ބޮލީވުޑް އެކްޓްރެސް ދީޕިކާ ޕަދުކޯން ދިރިއުޅޭ އިމާރާތުގައި އަލިފާން ރޯވެއްޖެއެވެ.
ބުދަ ދުވަހު މެންދުރު ފަހު ހިނގި މިހާދިސާގައި ދިޕިކާއަށް އެއްވެސް ގެއްލުމެއް ލިބިފައި ނުވާ ކަމަށް އޭނާ ވަނީ ބުނެފައެވެ.
މި ހާދިސާ ހިނގުމާ ގުޅިގެން ދީޕިކާގެ ފޭނުން ކަންބޮޑުވުން ފާޅުކުރަމުން ދަނިކޮށް އޭނާ ކޮށްފައިވާ ޓްވީޓެއްގައި ވަނީ އޭނާ ހުރީ ރައްކާތެރިކަމާއެކު ކަމަށް ބުނެފައެވެ. އަދި ކަންބޮޑުވުން ފާޅު ކުރުމުން އޭނާ ވަނީ ފޭނުންނަށް ޝުކުރު އަދާކޮށްފައެވެ. މީގެ އިތުރުން ދީޕިކާ ވަނީ ފުރާނަ އަތްމައްޗަށް ލައިގެން އަލިފާން ނިންވުމުގެ މަސައްކަތް ކުރަމުންދިޔަ އެންމެން ރައްކާތެރި ކުރުމަށް ދުއާ ކުރުމަށް އެދިފައެވެ.
މި ހާދިސަ ހިނގާފައި ވަނީ މުމްބާއީގައި ހުންނަ ޕްރަބަދޭވީ ބިއުމޮންޑޭ ޓަވަރުގެ 33 ވަނަ ބުރީގައެވެ.
ދީޕިކާ ދިރިއުޅެމުންދަނީ އެ އިމާރާތުގެ 26 ވަނަ ބުރީގައެވެ. މިހާދިސާގައި ދީޕިކާ ދިރިއުޅެމުންދާ އެޕާޓްމަންޓަށް އެއްވެސް ގެއްލުމެއް ލިބިފައެއް ނުވެއެވެ. ޚަބަރުތައް ބުނާ ގޮތުން އަލިފާނުގެ ހާދިސާ ހިނގި އިރު ދީޕިކާ ވަނީ އިސްތިހާރެއް ޝޫޓް ކުރުމަށް ބޭރަށް ގޮސްފައއެވެ.
މި އަލިފާނުގެ ހަދިސާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށް ޚަބަރުތައް ބުނެއެވެ.
މިއަހަރުގެ ޖެނުއަރީ މަހުގެ 25 ވަނ ދުވަހު ރިލީޒްކުރި ދީޕިކާގެ ފިލްމް "ޕަދްމާވަތު" ރިލީޒްކުރި ފަހުން އެއްވެސް ފިލްމެއްގެ މަސައްކަތް ކުރަމުންދާ ކަމަށް ދީޕިކާ އަދި ބުނެފައެއް ނުވެއެވެ. އެހެން ނަމަވެސް ހޮލީވުޑް ޕްރެންޗައިސް "ޓްރިޕްލް އެކްސް"ގެ މަސައްކަތް ފަށަން އެޅޭ ކަމަށް ބައެއް ރިޕޯޓްތައް ބުނެއެވެ. އޭގެ ފަހުން ނުކުން ފިލްމުގައި ދީޕިކާ ވަނީ މުހިންމު ރޯލެއް އަދާކޮށްފައެވެ.
