ކްރިމިނަލް ކޯޓަށް ދެގާޒީއަކު ހޯދުމަށް އިއުލާން ކޮށްފިއެވެ.

ޖުޑިޝަލް ސަރވިސް ކޮމިޝަނުން (ޖޭއެސްސީ) ކުރި އިއުލާނެއްގައި ބުނީ ގާޒީކަމަށް އެދި ހުށަހަޅަން ބޭނުންވާ ފަރާތްތަކުން ޖުލައި މަހުގެ 11 ވަނަ ދުވަހުގެ 13:00 ގެ ކުރިން އެ ކޮމިޝަނަށް ހުށަހަޅަން ޖެހޭނެ ކަމަށެވެ.

ޖޭއެސްސީން ބުނީ ގާޒީ ކަމަށް އެދި ހުށަހަޅާ ފަރާތްތަކުގެ ޝަރުތުގެ ތެރޭގައި އުމުރުން 25 އަހަރަށް ވުރެ މަތީ މީހަކަށް ވާން ޖެހޭ ކަމަށެވެ. އަދި އިސްލާމީ ޝަރީއާ ނުވަތަ ގާނޫނު ނުވަތަ ގާނޫނާއި އިސްލާމީ ޝަރީއާގެ ރޮނގުން ފުރަތަމަ ޑިގްރީ ހާސިލުކޮށްފައިވާ މީހަކަށް ވާން ޖެހޭ ކަމަށެވެ.

މީގެ އިތުރުން ފަނޑިޔާރުކަމުގައި ނުވަތަ ގާނޫނީ ވަކީލުކަން ކުރުމުގައި ނުވަތަ މިދެކަމުގައި މަދުވެގެން ދެ އަހަރު ދުވަހުގެ ތަޖްރިބާ ލިބިފައިވާ މީހަކަށް ވެސް ވާން ޖެހޭ ކަމަށެވެ.

ކްރިމިނަލް ކޯޓުގެ ގާޒީއަކަށް އަސާސީގެ މުސާރާގެ ގޮތުގައި 30,000 ރުފިޔާ، ލިވިންގ އެލަވަންސްގެ ގޮތުގައި 15,000 ރުފިޔާ އަދި ރިސްކް އެލަވަންސް 3,300 ރުފިޔާ ވަނީ ކަނޑައަޅާފައެވެ. އަދި މެޑިކަލް އިންޝުއަރެންސްއާ ފޯނު އެލަވަންސް މަޖިލީހުން ކަނޑައަޅާފައިވާ ގޮތުގެ މަތިން ލިބިދޭނެ ކަމަށެވެ.

ދެގާޒީއަކު ހޯދުމަށް އިއުލާން ކޮށްފައިމިވަނީ ކްރިމިނަލް ކޯޓުގައި ދެ ގާޒީއެއްގެ މަގާމު އުފައްދައި ދިނުމަށް ސުޕްރީމް ކޯޓުން އެ ކޮމިޝަނުގައި އެދިފައިވަނިކޮށްށެވެ. ކްރިމިނަލް ކޯޓުގައި ދެ ގާޒީއަކު އިތުރުކުރަން ނިންމާފައިވާއިރު 10 ގާޒީއަކު ތިއްބަވައެވެ.