ބޭސްފަރުވާއަށް އިންޑިއާއަށް ފޮނުވާފައިވާ ކުރީގެ ނައިބު ރައީސް އަހުމަދު އަދީބު ހަ މަސް ފަހުން އަލުން ޑޮކްޓަރަށް ދެއްކުމަށް އޭނާގެ ލޮލަށް ފަރުވާ ކުރި ޑޮކްޓަރު ލަފާ ދެއްވައިފި އެވެ.
އިންޑިއާގެ ޕޫނާގައި ހުންނަ ރޫބީ ހޯލް ކްލިނިކް ކިޔާ ހޮސްޕިޓަލުގައި ގުލަކޯމާ ބައްޔަށް ފަރުވާ ހޯދަމުން އަންނައިރު، އަދީބު ބެއްލެވި ޑޮކްޓަރު ޝްރުތިކާ ކަންކާރިޔާ ޓައިމްސް އޮފް އިންޑިއާ ނޫހަށް ވިދާޅުވީ ހަ މަސް ފަހުން ލޯ ޑޮކްޓަރަށް ދެއްލުމަށް އައުމަށް ލަފާދީފައިވާ ކަމަށެވެ.
ޑޮކްޓަރު ޝްރުތިކާ ވިދާޅުވީ، ޖޫން 18 އިން 24 އަށް އަދީބުގެ ލޮލަށް ފަރުވާ ދީފައިވާ ކަމަށެވެ.
އަދީބަށް ސިއްހީ ގޮތުން އެތައް މައްސަލަތަކެއް ކުރިމަތިވެފައިވާއިރު، އެމަނިކުފާނަށް ލޮލުގެ ފެނުމަށް އަސަރު ކުރާ ބައްޔެއް ކަމަށްވާ ގްލަކޯމާ ޖެހިފައިވާކަން އެނގުނީ އެމްއެމްޕީއާރުސީގެ ހިޔާނާތާއި ފިނިފެންމާ ލޯންޗުކޮޅުގައި އެއްޗެއް ގޮއްވާލި މައްސަލާގައި 33 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވަނިކޮށް 2017 ވަނަ އަހަރުއެވެ. ނަމަވެސް އޭރުގެ ސަރުކާރުން އަދީބަށް އެކަށީގެންވާ ސިއްހީ ފަރުވާ ދީފައިނުވެއެވެ.
ކަރެކްޝަނަލް ސާރވިސް އިން އަހުމަދު އަދީބް ބޭސްފަރުވާއަށް އިންޑިއާއަށް ފުރުމުގެ ހުއްދަދިނުމާއެކު، އޭނާ އިންޑިއާއަށް ފުރާވަޑައިގެންނެވީ އަނބިކަބަލުން މަރިޔަމް ނަޝްވާއެކު މި މަހުގެ 14 ވަނަ ދުވަހު އެވެ. އެނބުރި ވަޑައިގަންނަވަން ކުރިން ހަމަޖައްސާފައި އޮތީ މިމަހުގެ 26 ގައެވެ.
ނަމަވެސް އަދީބުގެ ކެންސަރ ސްކްރީނިންއެއް ހެދުމަށް ޑޮކްޓަރު ލަފާދީފައިވާ ގޮތަށް ކުރިޔަށް ގެންދިޔުމަށްޓަކައި އޭނާގެ ބޭސްފަރުވާގެ މުއްދަތު ޖުލައި މަހުގެ ހަވަނަ ދުވަހާއި ހަމަޔަށް އިތުރުކޮށްދީފައެވެ.
ހޯމް މިނިސްޓްރީން ބުނެފައިވާގޮތުގައި އަދީބާއެކުގައި ކަރެކްޝަނަލް ސަރވިސްގެ ތިން އޮފިސަރަކު އިންޑިއާ ގޮސްފައިވެއެވެ. އަދި އިންޑިއާގެ މުއައްސަސާތަކަށްވެސް އަދީބުގެ ދަތުރުގެ މައުލޫމާތު އަންގާފައިވާނެކަމަށާއި، ފިލުމުގެ ފުރުސަތެއް ނޯންނާނެކަމަށް އެ މިނިސްޓްރީން ބުންޏެވެ.
