ރާއްޖެޓީވީ ރޯކޮށްލި މައްސަލައިގެ ޝަރީޢަތުގެ އަޑުއެހުމެއް މިއަދު ކްރިމިނަލް ކޯޓުގައި ތާވަލް ކޮށްފިއެވެ. 

އެގޮތުން ރާއްޖެޓީވީ ރޯކޮށްލި މައްސަލައިގެ ޝަރީޢަތުގެ އަޑުއެހުމެއް ކްރިމިނަލް ކޯޓުގައި ތާވަލް ކޮށްފައި ވަނީ މިއަދު ހެނދުނު 11:00 އަށެވެ. 

މީގެ ހަތަރު އަހަރު ކުރިން، 2013 ވަނަ އަހަރުގެ އޮކްޓޯބަރު 7 ވަނަ ދުވަހުގެ ރޭ މެންދަމު ރާއްޖެޓީވީ ކުރިން ހިންގި އިމާރާތުގައި އަލިފާން ރޯކޮށްލާ ހުރިހާ އިކުއިޕްމެންޓްތައް އަންދާ އަޅިއަށް ހެދި މައްސަލައިގައި ދައުލަތުން ދައުވާ އުފުލާފައި ވަނީ ހ. ގަސްވާ، މުހައްމަދު މީއާދުގެ މައްޗަށެވެ. 

މި މައްސަލައިގެ އަޑުއެހުމެއް އެންމެ ފަހުން ބާއްވާފައި ވަނީ މިއަހަރުގެ އޮގަސްޓް މަހުގެ 14 ވަނަ ދުވަހުއެވެ. އެ ދުވަހު ބޭއްވި ޝަރީޢަތުގެ މަޖިލީހުގައި ކުރިއަށް ދިޔައީ ހެކިންގެ ހެކިބަސް ނެގުމެވެ. 

އެގޮތުން ހެކި ބަސް ދީފައިވަނީ، ރާއްޖެޓީވީ ހިންގަމުން އައި "ކުއީން އޮފް ދަ ނައިޓް" އިމާރާތުގައި ރޯކޮށްލުމުން އެ ސީން އަށް ދިޔަ ތިން ފުލުހެކެވެ. ތިން މީހުން ވެސް ބުނި ގޮތުގައި އިމާރާތުގައި ރޯވެ އަނދަމުން ދަނިކޮށް، އިމާރާތުގެ ކުރިމަތިން އަޅިކުލައިގެ އަންގިއެއް ފެނުނެވެ. އަދި އެ އަންގި ހެކީގެ ގޮތުގައި ސީލް ކުރެވުނު ކަމަށް ތިން މީހުން ވެސް ބުންޏެވެ.

ތިން ހެކިން ވެސް ބުނީ، ސީން އަށް ދިޔައިރު، އިމާރާތުގެ ސެކިއުރިޓީ ބަލަހައްޓަން ހުރި މީހާއަށް ތޫނު އެއްޗަކުން ހަމަލާދީފައިވާ ކަމަށެވެ. އަދި އިމާރާތުގެ މަތިން އަންހެނަކު ސަލާމަތް ކޮށްދިނުމަށް އެދި ރޮމުން ދިޔަ ކަމަށް ވެސް ބުންޏެވެ.

މިމައްސަލައިގައި ދައުލަތުން ވަނީ ދައުވާ ސާބިތުކުރުމަށް ހަތަރު ހެކިންނާއި ދެ ގަރީނާއެއް ހުށަހަޅާފައެވެ.

ދައުލަތުން ގަރީނާގެ ގޮތުގައި ހުށަހަޅާފައިވަނީ، ރާއްޖެޓީވީ ހިންގި އިމާރާތުގައި އަލިފާން ރޯކޮށްލި ވަގުތު މީއާދުގެ އަތާއި ފަޔާއި ކަނދުރާގައި އަލިފާން ހިފިކަން ސާބިތުކުރުމަށް އައިޖީއެމްއެޗް ހޮސްޕިޓަލުން އޭނާ ފަރުވާ ހޯދި ކަމުގެ މެޑިކަލް ރިޕޯޓާއި، ރާއްޖެޓީވީ ހިންގި ބީކޭޓީ އިމާރާތް ކައިރިން ފެނުނު އަންގިއަކުން މީއާދުގެ ޑީއެންއޭ ފެނިފައިވާތީ، އަންގީގެ ޑީއެންއޭ ރިޕޯޓެވެ.

އެ ދެ ރިޕޯޓުގެ އިތުރުން ކްރައިމް އޮފް ސީން ރިޕޯޓާއި އައިޖީއެމްއެޗް އިން ފަރުވާ ހޯދިކަމުގެ ލިޔެކިޔުންތަކާއި އަދި ރާއްޖެޓީވީ ރޯކޮށްލާ މަންޒަރު ފެންނަ ވީޑިއޯ އެނެލެސިސް ރިޕޯޓް ވެސް ހުށަހަޅާފައި ވެއެވެ.

ދައުލަތުން ބުނެފައިވާ ގޮތުގައި ފުރަތަމަ ސިއްރު ހެކި ހުށަހަޅާފައިވަނީ ރާއްޖެޓީވީ ރޯކޮށްލުމަށް ރޭވި މީހުންގެ ތެރޭގައި މީއާދު ހިމެނޭކަން ސާބިތު ކުރުމަށް ކަމަށާއި އަދި ދެ ވަނަ ސިއްރު ހެކި ހުށަހެޅީ ރޯކޮށްލަން ދިޔަ މީހުންގެ ތެރޭގައި މޫނު ނިވާކޮށްގެން މީއާދު ހުރިކަން ސާބިތުކުރުމަށް ކަމަށެވެ. އަދި ތިން ވަނަ ސިއްރު ހެކި ހުށަހަޅާފައިވަނީ ރޯކޮށްލުމަށް ފަހު ބީކޭޓީ އިމާރާތުން މީއާދު ނިކުމެގެން ދިޔަކަން ސާބިތުކުރުމަށާއި މީއާދާއި އިތުރު ބަޔަކު އިމާރާތަކުން ނިކުތް ފަހުން ޒަހަމްތަކަކާއެކު ސެކިއުރިޓީ ގާޑު ނިކުމެގެން ދިޔަކަން ސާބިތުކުރުމަށެވެ.

މީގެ އިތުރުން ހަތަރު ވަނަ ސިއްރު ހެކި ހުށަހަޅާފައިވަނީ ރޯކޮށްލުމަށް ފަހު އެކަމުގައި ބައިވެރިވި އެންމެން ތަނަކަށް އެއްވި އިރު މިއާދުގެ އަތާއި ފަޔާއި އަދި ކަނދުރާ ފިހިފައިވާކަން ސާބިތުކުރުމަށާއި އަދި ލިބުނު އަނިޔާތަކަށް ފަރުވާ ހޯދުމަށް ދިޔަކަން ސާބިތުކުރުމަށް ކަމަށް ދައުލަތުގެ ވަކީލު ވިދާޅުވި އެވެ.

ރާއްޖެޓީވީ ރޯކޮށްލި މައްސަލާގައި ހަމައެކަނި މީއާދުގެ މައްޗަށް ދައުވާ އުފުލި ނަމަވެސް، ޖުމްލަ ނުވަ މީހެއްގެ މައްޗަށް ދައުވާ ކުރުމަށް ފުލުހުން ޕީޖީއަށް ފޮނުވި އެވެ. އޭގެ ތެރޭގައި ހިމެނެނީ 35 އަހަރުގެ މީހަކާއި 24 އަހަރުގެ މީހަކާއި 22 އަހަރުގެ ދެ މީހުންނާއި 21 އަހަރުގެ މީހަކާއި 20 އަހަރުގެ މީހަކާއި 18 އަހަރުގެ ދެ މީހެއްގެ އިތުރުން 17 އަހަރުގެ ކުޑަކުއްޖެކެވެ.