އަންނަ އަހަރު ސަރުކާރުން ހިންގާނެ މާލީ ކަންކަމުގެ ޤާނޫނީ ހައިސިއްޔަތު ގެއްލިއްޖެ ކަމަށް އަދާލަތު ޕާޓީން ބުނެފިއެވެ.
ބުދަ ދުވަހު ރައްޔިތުންގެ މަޖިލީހުން ފާސްކުރި އަންނަ އަހަރަށް ލަފާ ކުރާ ދައުލަތުގެ ބަޖެޓަށް އިޝާރާތްކޮށް އަދާލަތު ޕާޓީން ކުރި ޓްވީޓެއްގައި ބުނެފައި ވަނީ އަންނަ އަހަރުގެ ބަޖެޓަކީ ނަހަލާލު ބަޖެޓެއް ކަމަށެވެ. އެ ޓްވީޓުގައި އިތުރަށް ބުނެފައި ވަނީ މިއަދަކީ ދިވެހި ރާއްޖޭގެ އިޤްތިސޯދީ ތާރީޚުގައި ފުރަތަމަ ފަހަރަށް ޤާނޫނާ ޚިލާފަށް ބަޖެޓް ފާސްކުރި ދުވަސް ކަމަށެވެ. އަދި 2018 ވަނަ އަހަރުގެ ދައުލަތުގެ މާލީ ކަންކަމަށް ޤާނޫނީ ހައިސިއްޔަތު މިހާރުއްސުރެ ގެއްލުނީ ކަމަށާއި މިއީ ރައީސް ޔާމީންގެ ވެރިކަމުގައި ޤައުމު ބޮއްސުން ލާފައި އޮތް މިންވަރު ކަމަށް ވެސް އަދާލަތުން ވަނީ ބުނެފައެވެ.
Nahalaalu Budget eh!
— Adhaalath Party (@AdhaalathOffice) November 22, 2017
Miandhakee dhivehi raajjeyge iqthisaadhee thaareekhugai furathama faharah qaanoonaakhilaafah budget faaskuri dhuvas. 2018 ge dhaulathuge maaleekankamah qaanoonee haisiyyathu mihaarussure gellunee. Miee RY ge verikamugai gaumu bossunlaafai oyi minvaru.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ބަޖެޓް ފާސްކޮށްފައި ވަނީ 39 މެމްބަރުންގެ އިއްތިފާގުންނެވެ. ބަޖެޓް ޖަލްސާތަކުގައި ގުޅިފައިވާ އިދިކޮޅު ޕާޓީތަކަށް ނިސްބަތްވާ މެމްބަރުން ބައިވެރިއެއް ނުވެއެވެ. އަދި ވޯޓުގައި ވެސް ބައިވެރި ވެފައެއް ނުވެއެވެ.
ބަޖެޓް ފާސްކޮށްފައި މިވަނީ އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓް ފާސްކުރަންޖެހޭނީ ގާނޫނު އަސާސީގެ 87 ވަނަ މާއްދާގެ (ށ) ގެ ދަށުން ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް މައްސަލައެއް ހުށަހަޅާފައި ވަނިކޮށެވެ.
ގާނޫނު އަސާސީގެ 87 ވަނަ މާއްދާގެ (ށ) ގައިވާ ގޮތުގައި، ރައްޔިތުން އެމައްޗަށް އަމަލުކުރުން ލާޒިމްކުރާ އެއްވެސް ކަމެއް ރައްޔިތުންގެ މަޖިލީހުން ފާސްކުރުމަށްޓަކައި ވޯޓަށް އަހަންވާނީ އެ މަޖިލީހުގެ ޖުމްލަ މެންބަރުންގެ ދެބައިކުޅަ އެއްބަޔަށް ވުރެ ގިނަ މެންބަރުން ޖަލްސާގައި ހާޒިރުވެ ތިބޭ ވަގުތެއްގައެވެ. ނަމަވެސް ބުދަ ދުވަހު ބަޖެޓަށް ވޯޓަށް އެއްސެވިއިރު މަޖިލީހުގައި ވަޑައިގެން ތިއްބެވީ 39 މެންބަރުންނެވެ. މަޖިލީހުގައި 85 މެންބަރުން ތިއްބަވާއިރު ދެބައިކުޅަ އެއްބަޔަކީ 42 މެންބަރުންނެވެ.
