ރާއްޖޭގެ ސިޔާސީ މަސްރަހު ފިނިކުރުމަށް، ޕާޓީތަކުގެ މަޝްވަރާތަކުގައި މެދުވެރިއެެއްގެ ރޯލު އަދާކުރުމަށް ހުށައެޅުމުން އެ ހުށަހެޅުން ރައީސް ޔާމީން ބޮލާލައި ޖެހިކަމަށް އދ. އިން ބުނި ބުނުން ފިޝަރީޒް މިނިސްޓަރު ޑރ.މުހައްމަދު ޝައިނީ ދޮގުކުރައްވައިފިއެވެ.
ޝައިނީ ބުރާސްފަތި ދުވަހު ކުރައްވާފައިވާ ޓްވީޓެއްގައި ވިދާޅުވީ، ޕާޓީތަކުގެ މަޝްވަރާތަކުގައި އދ. އިން މެދުވެރިއެއްގެ ރޯލު އަދާކުރުމަށް އެދުނު އެދުން ރައީސް ޔާމީން ބޮލާލައި ޖަހާފައި ނުވާކަމަށެވެ. އަދި މަޝްވަރާތަކުގެ މެދުވެރިއަކަށް އދ ވުމަށް އެދުނީވެސް ރައީސް ޔާމީންކަމަށް ޝައިނީ ވިދާޅުވިއެވެ.
HEP Yameen hve not rjctd UN role in All Party Talks. Note tht UN participation is a request by the President himself. UN have always insisted for initial engagement btwn parties for UN to engage meaningfully, which gvmnt is trying to do but opposition keeps blocking.
— Mohamed Shainee (@mshainee) February 22, 2018
އދ. އަބަދުވެސް މަޝްވަރާތަކުގައި މާނަވީ ގޮތެއްގައި ބައިވެރިވުމަށް ދަނީ ހުށަހަޅަމުން ކަމަށާއި އެކަމާއި ދެކޮޅުހަދާ ހުއްޓުވާބަޔަކީ އިދިކޮޅު ފަރާތްތައްކަމަށް ޝައިނީ ވިދާޅުވިއެވެ.
ޝައިނީ މިހެން ވިދާޅުވެފައި ވީނަމަވެސް އދ. ގެ ހުށައެޅުން ރައީސް ޔާމީން ބަލައިނުގެންނެވިކަން ބޭރުގެ މީޑިއާތަކަށް ހާމަކުރެއްވީ ސިދާ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓްރޭޒްގެ ތަރުޖަމާނުގެ ނައިބު ފަރުހާން ހައްޤެވެ.
"ޔޫއެން ސެކްރެޓަރީ ޖެނެރަލް ހުށައެޅުއްވި ރާއްޖޭގެ ސިޔާސީ މަސްރަހާ ގުޅޭ މެދުވެރިއެއްގެ ރޯލް އދ. އިން އަދާކުރުމަށް. އެކަމަކު ރައީސް ޔާމީން ވިދާޅުވީ މި ސްޓޭޖްގައި މެދުވެރިއަކު އަދި ބޭނުން ނޫންކަމަށް" ހައްޤު ވިދާޅުވިއެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓްރޭޒްގެ ތަރުޖަމާނުގެ ނައިބު، ފަރުހާނު ހައްޤު އާއި ހަވާލާދީ، ހިންދުސްތާނު ޓައިމްގައި ބުނެފައިވަނީ، އިދިކޮޅު ފަރާތްތަކާއި ސަރުކާރާއި ދެމެދު މަޝްވަރާތައް ބާއްވައި، އެ މަޝްވަރާތަކުގެ މެދުވެރިއެއްގެ ރޯލް އަދާކުރުމަށް އދ. އިން ހުށައެޅުމުން، ރައީސް ޔާމީން އެ ހުށަހެޅުން ބައްލައިވައިނުގެންނެވި ކަމަށެވެ.
