ބޮލީވުޑުގެ ފަހުގެ ތާރީހުގައި އެއް ފަހަރާއި އެންމެ ގިނަ ސިޓީގައި ޓްރެއިލާ ލޯންޗިން ބޭއްވި ފިލްމަށް 'ލަވްރަތްރީ' ވެއްޖެއެވެ.
ސަލްމާން ޚާންގެ ފިލްމު ޕްރޮޑަކްޓަޝަނުން އުފައްދާ މިފިލްމުގެ ޓްރެއިލާ އިންޑިޔާގެ 10 ސިޓީއެއްގައި އެއްފަހަރާ ވަނީ ލޯންޗްކޮށްފައެވެ.
އެގޮތުން ޓްރެއިލާ ލޯންޗިންއަށް ފަހު މަދު ވަގުތުކޮޅެއްގެ ތެރޭގައި ގިނަ ބަޔަކު ވަނީ ޓްރެއިލާ ބަލާފައެވެ. އަދި ބެލުންތެރިންގެ ތަރުހީބުވެސް ދަނީ ލިބެމުންނެވެ.
މިފިލްމުގެ ލީޑްރޯލުން ފެނިގެންދާނީ އާޔުޝް ޝަރުމާ އާއި ވަރީނާ ހުސެއިންއެވެ. ސަލްމާން ޚާންއާއި އެކު އަލަށް ބޮލީވުޑަށް ތަޢާރަފްވާ މި ދެތަރިންވެސް ވަނީ ލޯންޗިން އިވެންޓްގައި ބައިވެރިވެފައެވެ.
ނިރެން ބަޓް ލިޔެފައިވާ ވާހަކައެއްގެ މައްޗަށް އުފައްދާ މިފިލްމު ޑައިރެކްޓްކޮށްފައިވަނީ އަބިރާޖް މިނަވާލާއެވެ. މިއީ އަބިރާޖް ޑައިރެކްޓްކުރާ ފުރަތަމަ ފިލްމުވެސްމެވެ.
އަސަރުގަދަ ލޯބީގެ މިފިލްމު ރިލީޒް ކުރުމަށް ތައްޔާރުވަމުންދަނި އޮކްޓޯބަރ 5، 2018 ގައެވެ.
