ޑާކްރެއިން އެންޓަޓެއިންމަންޓުން އުފައްދާ ފިލްމް "ގޮށްރާޅު" ޓިކެޓް އަންނަ ޖެނުއަރީ މަހު ވިއްކަން ފަށާ ގޮތަށް ހަމަޖައްސައިފިއެވެ.

ފިލްމްގެ އެއް ޕްރޮޑިއުސަރު މުހައްމަދު އަލީ މޮގާ ބުނީ ޓިކެޓް ވިއްކަން ހުންނާނީ އަންނަ ޖެނުއަރީ މަހުގެ ހަތަރު ވަނަ ދުވަހުން ފެށިގެން ކޮންމެ ދުވަހަކު ހެނދުނު 10:00 އިން ފެށިގެން ރޭގަނޑު 10:00 އަށް އޮލިމްޕަހުގައި ކަމަށެވެ. އަދި މި ފިލްމު ޓިކެޓެއްގެ އަގަކީ 100 ރުފިޔާ ކަމަށް މޮގާ ވަނީ ބުނެފައެވެ.

މަގުބޫލު ފިލްމުތައް ނެރެމުން އަންނަ ޕްރޮޑަކްޝަން ހައުސް އިން އުފައްދާ "ގޮށްރާޅު" މި ފިލްމް ރިލީޒް ކުރުމަށް ހަމަޖެހިފައި ވަނީ އަންނަ އަހަރުގެ ފެބްރުއަރީ މަހުގެ ހަތަރު ވަނަ ދުވަހުއެވެ.

ގޮށްރާޅަކީ މުއުމިން ފުއާދުގެ ވާހަކައަކަށް އަހުމަދު ޝިނާން ޑައިރެކްޓްކުރާ ކުރައިމް ތްރީލާއެކެވެ.

މި ފިލްމު ޕްރޮޑިއުސް ކޮށްފައި ވަނީ މޮގާ އާއި އާއިޝަތު ފުވާދު ތައުފީޤެވެ.

ފިލްމުގެ ލީޑް ރޯލަކުން ފެނިގެންދާ ޖުމައްޔިލް ނިމާލް ގެ އިތުރުން މި ފިލްމުން ދެން ފެނިގެން ދާނީ މި ދާއިރާ އަށް އަލަށް ތަޢާރަފްވާ ހަސަން އިރުފާން (ޒަކިއްޓެ)، އާއި ޢައިޝަތު ތަސްނީމާއެވެ. މީގެ އިތުރުން އާމިނަތު ރަޝްފާ، ނުޒުހަތު ޝުޢައިބު (ނުޒޫ)، ޢަބްދުﷲ އަޒާން، ނާޝިތު މުޙައްމަދު އަދި ހަމްދާން ފާރޫޤްގެ އިތުރުން މަރިޔަމް ޝަކީލާ އާއި އިސްމާއިލް ރަޝީދު (ކޮޕީ އިއްސެ) ފެނިގެންދާނެއެވެ.