ފެނަކަ ކޯޕަރޭޝަނުގެ އިސްވެރިން ރާއްޖެއާއި ރާއްޖެއިން ބޭރަށް ކުރި ދަތުރުތަކަށް އެކުންފުނިން 1.3 މިލިއަނަށް ވުރެ ގިނަ ރުފިޔާ ޚަރަދުކޮށްފައިވާއިރު، އެ ފައިސާ ޚަރަދުކުރި ގޮތުގެ ތަފުސީލު އެނގެން ނެތް ކަމަށް އެންޓި ކޮރަޕްޝަން ކޮމިޝަން(އޭސީސީ) އިން ބުނެފިއެވެ.

ފެނަކަ ކޯޕަރޭޝަނުގެ ބޭނުމަށް 2014 ވަނަ އަހަރުން ފެށިގެން 2016 ވަނަ އަހަރުގެ ސެޕްޓެމްބަރ މަހުގެ ނިޔަލަށް އެ ކުންފުނީގެ އިސް މުވައްޒަފުން ރާއްޖެއާއި ރާއްޖެއިން ބޭރަށް ކުރި ދަތުރުތަކަށް އެ ކުންފުނިން ކޮށްފައިވާ ޚަރަދުތަކާ ގުޅިގެން އޭސީސީއަށް ހުށަހެޅުނު މައްސަލަ ތަހުގީގު ކުރުމަށްފަހު، އެ ކޮމިޝަނުން ދިން ލަފާގައިވާ ގޮތުގައި ފައިސާގެ މުއާމަލާތްތައް ހިންގާފައިވަނީ ކޮރަޕްޝަނަށް މަގުފަހިވާ ގޮތަށެވެ.

ފައިސާގެ މުއާމަލާތްތައް ހިންގާފައިވަނީ ކޮރަޕްޝަނަށް މަގުފަހިވާ ގޮތަށް ކަމަށް އޭސީސީއިން ބުނި ނަމަވެސް، އެއްވެސް މުވައްޒަފަކާ މެދު ދައުވާކުރުމަށް ފޮނުވާފައިނުވެއެވެ. އޭގެ ބަދަލުގައި އޭސީސީއިން ވަނީ ބައެއް ކަންކަން ފާހަގަކޮށް، އެ ކަންކަން އިސްލާހު ކުރުމަށް ފެނަކަ ކޯޕަރޭޝަނަށް އަންގާފައެވެ.

އޭސީސީގެ ރިޕޯޓުގައިވާ ގޮތުގައި، ފެނަކައިގެ އިސްވެރިންގެ ރާއްޖެއިން ބޭރަށް ކޮށްފައިވާ ދަތުރުތަކަށް ޖުމްލަ 881,172 (އަށްސަތޭކަ އަށްޑިހަ އެއްހާސް އެއްސަތޭކަ ހަތްދިހަ ދޭއް) ރުފިޔާ ޕޭމެންޓް ވައުޗަރު ހަދައިގެން ޚަރަދުކޮށްފައިވެއެވެ. ނަމަވެސް، މިއިން އެއްވެސް ދަތުރެއްގެ ދަތުރު ރިޕޯޓް ހަދާފައި ނުވާކަމާއި، އަދި ދަތުރުގައި ހަވާލުކުރި ފައިސާގެ ޚަރަދު ރިޕޯޓެއްވެސް ހަދާފައި ނުވާކަން އެ ކޮމިޝަނުން ފާހަގަކޮށްފައިވެއެވެ.

ދަތުރު ރިޕޯޓާއި ފައިސާގެ ޚަރަދު ރިޕޯޓް ހަދާފައި ނުވި ނަމަވެސް، އާންމުގޮތެއްގައި ދަތުރުތައް ކޮށްފައިވަނީ ޓްރޭނިންގއަށާއި ސްޓަޑީ ޓުއަރސްއަށް ކަމާއި، ކުންފުންޏަށް ބޭނުންވާ ބައެއް ޚިދުމަތްތައް ހޯދުމުގެ ބޭނުމުގައިވެސް ބައެއް ދަތުރުތައްކޮށްފައިވާކަމާއި، އަދި ކުންފުންޏަށް މުވައްޒަފުން ރެކްރޫޓްކުރުމަށް ހަ މުވައްޒަފުންގެ ޓީމެއް އިންޑިޔާއަށް ދިއުމަށް ދަތުރެއް ކޮށްފައިވާކަން ދަތުރުތަކާ ގުޅޭ ލިޔުންތަކުން އެނގޭކަމަށް އޭސީސީގެ ރިޕޯޓުގައިވެއެވެ.

އޭސީސީގެ ރިޕޯޓުގައިވާ ގޮތުގައި، ކޮންމެ ދަތުރަކަށްވެސް ޕޭމެންޓް ވައުޗަރުން ނަގާ ފައިސާ ކުންފުނީގެ މުވައްޒަފަކާ ހަވާލުކޮށް ސޮއިކުރުވާފައިވެއެވެ. އެހެން ނަމަވެސް، ދަތުރުގައި ބައިވެރިވާ ފަރާތްތަކާއި އެ ފައިސާ ހަވާލުކޮށްފައިވާކަން ލިޔުންތަކުން ޔަގީން ކުރެވެން ނެތްކަމާއި، އަދި ދަތުރުތަކުގައި އިންސިޑެންޓަލް ޚަރަދަށް ނަގާފައިވާ ފައިސާ ޚަރަދުކުރިގޮތުގެ ތަފުސީލު އެއްވެސް ފަރާތަކުން ހުށަހަޅާފައިވާކަން ލިޔުންތަކުން އެނގެން ނެތް ކަމަށް ރިޕޯޓުގައިވެއެވެ.

މީގެ އިތުރުން، އެ ކުންފުނީގެ އިސް މުވައްޒަފުން ރާއްޖޭގެ ރަށްތަކަށް ކޮށްފައިވާ ދަތުރުތަކަށް ޖުމްލަ 456,030 (ހަތަރުސަތޭކަ ފަންސާސްހަހާސް ތިރީސް) ރުފިޔާ ޕޭމެންޓް ވައުޗަރު ހަދައިގެން ޚަރަދުކޮށްފައިވާ ކަމަށް ރިޕޯޓުގައިވެއެވެ. ނަމަވެސް އެއިން އެއްވެސް ދަތުރެއްގެ ދަތުރު ރިޕޯޓާއި ދަތުރުގައި ޙަވާލުކުރި ފައިސާގެ ޚަރަދު ރިޕޯޓުވެސް ހަދާފައި ނުވާކަމަށް ފާހަގަކޮށްފައިވެއެވެ.

ރިޕޯޓުގައިވާ ގޮތުގައި، ދަތުރުތަކުގައި ޚަރަދުކުރުމަށް ޕެޓީ ކޭޝްގެ ގޮތުގައި ފައިސާ ނަގާފައިވީނަމަވެސް އެ ފައިސާއިން ކޮށްފައިވާ ޚަރަދުތަކުގެ ތަފުސީލެއް ލިޔެކިޔުމުން އެނގެން ނެތެވެ. އަދި އެއްވެސް ފައިސާއެއް ބާކީ ހުރިކަމެއް ނުވަތަ ނެތްކަމެއް އެނގެން ނެތްކަމާއި، ބައެއް ދަތުރުތަކާ ގުޅިގެން އިތުރަށް ނެގިފައިވާ އެލަވަންސް ފައިސާ އަނބުރާ އޮފީހާ ހަވާލުކޮށްފައިވީނަމަވެސް އެ ފައިސާއާމެދު އަމަލުކުރި ގޮތެއް ލިޔުންތަކުން އެނގެން ނެތްކަން އޭސީސީއިން ފާހަގަކޮށްފައިވެއެވެ.