ކުރިއަށް މިއޮތް ރައްޔިތުންގެ މަޖިލީހަށް ދިވެހި ރައްޔިތުންގެ ޑިމޮކްރަޓިކް ޕާޓީ އެމްޑީޕީން ހުށަހަޅަނީ ފަސް އަހަރުގެ އެޖެންޑާއެއް ކަމަށާއި އެގޮތުން އެޖެންޑާ19 ގެ މަސައްކަތް ނިމުމުން މިރާއްޖެ ވެގެންދާނީ ފުރިހަމައަށް ތަރައްޤީވެގައިވާ ޤައުމަކަށް ކަމަށް ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ކެމްޕެއިން ހަރަކާތްތައް ރ. މަޑުއްވަރީގައި ފެއްޓުމުގެ ގޮތުން އެރަށުގެ ރައްޔިތުންނާއި ބައްދަލުކުރައްވާ ވާހަކަ ދައްކަވަމުން ރައީސް ނަޝީދު ވިދާޅުވީ، މަޑުއްވަރީ ކައިރީގައި އޮންނަ އުފުލެންދޫގައި ސިނާއީ މަސައްކަތް ކުރުމަށް އެރަށުގެ ރައްޔިތުން ބޭނުންވެފައިވާއިރު، އެމްޑީޕީގެ އެޖެންޑާއާއި އެކު އެއަތޮޅުގައިވާ ހުރިހާ ތަނެއް ބަދަލުވެގެންދާނީ އަތޮޅު ކައުންސިލްތަކުގެ ދަށަށް ކަމަށެވެ.
އުފުލެންދޫއަކީ އެމްއެމްޕީއާރްސީގެ ރިޝްވަތުގެ ތެރޭގައި އޮތް ރަށެއް ކަމަށާއި ނާޖާއިޒު އެތައް ފައިދާތަކެއް ހޯދާފައިވާ އެރަށުގެ މައްސަލަ ތަޙްޤީޤް ކޮށްގެން އެކަން ސާފްވާން އޮތީ މަޖިލީހުގެ ތެރެއިން ކަމަށްވާއިރު، މިހާރު މަޖިލީހުން އެކަން ކުރަން ބޭނުމެއް ނުވާ ކަމަށް ރައީސް ނަޝީދު ވިދާޅުވިއެވެ.
އަދި މިފަދަ ރިޝްވަތާއި ގުޅުން ހުރި މައްސަލަތައް ތަޙްޤީޤްނުކޮށް އެތައް އަހަރަކަށް ދެމިގެންދާން ބޭނުން ނުވާ ކަމަށާއި މިމައްސަލަތައް ވީހާވެސް އަވަހަކަށް ނިންމުމަށް ކުރިއަށް އޮތް މަޖިލީހުގެ އަޣުލަބިއްޔަތު އެމްޑީޕީއަށް ދޭން ޖެހޭ ކަމަށް ވެސް އެމަނިކުފާނު ތަކުރާރުކުރެއްވިއެވެ.
"ރައްޔިތުންގެ މަޖިލީހުގެ އަޣުލަބިއްތު ސަރުކާރަށް ނުލިބި ވާދަވެރި ފަރާތްތަކަށް ލިބިއްޖެ ނަމަ، ދިމާވާނެ އެއްބޮޑު މައްސަލައަކީ ވަޒީރުންގެ މަޖިލީހުގެ މެމްބަރުން ވަޒީރުކަމުގައި ނުހިފެހެއްޓި، އެބޭފުޅުންގެ މައްޗަށް އިތުބާރު ކަމުގެ ވޯޓްނަގަން ފެށުމުން، މުސްތަޤިއްލު މުއްސަސާތަތަކުގެ އިތުބާރު ސަރުކާރަށް ގެއްލި، ސަރުކާރުން އެމުއައްސަސާތަކަށް ދޭން ޖެހޭ އިތުބާރު ކުޑަވެ، ޝަރީއަތުން އިއްވާ ހުކުމްތަކުގައި ސިޔާސީ ކުލަވަރު ޖެހި، އާޚިރު ނަތީޖާ އަކަށް ވެގެން ދަނީ ސިފައިންނާއި ފުލުހުންނަށް ވެސް ސަރުކާރުގެ މައްޗަށް އޮންނަ އިތުބާރު ގެއްލި، ރިޝްވަތުގެ ހުތުރު ފާއިސާ ނިކުމެ ބަޣާވާތަކަށް މަގުފަހުވެގެންދާނެ" ރައީސް ނަޝީދު ވިދާޅުވިއެވެ.
ބަޢާވާތުން ވެރިކަން ބަދަލު ނުކުރުމަށް އެމްޑީޕީއަށް އަޣުލަބިއްޔަތު ދޭން ޖެހޭކަން ފާހަގަ ކުރައްވަމުން، ރައީސް ނަޝީދު ވިދާޅުވީ އެޖެންޑާ 19 ފުރިހަމަ ކޮށްދޭ އެއް ކަމަކީ ވަޒީފާގެ ފުރުޞަތު ކަމަށެވެ.
އެގޮތުން އެންމެ ކުޑަ އުޖޫރަ ކަނޑައެޅުމުން ދިވެހިންނަށް ލިބޭ މުސާރަ ބޮޑުވެގެންދާނެ ކަމަށާއި، ވަޒީފާއެއް ހޯދަން ބޭނުންވާ މީހުންނަށް ކައުންސިލްގައި އޮންނަ ދަފްތަރުގައި ރަޖިސްޓްރީ ކުރުމުން ކައިރި ހިސާބުތަކުން އެމީހަކަށް ވަޒީފާ ލިބޭނެ ފުރުޞަތު ހުޅުވިގެންދާއިރު، މިބަދަލު ޤާނޫނަކަށް ހެދުމަށް އެމްޑީޕީން ކުރިއަށް އޮތް މަޖިލީހުގައި މަސައްކަތް ކުރައްވާނެ ކަމަށްވެސް ރައީސް ނަޝީދު ވިދާޅުވިއެވެ.
އަނިޔާވެރިކަން މިދަނީ މިގައުމުން ފޮހެވިގެން ކަމަށާއި އިންސާފް ޤާއިމްވެގެންދާތަން ފެންނަމުންދާއިރު، އެޖެންޑާ 19 އަކީ ތަރައްޤީއަށް އޮތް ވަސީލަތެއް ކަމަށް ރައީސް ނަޝީދު ވިދާޅުވިއެވެ.
