އިންޑިއާގެ މަހުޖަނެއް ކަމަށްވާ މުކޭޝް އަންބާނީގެ އަންހެން ދަރިފުޅު އިޝާ އަންބާނީގެ ކައިވެނީގެ ސަންގީތް ހަފްލާގައި އެމެރިކާގެ ޕޮޕް ލަވަކިއުންތެރިޔާ ބިޔޯންސޭ އާއި ބޮލީވުޑްގެ ގިނަ ތަރިން ޕާރފޯމް ކޮށްފިއެވެ.
އާދިއްތަ ދުވަހުގެ ރޭ އުދައިޕޫރުގައި ކުރިއަށް ދިޔަ މި ހަފްލާއަށް ބިޔޯންސޭ ގޮސްފައި ވަނީ އިންޑިއާ ވަންތަ ރަތްކުލައިގެ ހެދުމެއްގައެވެ.
ބިޔޯންސޭ ވަނީ އޭނާގެ އިންސްޓަގްރާމުގައި އަބޫޖާނީ ސަންދީޕް ހޯސްލާ ފަރުމާ ކޮށްފައިވާ މި ހެދުމުގައި ނަގާފައިވާ ފޮޓޯތައް ހިއްސާކޮށްފައެވެ.
ބައެއް ފޮޓޯތަކުގައި ރަތްކުލައިގެ ހެދުމާއި އެކު ބޭނުން ކޮށްފައިވާ ރަން ކުލައިގެ ގަހަނާތައް ފެނިގެން ދެއެވެ.
ފޮޓޯތަކުގެ އިތުރުން ބިޔޯންސޭ ވަނީ އޭނާގެ އިންސްޓަގްރާމުގައި ސަންގީތް ހަފްލާގައި ޕާރފޯމް ކުރަނިކޮށް ނަގާފައިވާ ކުރު ވީޑިއޯއެއް ވެސް ހިއްސާކޮށްފައެވެ. އެ ވީޑިއޯގައި ބިޔޯންސޭ ފެނިގެން ދަނީ ރަން ކުލައިގެ ހެދުމެއްގައެވެ. ބިޔޯންސޭގެ އިތުރުން ވެސް ގިނަ ސެލެބްރިޓީން ވަނީ މި ހަފްލާގައި ބައިވެރި ވެފައެވެ. މީގެ އިތުރުން މި ހަފްލާއަށް ދިޔަ ޕަބްލިކް ފިގާއިންގެ ތެރޭގައި ހިލަރީ ކްލިންޓަން ހިމެނެއެވެ.
ދާދި ފަހުން ކައިވެނި ކުރި ޕްރިޔަންކާ އާއި ނިކް ޖޯނަސްގެ ކައިވެނީގެ ހަފްލާއަށް ވަނީ އަމްބާނީގެ އާއިލާ ގޮސްފައެވެ. އަދި އިޝާ ވަނީ އެ ވެޑިންގައި ބްރައިޑްސްމެއިޑް އަކަށް ވެފައެވެ.
މީގެ އިތުރުން ދިޕިކާ ޕަދުކޯން އާއި ރަންވީރު ސިންގްގެ ވެޑިން ރިސެޕްޝަނަށް ވެސް އަމްބާނީގެ އާއިލާ ވަނީ ގޮސްފައެވެ.
އުދައިފޫރުގައި މިދިޔަ ހަފްތާ ބަންދާއި ދިމާކޮށް ދެ ދުވަހަށް ކުރިއަށް ދިޔަ މި ސަންގީތް ހަފްލާގައި ޝާހުރުކް ޚާން، ސަލްމާން ޚާން، އާމިރު ޚާން، އައިޝަވަރިޔާ ރާއީ ބައްޗަންގެ އިތުރުން ވެސް ބޮލީވުޑްގެ ގިނަ ފަންނާނުން ވަނީ ޕާރފޯމް ކޮށްފައެވެ.
އިޝާގެ ކައިވެނި ކުރުމަށް ހަމަޖެހިފައިވަނީ މިހިނގާ ޑިސެމްބަރު މަހުގެ 12 ވަނަ ދުވަހު މުމްބާއީގައި ހުންނަ އަމްބާނީ ރެޒިޑެންސްގަ އެވެ.
