ސިނަމާލެ އާއި މާލޭހިޔާ އަދި ވިލިމާލޭގައި ހުންނަ ފްލެޓްތައް ބެހެއްޓުމުގައި ސިޓީ ކައުންސިލުން އިހްމާލުވެފައިވާ ކަމަށް ތަހުމަތުކޮށް ހައުސިން މިނިސްޓަރު ޑރ މުހައްމަދު މުއިއްޒު ދެއްކެވި ވާހަކަތައް މާލޭ ސިޓީ ކައުންސިލުން ދޮގުކޮށްފި އެވެ.
މާލޭ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި މާލޭގެ މޭޔަރު ޝިފާ މުހައްމަދު ވިދާޅުވީ، މާލެހިޔާ, ސިނަމާލެ ފްލެޓްތަކުގައި ދިރިއުޅޭ ރައްޔިތުންނަށް ވަރަށް އޮޅޭ ގޮތަށް ހައުސިން މިނިސްޓަރު ވަރަށް ބޮޑެތި އިލްޒާމްތަކެއް އަޅުވާފައިވާ ކަމަށާއި، ސިޓީ ކައުންސިލަށް ދައުވާ ކުރުމުގެ ޖާގައޮތް ނަމަ ހައުސިން މިނިސްޓަރުގެ މައްޗަށް ދައުވާ އުފުލާނެ ކަމަށެވެ.
މޭޔަރު ޝިފާ ވިދާޅުވީ ފްލެޓްތައް ބާވެ ހަލާކުވަންދެން ވީރާނާވާން ދޫކޮށްނުލާ ކަމަށާއި، އިމާރާތް މަރާމާތުކޮށް ބެލެހެއްޓުމުގެ ކަންތައްތައް ބަޖެޓުން ޖާގަދިން މިންވަރަކުން އަމިއްލަ ގޮތުން ފައިސާ ހޯދައިގެން ކުރަމުން ކަމަށެވެ. މަރާމާތުކުރުމަށް އެކަށީގެންވާ ފައިސާ ސަރުކާރުން ނުދޭ ކަމަށާއި، އެފައިސާ ހޯދުމަށް ހައުސިން މިނިސްޓްރީއާއި، ފިނޭންސް މިނިސްޓްރީއަށް ތަކުރާރުކޮށް އެދުނު ނަމަވެސް މިހާތަނަށް ޖަވާބު ދީފައި ނުވާ ކަމަށެވެ.
" އަޅުގަނޑުމެން މިއަހަރުގެ ބަޖެޓްގައި ކޯޑު 226 ގަ އަޅުގަނޑުމެން ހިމެނިން މީހުން ދިރިއުޅޭ ތަންތަން ބެލެހެއްޓުމާއި މަރާމާތް ކުރުމަށްޓަކައި އެއްމިލިއަން ރުފިޔާއަށް. އެދުނީމާ އަޅުގަނޑުމެންނަށް ބަޖެޓް ލިބުނުއިރު އޭގައި އިންނަނީ ހުސް ރޮގެއް ދަމާލާފައި. މާނައަކީ އެބަޖެޓް ކޯޑަކުން ވެސް ފައިސާއެއް ނެތް. މާނައަކީ އަޅުގަނޑުމެން މަރާމާތު ކުރުމަށްޓަކައި އެދުނީމަ އެއްމިލިއަން ރުފިޔާ ނުދެވޭނޭ. ވިއްސާރަ މޫސުން އައުމުގެ މާކުރީގައި އަޅުގަނޑުމެން އެދެފިން އެތަނުގެ ފުރާޅުތައް ބާވެ ދަބަރު ޖަހައިގެން ފައިސާ އިތުރަށް ދެއްވާށޭ. ހަމައެކަނި ދެލައްކަ ފަންސާސްހާސް ރުފިޔާ ނަމަވެސް ދެއްވާށޭ. ނަމަވެސް ފިނޭންސް މިނިސްޓްރީން އިޖާބައެއް ނުދެއްވާ. " ޝިފާ ވިދާޅުވި އެވެ.
ޝިފާ ވިދާޅުވީ މާލެހިޔާއާ ސިނަމާލެ ފްލެޓްތަކުގެ ހާލަތު ދެރަކަމުން ސާރވޭއެއް ކުރުމަށް ހައުސިން މިނިސްޓްރީގައި އެދުނު ކަމަށާއި، ނަމަވެސް އެކަމަށް ވެސް އިޖާބަ ނުދެއްވި ކަމަށެވެ. ސިޓީ ކައުންސިލުން ސާރވޭ ކުރިއަށް ގެންދިއުމަށް ފައިސާ ހޯދުމަށް ފިނޭންސް މިނިސްޓްރީގައި އެދުނުކަން ފާހަގަކުރައްވައި ޝިފާ ވިދާޅުވީ އެފައިސާއެއް ބަޖެޓުން ހަމަޖައްސައިނުދޭ ކަމަށެވެ.
ފުލެޓްތަކުގެ ކުލި ނުދައްކާ ފަރާތްތަކަށް އެއްފަހަރާ ކުލި ދައްކަން އަންގާފައިވާ ކަމަށް ބުނާ މައްސަލައަށް އިޝާރާތް ކުރައްވަމުން ޝިފާ ވިދާޅުވީ އެއްފަހަރާ ކުލި ދައްކަން އަންގާފައި ނުވާ ކަމަށާއި، ކައުންސިލަށް އެމީހުން ހުށަހަޅާ ގޮތަކަށް ބަހާލައިގެން ފައިސާ ދެއްކޭނެ އިންތިޒާމް ހަމަޖައްސައިދީފައިވާ ކަމަށެވެ.
މާލޭގެ ރައްޔިތުންނާއި މާލޭގައި ދިރިއުޅޭ ރަށްރަށުގެ މީހުން ދަފްތަރުގައި ރަޖިސްޓްރީވުމަށް އަލުން ފުރުސަތު ހުޅުވާލާފައިވާ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެފައިވާތީ ކަންބޮޑުވުންފާޅު ކުރައްވާ މާލޭގެ ޑެޕިއުޓީ މޭޔަރު ޝަމާއު ޝަރީފް ވިދާޅުވީ ދަފްތަރަކީ އަލަށް ފަށައިގެން އުޅޭ ކަމެއްނޫން ކަމަށާއި، މިހާރު ހުއްޓާލާފައި އޮތް ކަމެއް ނޫން ކަމަށެވެ. ދަފްތަރަކީ މާކުރީގައި ގަވާއިދު ހެދިގެން ކުރިއަށްދާ ކަމެއް ކަމަށާއި، އަލުން އެކަމަށް ހުޅުވާލަން ނުޖެހޭ ކަމަށެވެ.
" ދަފްތަރުގައި އޮވޭ ދެވައްތަރެއް. ވަރަށް ކުރީގައި އެބައޮތް 1987 އަކުން ފެށިގެން ކުރިއަށް ދިޔަ ދަފްތަރެއް އެބައޮތް ޚާއްސަ ދަފްތަރު ކިޔާ އެއްޗެއް. އޭގައި މިއަދާ ހަމައަށް ތިބީ 3264 މީހުން. އަތޮޅުތަކުން މާލެއަށް ރަށްވެހިކަން ބަދަލުކުރި މީހުން އެކަން ފެއްޓިފައި މިއޮތީ 17 ޖުލައި 1994ގައި މިއަދާ ހަމައަށް ރަޖިސްޓްރީ ކޮށްފައި އޮތީ 12000 ވުރެ ގިނަ މީހުން ރަޖިސްޓްރީ ކޮށްފަ " ޝަމާއު ވިދާޅުވި އެވެ.
ޝަމާއު ވިދާޅުވީ ރިޔާސީ އިންތިހާބު ކުރިމަތިވެފައި އޮއްވައި އަލުން ރަޖިސްޓްރީ ހުޅުވައިލާ ވާހަކަ ވިދާޅުވުމަކީ ވަރަށް ބޮޑު އޮޅުވައިލުމެއް ކަމަށެވެ. އޭނާ ވިދާޅުވީ މާލޭގެ ދަފުތަރުގައި ރަޖިސްޓްރީވާން ހުޅުވާލުމުން، އިންތިހާބުގައި ވޯޓުލާ މީހުންގެ ލިސްޓަށް ބަދަލުތަކެއް އައިސް، ވޯޓުލުމުގެ ފުރުސަތު ގިނަ ބަޔަކަށް ގެއްލިދާނެ ކަމަށެވެ.
ސިނާމަލެ، މާލެހިޔާ ފްލެޓްތައް މާރާމާތުކުރުމަށް އެއްވެސް މަސައްކަތެއް ނުކުރާ ކަމަށް ހައުސިން މިނިސްޓަރު ވިދާޅުވެފައިވާތީ އެކަމަށް ރައްދު ދެއްވާ މެދުހެންވޭރު ދާއިރާގެ ކައުންސިލަރު އަހްމަދު ނިޔާޒު ވިދާޅުވީ މާލެހިޔާ، ސިނަމާލެ ފްލެޓްތައް ސިޓީ ކައުންސިލްއާ ހަވާލުކޮށްފައި އޮތީ ނަމެއްގައި ކަމަށާއި، އެއްވެސް ބާރެއް ނެތި ކަމަށެވެ.
ނިޔާޒު ވިދާޅުވީ ފައިސާ ގަވާއިދުން ލިބެމުންނުދާއިރު ވެސް ސިނަމާލޭގެ 1،2،3 ގެ ހުރިހާ މަރާމާތެއްކޮށް އެތިން އިމާރާތުގައި ކުލަލައި ނިންމާފައިވާ ކަމަށެވެ. އަދި މާލެހިޔާ މިހާރު ވެސް މަރާމާތު ކުރަމުންދާ ކަމަށް ނިޔާޒު ވިދާޅުވި އެވެ.
" ކުލަލައި، މާރާމާތުކުރުމުގެ އިތުރުން ސިނަމާލެ 1,2,3 ފްލެޓްގައި ބަހައްޓާފައި ހުރި ލިފްޓަކީ ހައުސިން މިނިސްޓްރީން ސިނަމާލެ 3 ގައި ހަރުކޮށްފައި ހުރި ލިފްޓެއް. އެލިފްޓް ހަލާކުވެގެން އެލިފްޓް ނުހެދިގެން ޝަކުވާ ކުރާތީ އަޅުގަނޑުމެން ސިޓީ ފޮނުވީ. ހައުސިން މިނިސްޓްރީން އެސިޓީގެ ޖަވާބު އައީ 25 ދުވަސްފަހުން. ހަވާލުކޮށްފީމޭ. ހަވާލުކުރީމަ 24 ގަޑިއިރު ތެރޭގައި އެލިފްޓް މަރާމާތު ކުރީ ސީޓީ ކައުންސިލުން " ނިޔާޒު ވިދާޅުވިއެވެ.
ނިޔާޒު ވިދާޅުވީ ސިނަމާލެ ފްލެޓް 1,2 ގައި ހަރުކޮށްފައި ހުރި ލިފްޓް މާރާމާތުކޮށްގެން ވެސް ބޭނުން ނުކުރެވޭނެ ކަމަށެވެ. އާ ލިފްޓެއް ހޯދުމަށް ހައުސިން މިނިސްޓްރީއަށް ދެފަހަރު ކޯޓޭޝަން ފޮނުވި ކަމަށާއި، ނަމަވެސް އެކަމަށް އިޖާބަދީފައި ނުވާ ކަމަށް އޭނަ ވިދާޅުވި އެވެ.
މީގެ އިތުރުން ނިޔާޒު ވިދާޅުވީ މިފްލެޓްތަކުން ކުނި ނެގުމުގެ މަސައްކަތް ގަވާއިދުން ކުރާ ކަމަށާއި، މާލެ ސިޓީ ކުނިވާ އުސޫލުން ފްލެޓްތައް އުރި ބިމުގައި ކުނި އުކާނުލެވި ފުނިޖެހިފައި ނުހުންނާނެ ކަމަށެވެ.
މާލެހިޔާ،ސިނަމާލޭގެ ފްލެޓް ނުބެލެހެއްޓޭ ކަމަށް މިނިސްޓަރު މުއިއްޒު ވިދާޅުވެފައިވާތީ އެކަމަށް ރައްދު ދެއްވާ ނިޔާޒު ވިދާޅުވީ ސެކިއުރިޓީ ބަލަހައްޓަނީ ފުލުހުން ކަމަށާއި، މާލެހިޔާ ސަރަހައްދު ބިމުން ފުލުހުންނަށް ބައެއްދީފައިވަނީ ވެސް އެސަރަހައްދު ރަނގަޅަށް މޮނިޓާރ ކުރެވޭނެ ގޮތް ހެދުމުގެ މަގުސަދުގައި ކަމަށެވެ.