ސަލްމާން ޚާން އާއި ކެޓްރީނާ ކެއިފް އެކުގައި ބަލަން ކެތްމަދުވެފައި ތިބި މީހުންނަށް "ބާރަތު"ގެ ފުރަތަމަ ޓީޒާ ވަރަށް އަވަހަށް ފެނިގެން ދާނެއެވެ.
"ބާރަތު"ގެ ޓީޒާ ރިލީޒް ކުރަން އުޅޭކަން ހާމަކޮށްފައި ވަނީ ފިލްމްގެ ޕްރޮޑިއުސަރ އަތުލް އަގްނިހޯތްރީ ޓްވިޓާގައި ހިއްސާކޮށްފައިވާ ވީޑިއޯގައެވެ. އެ ވީޑިއޯގެ ކެޕްޝަންގައި ލިޔެފައި ވަނީ "ކަމިން ސޫން"އެވެ.
އަލީ އައްބާސް ޒަފަރު ޑައިރެކްޓް ކުރާ އެ ފިލްމްގައި ސަލްމާން އާއި ކެޓްރީނާގެ އިތުރުން ސުނިލް ގްރޯވާ، ދިޝާ ޕަޓާނީ، ނޯރާ ފެތޭހީ އަދި ތައްބޫ ފެނިގެންދާނެއެވެ. މި ފިލްމުގެ ޝޫޓިންތައް ކުރިއަށް ގެންގޮސްފައި ވަނީ ޑުބާއީ، ޕުންޖާބު އަދި ދިއްލީގައެވެ.
އެ ފިލްމްގެ ބަތަލާގެ ރޯލު ކުޅުމަށް ފުރަތަމަ ހަމަޖައްސާފައި ވަނީ ޕްރިޔަންކާ ޗޯޕްރާއެވެ. ނަމަވެސް އެމެރިކާގެ ލަވަ ކިޔުންތެރިޔާ ނިކް ޖޯނަސް އާއި ކައިވެނި ކުރުމަށް ޕަރިޔަންކާ ވަނީ މި ފިލްމް ދޫކޮށްލާފައެވެ.
ބާރަތް ވެގެންދާނީ 2017 ވަނަ އަހަރު ރިލީޒް ކުރި ބްލޮކްބާސްޓަރ ފިލްމް "ޓައިގާ ޒިންދާހޭ" އަށް ފަހު އަލީ އައްބާސް ޒަފަރުގެ ފިލްމެއްގައި ކެޓްރީނާ އާއި ސަލްމާން އެކުގައި ފެނިގެންދާ ފިލްމަށެވެ. ފިލްމް ރިލީޒް ކުރުމަށް ހަމަޖެހިފައި ވަނީ މި އަހަރު އީދާ ދިމާކޮށެވެ.
