ރޭ ދަންވަރުގެ ވަގުތެއްގައި ގއ.ދާންދޫއަށް އެރި ކޮޅިގަނޑެއްގައި އެ ރަށުގެ ގެއަކަށް ބޮޑެތި ގެއްލުންތަކެއް ވެއްޖެއެވެ.

ކޮޅިގަނޑުގެ ތެރޭގައި ރުކެއް ވެއްޓި، ގޭގެ ފުރާޅު ވަރަށް ބޮޑަށް ހަލާކު ވެފައިވާ ކަމަށާއި ނަމަވެސް މި ހާދިސާގައި އެއްވެސް މީހަކަށް އަނިޔާ ލިބިފައިނުވާ ކަމަށް ވެސް ދާންދޫ ކައުންސިލް ގެ ރައީސް އިސްމާއިލް މުހައްމަދު ވަނީ ރާއްޖެ އެމް ވީ އަށް މައުލޫމާތު ދެއްވާފައެވެ.

މި ހާދިސާއާއި ގުޅޭގޮތުން އިތުރަށް މައުލޫމާތު ދެއްވަމުން އިސްމާއިލް މުހައްމަދު ވިދާޅުވީ އެގޭގެ ފުރާޅުމަތިން މިހާރު ރުއް ނެގުމުގެ މަސައްކަތް ކުރިއަށް ދާ ކަމަށެވެ.

ކައުންސިލް ގެ ރައީސް ވިދާޅުވީ ގެއަށް ވަރަށް ބޮޑެތި ގެއްލުން ތަކެއް ވެފައިވާ ކަމަށާއި ކައުންސިލް ބަޖެޓްގައި މިފަދަ ހާދިސާތަކުގައި ގެއްލުންވާ ފަރާތްތަކަށް އެހީތެރިކަން ދިނުމަށް ފައިސާ ނެތް ކަމަށެވެ.

ނަމަވެސް ކައުންސިލުން މިހާރު ވަނީ މާލީ ގޮތުން އެހީތެރިވުމަށްޓަކާ ނެޝަނަލް ޑިޒާސްޓަރ އޮތޯރިޓީގެ ސަމާލް ކަމަށް މި ހާދިސާ ގެނެސްފައެވެ. އަދި ނެޝަނަލް ޑިޒާސްޓާރ އޮތޯރިޓީއިން ވަނީ އެބޭފުޅުންގެ ފަރާތުން އެހީތެރިކަން ލިބޭނެކަމުގެ ފުރިހަމަ ޔަގީންކަން ކައުންސިލަށް އަރުވާފައެވެ.

ދާންދޫ ކައުންސިލުން ރާއްޖެ އެމް ވީ އަށް މައުލޫމާތު ދެއްވި ގޮތުގައި ކޮޅިގަނޑުގައި ގެއްލުންވި ގެއަކީ ސުނާމީ ޕްރޮޖެކްޓް ގެ ދަށުން 2014 ވަނަ އަހަރު ދާންދޫގައި އިމާރާތް ކުރެވިގެންދިޔަ ގެއެކެވެ.

މި ހާދިސާގައި ގެއްލުންވި ގޭގައި ދިރިއުޅެނީ ދޮށީ އުމުރުގެ ދެމަފިރިން ކަމަށާއި އެ ދެ ފަރާތަށް ނަޕްސާނީ ގޮތުން ވަރަށް ބޮޑަށް އަސަރު ކޮށްފައިވާކަމަށް ވެސް ކައުންސިލްގެ ރައީސް ވިދާޅުވިއެވެ.