"ރައީސް ނަޝީދަކީ ރައީސް ނަޝީދު، އެލެކްސް އަކީ އެލެކްސް" މިއީ ކުރީގެ ރައީސް މުހައްމަދު ނަޝީދުގެ ރަސްމީ ޓްވިޓަރ އެކައުންޓުގެ އިތުރުން އެހެން ޓްވިޓަރ އެކައުންޓެއް ގެންގުޅުއްވަންތޯ ކުރި ސުވާލަށް އެމަނިކުފާނު ދެއްވި ޖަވާބެވެ.
ބުރާސްފަތި ދުވަހު ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަ ދައްކަވަމުން ނަޝީދު ވަނީ "އެލެކްސް އަހުމަދު" ނަމަކަށް ކިޔާ ޓްވިޓަރ އެކައުންޓުގެ ބެހޭގޮތުންް ވާހަކަފުޅު ދައްކަވާފައެވެ.
ތޭރަ ހާސް ހަތްސަތޭކަ މީހުންނަށް ވުރެ ގިނަ މީހުން ފޮލޯކުރާ އެ އެކައުންޓަކީ ސީދާ އެމަނިކުފާނުގެ އެކައުންޓެއްތޯ ކުރި ސުވާލަށް ސީދާ ޖަވާބެއް ދެއްވާފައިނުވި ނަމަވެސް އެމަނިކުފާނު އެކަން ދޮގުކުރައްވާފައެއް ވެސް ނުވެއެވެ. އެގޮތުން އެމަނިކުފާނު ވިދާޅުވީ، އެލެކްސް ފުރަތަމަ އާންމުންނަށް އެނގިގެން ދިޔައީ އެލެކްސްގެ މަންމައަކީ ރައީސް ނަޝީދުގެ އެންމެ ގާތް އެކުވެރިޔާ ކަމަށް ބުނި ހިސާބުން ކަމަށެވެ.
"އެލެކްސް އަކީ 21 އަހަރުގެ ފިރިހެން ކުއްޖެއް. ދެން އޭނާގެ މަންމަގެ ބެސްޓް ފްރެންޑޯ އޭނާ ބުނާގޮތުގަ އަޅުގަނޑަކީ، ރައީސް ނަޝީދަކީ. ދެން އެހެންވީމަ މިގޮތަށް އެލެކްސް އަޅުގަނޑުމެންނަށް ފުރަތަމަ ފާހަގަ ވެގެންދިޔައީ. އޭގެ ފަހުން އަނެއްކާ ކިތަންމެ ފަހަރަކު އެލެކްސް ތި ވިދާޅުވާހެން އެބަހުރި އަމިއްލައަށް ބުނެފަ ތިމަންނާއަކީ މިވެނި މީހެކޭވެސް، ޝައްކު ނުއުފެދޭ ހިސާބަށްވެސް އަޅުގަނޑަށް ހީވަނީ އެލެކްސް އެވާހަކަ ދައްކަމުން ގެންދޭހެން، އިނގޭތޯ؟ " ނަޝީދު ވިދާޅުވިއެވެ.
ނަޝީދު އެހެން ވިދާޅުވެފައިވާއިރު، އެމަނިކުފާނާއި އަނބިކަނބަލުން ރާއްޖެ ވަޑައިގަތް ދުވަހު އަނބިކަނބަލުން ކަރުގައި އޮތް ފަށުފުލުގެ ފޮޓޯވެސް ފުރަތަމަ ޓްވީޓް ކޮށްފައިވަނީ އެ އެކައުންޓުންނެވެ. އެތައް ފަހަރަކު އެ އެކައުންޓުން ރައީސް ނަޝީދުގެ ނަމުގައި ޓްވީޓް ކުރައްވާފައިވާ ކަމަށް ބައެއް ފަރާތްތަކުން ބުނެއެވެ. އެގޮތުން ދަރިކަނބަލުންގެ ޓްވީޓުތަކުގެ ބަހުރުވަ ރަނގަޅުކުރުމަށްވެސް އެ އެެކައުންޓުން ޓްވީޓް ކުރައްވާފައި ހުރި ކަމަށް ބައެއް ފަރާތްތަކުން ބުނެއެވެ.
Kalo magey dhon dhoonya mulhin filihey; Kalo kosheega inumah foohi vaneehey; Kalo ruhey haagothakah hadhaa madheynan; Mi adu ahaa dhon dhoonya annan ulheyshey pic.twitter.com/mNLC8VO0S6
— Alex Ahmed (@anedhivehirajje) November 1, 2018
ޕްރޮފައިލަށް ރައީސް ނަޝީދާ ގުޅޭ ގޮތުން ހަދާފައިވާ އައިލެންޑް ޕްރެޒިޑެންޓްގައި ދައްކާ ޖަލު ގޮޅީގެ ފޮޓޯ ލާފައިވާ އެލެކްސް އަހުމަދަކީ ރައީސް ނަޝީދު ނޫންތޯ ކުރި ސުވާލަށް ނުސީދާ ޖަވާބެއް ދެއްވަމުން އެމަނިކުފާނު ވިދާޅުވީ، އެމަނިކުފާނަކީ ހިޔާލީ ވާހަކަ ލިއެ އުޅުއްވާ ބޭފުޅެއް ކަމަށާއި، "ހަސަން ކުރުސީ" ކިޔާ ވާހަކަ ސީރީޒެއް އެމަނިކުފާނު ލިއުއްވާ ކަމަށެވެ.
"އެއްސެވީ އެލެކްސްގެ ވާހަކަ. ދެން ރިއަލިސްޓިކް ފެކްޝަން، ނުވަތަ ހަޤީޤީ ހިޔާލު، އެއީ އަޅުގަނޑަށް ފެންނަ ފެނުމުގައި އެކި ކަންކަން ދެނެގަތުމަށް. މިހާރު އަޅުގަނޑުމެން މި އުފައްދަނީ ޝަހުޝެއް. ހިޔާލީ ޝަހުޝެއް. އުފައްދާފައި އެ ޝަހުޝަށް މިދެނީ ދިރިއުޅުމުގެ ހަޔާތެއް. ދިނީމާ އޭނާ ގޮސް ކުރާ ކަންކަމަކީ ކޮބާތޯ ގަލަމުން މި ފެންނަނީ. އެލިބެނީ ފުރުސަތެއް ހަޔާތެއް އެކީގަ ހޯދަން،" ނަޝީދު ވިދާޅުވިއެވެ.
ނަޝީދު ވިދާޅުވީ، އެމަނިކުފާނަކީ ހަމައެކަނި ސިޔާސީ ކަންކަން ކުރައްވާ ބޭފުޅެއް ނޫން ކަމަށާއި، ސިޔާސީ މަސައްކަތާއި ލިއުމުގެ މަސައްކަތް އެއީ ތަފާތު ކަމެއް ކަމަށެވެ. އެގޮތުން އެލެކްސް އަކީ އެމަނިކުފާނު ލިއުއްވި ފޮތުގައި އުޅޭ "ހަސަން ކުރުސީގެ" ހަގު ކޮއްކޮ ކަމަށްވެސް ވެދާނެ ކަމަށް ސަމާސާ ރާގެއްގައި އެމަނިކުފާނު ވިދާޅުވެފައިވެއެވެ.
އެހެންވެ ހަގީގަތުގައި އެލެކްސް އަކީ ކާކުތޯ މި ވަނީ ސުވާލު އުފެދިފަ އެވެ.
