ދިވެހި ރާއްޖޭގައި ކްރިކެޓް ކުރިއެރުވުމުގައި ސްރީ ލަންކާގެ އެހީތެރިކަން ބޭނުންފުޅުވާކަމަށް ރައީސުލްޖުމްހޫރިއްޔާގެ ނައިބް ފައިސަލް ނަސީމް ވިދާޅުވެއްޖެއެވެ.
ކްރިކެޓް ކުރިއެރުވުމަށް ސްރީލަންކާގެ އެހީތެރިކަން ބޭނުންފުޅުވާކަމަށް ނައިބްރައީސް ފައިސަލް ވިދާޅުވީ، ސްރީލަންކާ ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު މޭޖަރ ޖެނެރަލް ރިޓަޔަޑް ބީ. އާރ. ޑަބްލިޔު. އާރ. އޭ. ބީ. ތޮރަޑެނިޔައާއެކު ހޯމަ ދުވަހު ކުރެއްވި ބައްދަލުވުމުގައެވެ.
އެ ބައްދަލުކުރެއްވުމުގައި ނައިބްރައީސް ފައިސަލް ވަނީ ކުޅިވަރުގެ ދާއިރާއިން އިތުރަށް ގުޅުން ބަދަހިކޮށް، ހާއްސަ ގޮތެއްގައި ކްރިކެޓް ކުރިއެރުވުމުގައި ސްރީ ލަންކާގެ އެހީތެރިކަން ބޭނުންފުޅުވާ ކަމަށް ވިދާޅުވެފައެވެ.
މިހާރުގެ ސަރުކާރުން އަންނަނީ ކުޅިވަރަށް ހާއްސަ ސަމާލުމެއްދީ، ކުޅިވަރު ކުރިއެރުވުމަށް ބުރަ މަސައްކަތްތަކެއް ކުރަމުންނެވެ. އެގޮތުން ސަރުކާރުގެ ފުރަތަމަ 100 ދުވަހުގެ ތެރޭގައި ކުޅިވަރު ކުރިއެރުވުމުގެ މުހިންމު ކަންކަންވެސް ވަނީ ހިމަނާފައެވެ.
