށް ވިދާޅުވެފައެވެ. ގާސިމްގެ ވާހަކަފުޅާ އެއްގޮތަށް މާވަށު ދާއިރާގެ މެމްބަރު މުހައްމަދު ސައީދު ވެސް ވަނީ ރާއްޖޭގެ މިނިވަންކަމާ އިސްތިގުލާލު ދެމެހެއްޓުމަށް ގޮވާލާފައެވެ. އަދި ބޭންކިން ސީކްރެސީއާ ގުޅޭގޮތުން ހުރި ކަންބޮޑުވުން އޮޅުން ފިލުއްވަން އެމްއެމްއޭގެ ލަފަޔެއް ހޯދުމަށް ވެސް އޭނާ ބާރުއެޅުއްވިއެވެ. ދެ ބޭފުޅުން ވެސް ވަނީ ކޮމިޓީ ބައްދަލުވުން ނިމުމުގެ ކުރިން ބައްދަލުވުން ދޫކުރައްވާ ވަޑައިގަންނަވާފައެވެ.
ހޯމަ ދުވަހު އޮތް ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީ ނިމިގެން ދިޔައީ އަންގާރަ ދުވަހު އޮންނަ ކޮމީޓީގެ ބައްދަލުވުމަށް، މެމްބަރުންގެ ހުރި ކަންބޮޑުވުންތައް އޮޅުން ފިލުވުމުގެ ގޮތުން ޕްރޮސިކިއުޓަރ ޖެނެރަލް އޮފީހުގެ ބޭފުޅަކާއި އެމްއެމްއޭގެ ބޭފުޅަކާއި ފޮރިން މިނިސްޓްރީގެ ބޭފުޅުން އަދި ބަންޑާރަ ނައިބުގެ އޮފީހުގެ ބޭފުޅެއް ހާޒިކުރުމަށް ފާސްކުރެވިގެންނެވެ.
"މިއުޗުއަލް ލީގަލް އެސިސްޓަންސް ޓްރީޓީ"ގެ މައިގަނޑު މަގުސަދަކީ ޖިނާއީ ތަހުގީގުތަކަށް ބޭނުންވާ ގާނޫނީ އެހީތެރިކަން އެއް ގައުމުން އަނެއް ގައުމަށް ފޯރުކޮށްދިނުމާއި، ޓެރަރިޒަމާ ދެކޮޅަށް ދެ ގައުމު ގުޅިގެން ފަށާފައިވާ މަސައްކަތްތައް އިތުރަށް ވަރުގަދަ ކުރުމެވެ.
މި މުއާހަދާގެ ދަށުން އެކުލަވާލުމަށް ނިންމާފައިވާ އޮނިގަނޑުގެ ތެރެއިން ޓެރަރިޒަމާ ގުޅުންހުރި މައުލޫމާތު ބަދަލުކުރުމާއި، ޖިނާއީ ކުށްތަކަށް ފައިސާ ހޯދާ ގޮތްތައް ދެނެގަނެ މައުލޫމާތު ބަދަލުކުރުމާއި، ޖިނާއީ ބޮޑެތި ކުށްތަކުގައި ހައްޔަރުކުރެވޭ މީހުންނަށް ދައުވާކުރުމުގައި އަމަލުކުރާނެ ގޮތްތަކެއް ވެސް އެކުލަވާލާފައިވެއެވެ.
