އަކްޝޭގެ ކާމިޔާބު ފިލްމުތަކުގެ ތެރެއިން އެންމެ ބޮޑު ކާމިޔާބީއެއް ހޯދި ހިންދީ ފިލްމު ޓޮއިލެޓް އޭކް ޕްރޭމް ކަތާ ޗައިނާގައި އަޅުވަން ނިންމައިފިއެވެ.

ޗައިނާގައި ޓޮއިލެޓް އަޅުވަން ނިންމާފައިވަނީ ހުކުރު ދުވަހުގައެވެ.

ޗައިނާގެ ފިލްމީ މާކެޓަކީ އިންޑިއާގެ ފިލްމުތަކަށް ކާމިޔާބު މާކެޓަކަށް ވާއިރު ޓޮއިލެޓް ޗައިނާގެ 4،300 ސްކްރީނެއްގައި އަޅުވާނެއެވެ. މިއީ މުޅި އިންޑިއާގައި ފިލްމު ރިލީޒްކުރި ސްކްރީންތަކަށްވުރެ ދެބައިކުޅަ އެއްބައި ބޮޑު އަދަދެކެވެ. މި ފިލްމު ވަނީ މިއަހަރުގެ އެޕްރީލްގައި ބޭއްވި ބެއިޖިން ފިލްމު ފެސްޓިވަލްގައިވެސް ދައްކާލާފައެވެ.

މި ފިލްމާ ބެހޭގޮތުން އަކްޝޭ ބުނީ ޗައިނާގެ 4،300 ސްކްރީނެއްގައި މިމަހުގެ 8 ގައި އަޅުވާނެކަމަށެވެ.

ޝްރީ ނަރަޔަން ސިންގު ޑައިރެކްޓް ކޮށް މިފިލްމް ކޯޕްރޮޑިއުސް ކޮށްފައިވަނީ އަކްޝޭ ކުމާރާއި ނީރާޖް ޕާންޑޭއެވެ. މި ފިލްމުގެ ލީޑުރޯލުން ފެނިގެންދަނީ އަކްޝޭ ކުމާރާއި ބޫމީ ޕެޑްނެކާއެވެ. މިއީ އަކްޝޭ ކުމާރާއި ބޫމީ ޕެޑްނެކާގެ ފުރަތަމަ ފިލްމެވެ. މިއީ އިންޑިއާގެ ފަގީރު ހިސާބުތަކުގައި ފާޚާނާތައް ހެދުމުގެ މުހިންމު ކަމުގެ މައްޗަށް އަލިއަޅުވާލާ ހަދާފައިވާ ފިލްމެކެވެ.