ޝާހުރުކް ޚާންގެ އުފަންދުވަހު އޭނާގެ އަންނަން އޮތް ފިލްމް "ޒީރޯ"ގެ ޓްރެއިލާ ރިލީޒް ކުރުމުން އެ ޓްރެއިލާއަށް ވަނީ ބެލުންތެރިންގެ ފަރާތުން ބޮޑު ތަރުހީބެއް ލިބިގެން ގޮސްފައެވެ.

ނަމަވެސް  ހޯމަދުވަހު ދިއްލީ ސިކް ގުރުދްވާރާ މެނޭޖްމަންޓް ކޮމިޓީ (ޑީއެސްޖީއެމްސީ) ގެ ފަރާތުން  އެ ކޮމިޓީގެ ޖެނެރަލް ސެކްރެޓަރީ މަންޖިންދަރު ސިންގް ސިސްރާ ސިކުންގެ ކޮމިއުނިޓީއަށް އިހުތިރާމު ކުޑަވާ ކަހަލަ މަންޒަރުތައް ހިމަނާފައިވާ ކަމަށް ބުނެ އެފިލްމާއި ދެކޮޅަށް ފުލުހުންނަށް ވަނީ މައްސަލަ ހުށަހަޅާފައެވެ.

ޑީއެސްޖީއެމްސީ އިން ހުށަހެޅި މައްސަލާގައި ބުނެފައިވަނީ  ފިލްމުގެ ޕޯސްޓަރުގައި ވަރަށް ނިކަމެތި މީހެއްގެ ހެދުމުގައި ޝާހްރުކް ފެންނައިރު އިރު އޭނާގެ އަތުގައި ސިކުންގެ ހަށިރައްކަލަކަށް އާންމުކޮށް ގެންގުޅޭ ހަތިޔާރެއް ކަމަށްވާ ކިރްޕާން އެއް  އޮންނަ ތަން ދައްކުވައިދޭ ކަމަށެވެ.  މީގެ އިތުރުން "ޒީރޯ" ގެ ޓްރެއިލާގައި ވެސް ސިކުންގެ ކޮމިއުނިޓީ އަށް އިހްތިރާމް ކުޑަވާކަލަހަ މަންޒަރުތައް ހިމަނާފައިވާ ކަމަށެވެ.

އެކަމާއި ގުޅިގެން މި ފިލްމް އުފައްދާ ފަރާތްތަކުން ނެރެފައިވާ އޮފިޝަލް ސްޓޭޓްމަންޓްގައި ބުނެފައި ވަނީ އެފިލްމްގައި އެއްވެސް ދީނަކަށް އިހްތިރާމް ކުޑަވާކަހަލަ މަންޒަރުތަކެއް ހިމަނާފައި ނުވާނެ ކަމަށެވެ.

އަދި ޝާހުރުކް ގެ އަތުގައި އޮތީ ކިރްޕާން އެއް ނޫން އެއީ ޑެގާ އެއް ކަމަށެވެ. އާނަންދް އެލް ރާއީ ޑައިރެކްޓް ކުރާ މި ފިލްމްގައި ރިލީޒް ކުރުމަށް ހަމަޖެހިފައި ވަނީ ޑިސެމްބަރު 21 ގައެވެ.

 މި ފިލްމްގައި ޝާހުރުކް ޚާން އާއި އެކު ލީޑްރޯލުން ފެނިގެންދަނީ އަނުޝްކާ ޝަރްމާ އާއި ކެޓްރީނާ ކެއިފް އެވެ.