ބޮލީވުޑްގެ ތަރިންގެ ތެރެއިން މިވަގުތު އެންމެ ބިޒީ އެއް ތަރިއަކީ ރަންވީރު ސިންގުއެވެ. މި ހިނގާ ނޮވެމްބަރު މަހުގެ 14 އަދި 15ގައި ދިޕިކާ ޕަދުކޯން އާއި އިޓަލީގެ ލޭކް ކޯމޯގައި ކައިވެނި ކުރުމަށްފަހު އޭނާ އެނބުރި ވަނީމުމްބާއީ އަށް ގޮސްފައެވެ.

އެދެމަފިރިންގެ ކައިވެނީގެ ތިން ހަފްލާ އިންޑިއާގައި ބޭއްވުމަށް ހަމަޖެހިފައިވާއިރު ފުރަތަމަ ހަފްލާ ވަނީ މި މަހުގެ 24ގައި ދިޕިކާގެ އުފަން ރަށް ބެންގަލޫރުގައި ބާއްވާފައެވެ.

އަދި ދެ ވަނަ ހަފްލާ ނޮވެމްބަރު 28 ގައި މީޑިއާއަށް ދިނުމަށް ހަމަޖެހިފައިވާއިރު ތިން ވަނަ ހަފްލާ ޑިސެމްބަރު މަހުގެ އެއް ވަނަ ދުވަހު ބޮލީވުޑްގެ ފަންނާނުންނަށް ދިނުމަށް ވަނީ ހަމަޖެހިފައެވެ.

ކައިވެނީގެ ހަފްލާތައް ކުރިއަށް ރޭވިފައި އޮތް ނަމަވެސް ރަންވީރު ވަނީ އޭނާގެ މަސައްކަތްތަކަށް ވަގުތު ހުސްކޮށްފައެވެ.

ރަންވީރުގެ ދެން އަންނަން އޮތް ފިލްމަކީ ރޮހިތް ޝެޓީ ޑާއިރެކްޓް ކުރާ ފިލްމް "ސިމްބާ" އެވެ. އަންނަ ޑިސެމްބަރު މަހުގެ 28 ގައި ރިލީޒް ކުރާ މި ފިލްމް ރިލީޒް ކުރަން މަހަކާއި ގާތްވެފައިވާއިރު ރަންވީރު ވަނީ އޭފިލްމްގެ ޑަބިންއަށް ވަގުތު ހުސްކޮށްފައެވެ.

 ރަންވީރުގެ ފޭން ޕޭޖުން ޝެއަރ ކޮށްފައިވާ ފޮޓޯތަކުން ފެނިގެންދަނީ ޑަބިންގެ މަސައްކަތުގައި އޭނާ ވައިއާރިއެފް ސްޓޫޑިއޯގައި ހުއްޓައެވެ.

ސިމްބާގައި ރަންވީރު ފެނިގެންދާނީ ބޮލީވުޑަށް އަލަށް ތަޢާރަފްވާ ސައިފް އަލި ޚާންގެ ދަރިފުޅު ސާރާ އަލި ޚާން އާއި އެކުގައެވެ.

މި ފިލްމްގައި ރަންވީރު ފެނިގެން ދަނީ ފުލުހެއްގެ ރޯލުންނެވެ. އަދި އެނާ ބޮޑަށް ވައްތަރު ވެގެންދަނީ ސަލްމާން ޚާން " ދަބަންގް" ގައި ކުޅެފައިވާ ޗުލްބުލް ޕާންޑޭ ގެ ކެރެކްޓަރ އާއި އެވެ.