ސްޓާ ޕްލަސް އިން ދައްކަމުންދާ ބެލުންތެރިންގެ މެދުގައި މަގްބޫލު އެއް ޑްރާމާ ކަމަށްވާ "އިޝްގްބާޒް" އިން ފެނިގެންދިޔަ ކުނާލް ޖެއިސިންގް (އޯމް ސިންގް އޮބްރޯއި) ކައިވެނި ކޮށްފިއެވެ.
ރިޕޯޓްތައް ބުނާ ގޮތުން މިދިޔަ ބުރާސްފަތި ދުވަހު އޭނާ ކައިވެނި ކޮށްފައިވަނީ ފަސްއަހަރު ވަންދެން ރައްޓެހިވެގެން އުޅުނު ލޯބިވެރިޔާ ބާރަތީ ކުމާރުއާ އެވެ. މި ދެމީހުންގެ ކައިވެނީގެ ހަފްލާ ބާއްވަފައިވަނީ މުމްބާއީގައެވެ. އެންގޭޖް ކޮށްފައިވަނީ މީގެ ދެތިންމަސް ކުރިން މުމްބާއީގައި ހުންނަ ފައްޅިއެއްގައެވެ.
" އިންޑިއާ ޓުޑޭ" ގައި ރިޕޯޓްކޮށްފައިވާ ގޮތުން މި ދެމީހުން ދިމާވެފައިވަނީ ކޮމެޑީ ޑްރާމާއެއް ކަމަށްވާ " ދަ ބަޑީ ޕްރޮޖެކްޓް" ގެ މަސައްކަތް ކުރިއަށް ދިއަ ދުވަސްވަރު އެވެ.
މިދިޔަ ނޮވެންބަރު މަހުން ފެށިގެން އިންޑިއާގެ މަޝްހޫރު ގިނަ ފަންނާނުންތަކެއް ދަނީ ކައިވެނި ކުރަމުންނެވެ. އޭގެ ތެރޭގައި ބޮލީވުޑްގެ ތަރިން ކަމަށްވާ ދިޕިކާ ޕަދުކޯން އާއި ރަންވީރު ސިންގް، ޕަރިޔްނަކާ ޗޯޕްރާ އާއި ނިކް ޖޯނަސް، މަޝްހޫރު ކޮމޭޑިއަން ކަޕިލް ޝަރުމާ އާއި އޭނާގެ ލޯބިވެރިޔާ ގިންނީގެ ކައިވެނި ހިމެނެއެވެ.
