ދުނިޔޭގެ އެކިކަންކޮޅުތަކަށް ޓެރަރިޒަމްގެ ހަމަލާތައް ދެމުން އަންނައިރު ދިވެހިރާއްޖެއަށް ވެސް އެނުރައްކާ އެބައޮތް ކަމަށް އެމްއެންޑީއެފުން ބުނެފިއެވެ.

އެމްއެންޑީއެފްގެ މަސައްކަތްތަކާ ބެހޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފް ވިދާޅުވީ އެންމެ ސަލާމަތީ ކަންކަން ރަނގަޅު, އަމާން ގައުމުތަކުގައި ވެސް ޓެރަރިޒަމްގެ ހަމަލާތައް ދެމުން އަންނަ ކަމަށާއި، ޓެރަރިޒަމްގެ ނުރައްކަލުން އެއްވެސް ގައުމެއް އޮތީ ސަލާމަތުން ކަމަށް މިވަގުތު ބުނެވެން ނޯންނާނެ ކަމަށެވެ. އޭޕްރީލް މަހުގެ 21 ވަނަ ދުވަހު ސްރީލަންކާއަށް ދިން ބޮމުގެ ހަމަލާތަކަށް އިޝާރާތް ބްރިގޭޑިއާ ޖެނަރަލް އަބްދުއްރަހީމް ވިދާޅުވީ މިހާރު ރާއްޖެއަށް އޮތް ނުރައްކާ ބޮޑުވެފައިވާ ކަމަށެވެ.

ބްރިގޭޑިއާ ޖެނަރަލް އަބްދުއްރަހީމް ވިދާޅުވީ ޓެރަރިޒަމްގެ ހަމަލާއަކުން ގައުމު ސަލާމަތް ކުރުމަށް ކުރާ މަސައްކަތަކީ ގިނަ މުއައްސަސާތަކާއި ބޭރުގެ ގައުމުތަކާ ގުޅިގެން ކުރާ މަސައްކަތް ކަމަށެވެ. އަދި ރެއާ ދުވާލު ގައުމުގެ ސަލާމަތްތެރިކަމަށްޓަކައި ގައުމީ ދިފާއި ބާރުން މަސައްކަތް ކުރަމުން ގެންދާނެ ކަމަށް ބްރިގޭޑިއާ ޖެނަރަލް ވިދާޅުވިއެވެ.