ޕްރިޔަންކާ އާއި އެމެރިކާގެ ލަވަކިޔުންތެރިޔާ ނިކް ޖޯނަސްގެ ކައިވެނި ވަނީ މިމަހުގެ ކުރީކޮޅު ޖޯދްޕޫރުގައި ހުންނަ އުމައިދު ބަވަން ޕެލަސްގައި ކޮށްފައެވެ.
ކައިވެންޏަށްފަހު ޑިސެމްބަރު މަހުގެ 4 ގައި ދިއްލީގައި ކައިވެނީގެ ހަފްލާ އެއް ބާއްވާފައިވާ އިރު މި ހަފްލާގައި އިންޑިއާގެ ބޮޑުވަޒީރު ނަރެންދްރަ މޯދީ ވެސް ބައިވެރިވެފައިވެއެވެ.
މީގެ އިތުރުން މި ދެމަފިރުން ވަނީ ފިލްމް އިންޑަސްޓްރީގައި ހަރާކާތްތެރިވާ ފަރާތްތަކަށް އިތުރު ހަފްލާއެއް ބޭއްވުމަށް ނިންމާފައެވެ. އެ ހަފްލާގެ އިންވިޓޭޝަން ކާޑް ވަނީ އިންޓަނެޓްގައި ދައުރުވާން ފަށާފައެވެ. އެ ކާޑު ތައްޔާރުކޮށްފައި ވަނީ އޮފް ވައިޓް ގަނޑެއްގައެވެ. ކާޑުގައި ރަން ކުލައިން ލިޔެފައިވާއިރު ލިޔުންކޮޅުގެ މަތީގައި ވަނީ ރަތް ކުލައިގެ ތިލަކް އެއް ޖަހާފައެވެ.
މި ހަފްލާ ބޭއްވުމަށް ހަމަޖެހފައި ވަނީ މިހިނގާ ޑިސެމްބަރު މަހުގެ 20 ވަނަ ދުވަހު ތާޖް ލޭންޑް އެންޑްގެ ބޯލްރޫމްގައެވެ.
ޕްރިޔަންކާ އާއި ނިކްގެ ކައިވެނި ކޮށްފައި ވަނީ މި ޑިސެމްބަރު މަހުގެ ފުރަތަމަ ދެދުވަހުއެވެ. މި ދެމީހުންގެ ކައިވެނި ވަނީ ކްރިސްޓިއަން އަދި ހިންދޫ ސަގާފަތާއި އެއްގޮތަށް ކޮށްފައެވެ. ހިންދޫ ވެޑިންގައި ޕްރިޔަންކާ ލާފައިވަނީ ރަތް ކުލައިގެ ލެހެންގާއެކެވެ. މި ދެމަފިރިން ދާދިފަހުން އޮމާން އަށް ހަނީމޫނަށް ގޮސް ނަގާފައިވާ ފޮޓޯތައް ވަނީ އިންސްޓަގްރާމްގައި ހިއްސާކޮށްފައެވެ.
