ރައީސް ޔާމީންގެ ސަރުކާރު އައި ފަހުން ދިވެހިރާއްޖެ އަށް ބޭރުން އައި އާ އިންވެސްޓްމަންޓެއް ނެތް ކަމަށާއި އަލަށް ކުރި ކަމެއް ފެންނަން ނެތް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަލީ ނިޒާރު ވިދާޅުވެއްޖެއެވެ.
ރާއްޖެ ޓީވީން ހުކުރު ދުވަހުގެ ރޭ ގެނެސްދިން "މި ރައީސް" ޕްރޮގްރާމްގައި ވާހަކަ ދައްކަވަމުން އަލީ ނިޒާރު ވިދާޅުވީ ރައީސް ޔާމީންގެ ލިޔެވިފައިވާ ސިޔާސަތެއް ނުވަތަ ތަންފީޒުކުރަން ބޭނުންވާ ސިޔާސަތެއް އޮތް ކަމަށް ފެނިފައި ނުވާ ކަމަށާއި ފެނިގެންދަނީ އެބޭފުޅާ އަމިއްލައަށް ބޭނުންވާހާ ގޮތަކަށް ގައުމު ހިންގަމުންދާ ތަން ކަމަށެވެ.
ރައީސް ޔާމީންގެ ރިޔާސީ ބަޔާނަށް އިޝާރާތް ކުރައްވައި، ނިޒާރު ވިދާޅުވީ ރައީސް ޔާމީންގެ ވޭތުވެދިޔަ ތިން އަހަރު ކަންކޮށްފައިވާ ގޮތަށް ބަލާއިރު އެއީ ހުދުމުޚްތާރު ވެރިއެއް ކަމަށް ކަނޑައަޅަން ޖެހޭ ކަމަށާއި އެހެން ކަމުން ރައްޔިތުންނަށް އެކަށީގެންވާ އުއްމީދީ ވާހަކަތަކެއް ނުދައްކަވާނެ ކަމަށެވެ.
ނިޒާރު ވިދާޅުވީ ރާއްޖޭގައި ކޮރަޕްޝަން ހައްދުފަހަނައަޅާފައިވާއިރު އިޤްތިޞާދާ ބެހޭ ގޮތުން ވާހަކަ ދައްކަވާއިރު ކޮރަޕްޝަނާ ގުޅޭ ގޮތުން އެއްވެސް ވާހަކައެއް ވިދާޅުނުވާ ކަމަށެވެ.
ނިޒާރު ވިދާޅުވީ ކަނޑައެޅިގެން ނުކުރައްވާ ކަންކަމުގެ ވާހަކަ ރިޔާސީ ބަޔާނުގައި ދައްކަވާފައި އެބަހުރި ކަމަށާއި ފްލެޓްތަކާއި، މިހެންހުރި ކަންކަމަށް ބަލާއިރު ރައީސް ޔާމީނަކަށް އާކަމެއް ކުރެއްވިފައި ނުވާ ކަމަށެވެ.
މީގެ އިތުރުން ރައްޔިތުންނަށް އާކަމެއް، އާއުއްމީދުތަކެއް ނުވަތަ ރައްޔިތުންނަށް ވި ފަސޭހައެއް މިފުރަ މާލެއިން ވެސް ފެނިގެން ނުދާ ކަމަށް ނިޒާރު ވިދާޅުވިއެވެ.
ހަތަރު ބިލިއަން ރުފިޔާގެ ލޯނެއް ނެގުމަކީ ކާމިޔާބީއެއް ކަމަށް ރިޔާސީ ބަޔާނުގައި ފާހަގަކުރައްވާއިރު އެއީ އިޤްތިސޯދީ ގޮތުން ލިބުނު ކާމިޔާބީއަކަށް ވާނެތޯ ސުވާލު ކުރައްވުމުން ނިޒާރު ވިދާޅުވީ ރައީސަކަށް ވަޑައިގަތުމަށް ފަހު ގައުމުގެ ތަންތަން ދައްކައިގެން އަދި ޤައުމު ވިއްކާލައިގެން ލޯނު ނެގިދާނެ ކަމަށާއި ބޭންކުތަކުން އޮންނާނީ އެފަދަ ލޯންތައް ދޭން ތައްޔާރަށް ކަމަށެވެ.
"މިރާއްޖޭގައި ހިނގަމުންދިޔަ ރިސޯޓްތައް މިއަދުވެސް ހިނގަމުން އެދަނީ. އާ ދެތިން ރިސޯޓެއް ހުޅުވިދާނެ. އެކަމަކު އެއީކީ ސަރުކާރުން ކުރި ކަންތައްތަކެއް ނޫން. އެއީ އަމިއްލަ ޕްރައިވެޓް އިންވެސްޓަރުން އެމީހުންގެ އަމިއްލަ ވިޔަފާރިން ހުޅުވާފައި ހުރި ރިސޯޓަތައް. އާ ކޮންކަމެއްތޯ ހިނގާ ދިޔައީ. ބޭރުން އައިސް ބަޔަކު އަލަށް ކޮންކަމެއްތޯ އިންވެސްޓް ކުރީ،" ނިޒާރު ވިދާޅުވިއެވެ.
ރައީސް ޔާމީން 2017 ވަނަ އަހަރަށް ހުށަހެޅުއްވި ރިޔާސީ ބަޔާނާ ގުޅޭ ގޮތުން ނިޒާރު ވިދާޅުވީ ރައީސް ޔާމީންގެ އެއްވެސް ސިޔާސަތެއް އެބަޔާނުން އެނގިގެން ނުދިޔަ ކަމަށެވެ.
ނިޒާރު ވިދާޅުވީ ދުނިޔޭގެ އެހެން ހުދުމުޚްތާރު ޤައުމުތަކުގެ ވެރިން ވެސް ކޮންމެއަހަރަކު ރިޔާސީ ބަޔާން ހުށަހަޅުވާ ބީދައިން ރައީސް ޔާމީންވެސް ރިޔާސީ ބަޔާން ހުށަހަޅުއްވާ ކަމަށާއި ވޭތުވެ ދިޔަ ތިން އަހަރުވެސް އެއްވެސް އުއްމީދީ ވާހަކައެއް ރައީސް ޔާމީން ވިދާޅުވެފައި ނުވާ ކަމަށެވެ. އެއަށްވުރެ ބޮޑަށް ރައްޔިތުން ތިބީ މާނިކަމެތި ހާލުގައި ކަމަށާއި ރައްޔިތުންގެ ދިރިއުޅުމުގެ ފެންވަރު އެތައް ގުނައަކުން ދަށަށް ގޮސްފައިވާ ކަމަށް ނިޒާރު ވިދާޅުވިއެވެ.
