ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރުން ފެށި ސްޓޭޓް އޯންޑް އެންޓަޕްރައިޒަސް އެސިސްޓަންޓްސް (އެސްއޯއީ) ޕްރޮގްރާމުގެ ދަށުން ސަރުކާރު ކުންފުނިތަކުން ކްލަބްތަކަށް ދެމުން އައި ފައިސާ މި އަހަރު ލިބޭނެކަމުގެ ޔަގީންކަން ނެތުމުން، އެފްއޭއެމުން ކްލަބް އެހީތެރިކަން ފޯރުކޮށްދިނުމަށް ނިންމައިފިއެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، އެސްއޯއީގެ ދަށުން ކްލަބްތަކަށް ފައިސާ ދިނުމާ ގުޅޭގޮތުން މިހާރުގެ ސަރުކާރާ މަޝްވަރާ ކުރެވުނު ކަމަށާއި، ނަމަވެސް މިއަދާ ހަމައަށް ވެސް އެކަމުގައި އެދެވޭ ޖަވާބެއް ލިބިފައިނުވާ ކަމަށެވެ.

އެގޮތުން ބައްސާމް ވިދާޅުވީ، ކްލަބްތަކަށް އެހީވާން އެފްއޭއެމުން ނިންމީ ސަރުކާރާއެކު ކުރި މަޝްވަރާއަށް އެއްބާރުލުން ނުލިބިގެން ކަމަށާއި، ކްލަބްތަކަށް އެހީވުމަކީ އެފްއޭއެމްގެ ޒިންމާއެއް ކަމަށެވެ.

ކްލަބްތަކަށް ދޭން ނިންމާފައިވާ ފައިސާގެ އަދަދު މި މަހުގެ 25 ވަނަ ދުވަހު އޮންނަ އެފްއޭއެމްގެ ކޮންގްރެސްގައި ހުށަހަޅާ ބަޖެޓުގައި ހިމަނާނެ ކަމަށް ވެސް ބައްސާމް ވަނީ ވިދާޅުވެފައެވެ.

ނަމަވެސް ކްލަބްތަކަށް ދޭނެ ފައިސާގެ އަދަދު ބައްސާމް ހާމަކުރައްވާފައިނުވާއިރު، ބަޖެޓް ފާސްކުރެވުމާއެކު އެ ފައިސާ ދޫކުރާނެ ކަމަށް ބައްސާމް ވަނީ ވިދާޅުވެފައެވެ.

މިދިޔަ ސަރުކާރުން 2017 ވަނަ އަހަރުން ފެށިގެން ކުންފުނިތައް މެދުވެރިކޮށް ފުރަތަމަ ޑިވިޝަންގައި ވާދަކުރާ ޓީމުތަކުގެ ތެރެއިން ކޮންމެ ޓީމަކަށް ދެ މިލިއަން ރުފިޔާ ދީފައިވާއިރު، ދިވެހި ޕްރިމިއާ ލީގަށް ހޮވިއްޖެނަމަ އިތުރު އެއް މިލިއަން ރުފިޔާ ވަނީ ދީފައެވެ.

އެސްއޯއީގެ ތެރެއިން ސަރުކާރު ހިއްސާވާ 12 ކުންފުނި މެދުވެރިކޮށް 26 މިލިއަން ރުފިޔާ އަހަރަކު ފުޓްބޯޅަ އަށް ހަރަދުކުރާ ގޮތަށް އެއްބަސްވުމުގައި އޮންނައިރު، އޭގެން ގިނަ ކްލަބްތަކަށް އެންމެ އެކަށީގެންވާ ފައިދާތަކެއް ނުކުރެއެވެ. އަދި ގިނަ ކްލަބްތަކެއް އޮތީ މާލީ ގޮތުން އަޑިއަޅާލާފައެވެ.

މި އަހަރުގެ ފުޓުބޯޅަ ސީޒަން ފެށުމަށް ހަމަޖެހިފައިވަނީ ޖޫން މަހުއެވެ. އެގޮތުން ކްލަބްތަކުން މިހާރުއްސުރެ އަންނަނީ ސީޒަނަށް ތައްޔާރުވުމަށް ބަޖެޓް ހޯދުމުގެ މަސައްކަތް ކުރަމުންނެވެ.