މޯލްޑިވްސް އިސްލާމިކް ބޭންކްގައި އޮންނަ ރައީސް އަބުދުﷲ ޔާމީންގެ އެކައުންޓަށް ޖަމާކުރި އެއްމިލިއަން ޑޮލަރަކީ، ރައީސް ޔާމީނަށް އެނގިވަޑައިނުގެން ނުވަތަ ބަޔަކު ގަދަކަމުން ވެއްދި ފައިސާ ކަމަށް ދެއްކުމަށް ބަޔަކު މަސައްކަތްކުރި ކަމަށް އެމްޑިޕީގެ ކުރީގެ ޗެއާޕާސަން އަލީ ވަހީދު ވިދާޅުވެއްޖެއެެވެ.
އެ ފައިސާ ރައީސް ޔަމީންގެ އެކައުންޓަށް ޖަމާވިކަން އެންޓިކޮރަޕްޝަން ކޮމިޝަނުގެ ތަހުގީގުން ސާބިތުވެފައިވާކަން ހާމަކުރުމުން، "އަސްތާ ރައީސް ޔާމީންގެ އެކައުންޓަށް އެއްމިލިއަން ޑޮލަރު" މި ނަމުގައި ރާއްޖެޓީވީން ގެނެސްދިން ޕްރޮގްރާމްގައި އަލީ ވަހީދު ވިދާޅުވީ، އެ ފައިސާ ރައީސްގެ އެކައުންޓަށް ޖަމާވެފައިވަނީ ސީދާ އެމްއައިބީގެ މެނޭޖްމެންޓަށް އެނގިގެން ކަަމަށެވެ.
އަލީ ވަހީދު ވިދާޅުވި ގޮތުގައި އެވަރުގެ ބޮޑު އަދަދެއް ޖަމާކުރާއިރު އެމްއައިބީގެ އިސް ބޭފުޅުންނަށް ނޭނގިއެއް ނޯންނާނެއެވެ. އެކަމުގައި ކުރީގެ ނައިބު ރައީސް، އަދި އޭރު ޓޫރިޒަމް މިނިސްޓަރަކަށް ހުންނެވި އަހުމަދު އަދީބުގެ ފޯނުން ލިބުނު މައުލޫމާތު ތަކަކީވެސް ސައްޚަ މައުލޫމާތު ތަކެއްކަން އިނގިރޭސި ވިލާތުގައި ކުރެވުނު ތަހުގީގުތަކުން ސާބިތުވެފައިވާކަމަށެވެ. އަދި ސަރުކާރު ބަދަލުވި ދުވަހަކުން އެ މައުލޫމާތުތައްވެސް ހާމަވެގެން އަންނާނެކަމަށެވެ.
އެންމެން ވެސް ސުވާލު އުފައްދަންވީ އެއީ ކޮން ގޮތަކުން ރައީސް ޔާމީންއަށް ލިބިވަޑައިގެންނެވި ލާރިއެއްތޯ ކަމަށް އަލީ ވަހީދު ވިދާޅުވިއެވެ.
އިންސާފުގެ ޒައްރެއްގެ މިންވަރު އޮތް ނަމަވެސް މިކަންކަމާމެދު ފިޔަވަޅު އެޅޭނެ ދުވަހެއް އަންނާނެއެވެ. އަދި 2018 އަށް ވެސް މީގެ އިތުރު ވާހަކަތައް އައިސް ރައްޔިތުންނަށް އިންސާފު ލިބޭނެ ކަމަށް އޭނާ ވިދާޅުވިއެވެ.
"މިކަހަލަ ތެދު ވާހަކަ ދެއްކީތީ ޕާސްޕޯޓް ބާތިލްކޮށް މި ތިބީ ގައުމަށް ނޭރޭ ގޮތް ހަދާފައި. އެދުވަހު ދެއްކި ވާހަކަ އޭސީސީން ކަށަވަރުކޮށްދިނީތީ އުފާކުރަން" އޭނާ ވިދާޅުވިއެވެ.
އަލީ ވަހީދުގެ ޕާސްޕޯޓް ހިފަހައްޓާ ޓެރެރިޒަމްގެ ދައުވާ އުފުލާ ޣައިރު ހާޒިރުގައި ޝަރީއަތް ހިންގީ އެ ލާރިގެ ވާހަކަ ދިވެހި ރައްޔިތުނަށް ފަޅާއަރުވާލުމުންކަމަށް އޭނާ ވިދާޅުވިއެވެ.
ހާމިދު ސޭޓް ހައްޔަރުކުރުމުގެ ކުރީން ހާމިދު ސޭޓާއިއެކު ކުރެވުނު މުއާމަލާތްތަކާއި، އަދި އަދީބާއި ރައީސް ޔާމީނާއި ދެބޭފުޅުންގެ މެދުގައި ހިނގާދިޔަ މުއާމަލާތްތަކުން އެ އެއް މިލިއަން ޑޮލަރު ހޯދުމަށް ރައީސް ޔާމީން ޕްރެޝަރކުރައްވާކަން އެނގި ހާމަވާކަމަށެވެ. އަދި އެ މުއާމަލާތްތައް އައިގޮތްވެސް އެނގިވަޑައިގަންނަވާކަމަށް އަލީ ވަހީދު ވިދާޅުވިއެވެ.އަދި މި ކަމުގެ ތަފްސީލްތަކާއި ހަގީގަތް ހާމަވެގެން ދާނީ މިނިވަން އިންސާފުވެރި ތަހުގީގެއްގެ ތެރެއިންކަމަށް ވިދާޅުވިއެވެ. އިންތިޒާރުކުރަމުންދަނީ އެދުވަހަކަށް ކަމަށް އޭނާ ވިދާޅުވިއެވެ.
ރައީސް ޔާމީނާމެދު ކުރެވުނު ތުހުމަތަކީ، އަމިއްލައަށް ބަޔަކު އުފައްދައިގެން ދެއްކި ވާހަކަތަކެއް ނޫންކަން މިއަދު އޭސީސީގެ ތަހުގީގުން ދިވެހި ރައްޔިތުންނަށް ސާބިތުވެފައިވާއިރު، ދުވަހެއްގެ ކޮޅުން ވެރިކަން ބަދަލުވިޔަސް ހެއްކެއް އުފައްދަން ނުޖެހޭ މިންވަރަށް އެކަން އޮތީ ފަޅާއަރާފައިކަމަށް އޭނާ ވިދާޅުވިއެވެ.
"ރައީސް ޔާމީނުގެ ވެރިކަމުގައި، ރައީސް ޔާމީނުގެ ނުފޫޒުގެ ދަށުގައި އެ މުއައްސަސާތައް އޮތް އިރުވެސް އެ މުއައްސަސާތަކުން އެ ވިދާޅުވީ، އެފައިސާ ވަނޭ. ރައީސަށް ސާފުވެއެްޖެ. އެފައިސާ ވަނީ ކިހިނެއްކަމާއި، އަދި އެފައިސާ ޖަމާކުރި މީހުންވެސް ދުނިޔޭގައި އަދި އެބަތިބި. އަދި އެކަމުގައި ބޭންކުގެ އެތެރެއިން ބައިވެރިވި މީހުންވެސް ދުނިޔޭގައި އެބަތިއްބެވި. އޭރު އެމްއެމްއޭގެ ފާރާތުންވެސް އަޅުގަނޑުމެންނާއި ދެކޮޅަށް ބަޔާންނެރުނު" އޭނާ ވިދާޅުވިއެވެ.
އަލީ ވަހީދު ވިދާޅުވީ، އެމްއެމްއޭގެ ގަވަރުނަރަކަށް އޭރު ހުންނެވި ބޭފުޅާ މިހާރު ރާއްޖެ ދޫކުރައްވާ ވަޑައިގެންނެވިއިރު، ބޭންކުގެ ތެރެއިން އެފަދަ ބޮޑެތި މުއާމަލާތްތައް އަދި މަރުކަޒީ ބޭންކަށްވެސް އެކަންކަން ހިނގާދިޔަގޮތް އެނގޭއިރުއެކަން ބައްލަވާފައި ނުވާކަމަށެވެ. އަދި ބޭންކްއޮފް މޯލްޑިވްސް ބޭފުޅުންނަށްވެސް ވެސް އެކަން އެނގި، އެބޭފުޅުން އެކަމުގައި ކުރަމުންދިޔަ މަސައްކަތްތައް ހުއްޓުވުމަށް އެމްޑީޕީގެ އިސް ފާރާތްތަކާ ގުޅައިގެން މަސައްކަތްކުރިކަމަށެވެ.
އަލީ ވަހީދު ވިދާޅުވީ، އެންމެ ހަތަރު ލައްކައެއްހާ ރުފިޔާ ފުޓްބޯޅަ ކްލަބަކުން ބޭންކަށް ޖަމާކުރުމުން އެއީ، އެ ކްލަބުން ފޮނުވި އެއްޗެއްތޯ ގުޅައި ޔަގީން ކުރާއިރު، މިލިއަން ޑޮލަރުން ބޮޑު އަދަދެއް ޖަމާވާއިރު ނުބަލައި ނުހުންނާނެކަމަށެވެ.އެއް އެކައުންޓަކަށް އެވަރުގެ ބޮޑު އަދަދެއް ވަންނައިރު ސުވާލެއް ވެސް ކޮށްނުލައި އެކަން ފޮރުވާފައި އޮތުމަކީ ދިވެހި ދައުލަތުން ހިންގި ބޮޑު ޖަރީމާއެއްކަމަށް އަލީ ވަހީދު ސިފަކުރެއްވިއެެވެ.
އޭނާ ވިދާޅުވި ގޮތުގައި އެދުވަހު ދެއްކި ވާހަކަ މިއަދު ތެދަކަށް ވުމުން އުފާކުރައްވައެވެ. އަދި ދެން އުންމީދު ކުރަނީ އެކަންކަން ފުރިހަމައަށް ބެލި ތަހުގީގުކުރެވި، އެވާހަކަތައް އެދުވަހު ހާމަކުރުމުން ރާއްޖެޓީވީއަށް ލިބުނު ގެއްލުމުގެ ބަދަލުވެސް ލިބޭނެ ދުވަހަކަށް ކަމަށް އޭނާ ވިދާޅުވިއެވެ. މިއަދު ރާއްޖެޓީވީއަށް ލިބެމުންދާ އަނިޔާގެ ފެށުމަކީވެސް އެއީކަމަށާއި، އެހެންނަމަވެސް ފަސްޖެހުމެއް ނެތި، އޭރުވެސް އޮތް ސްޓޭންޑްގެ މަތީ ރާއްޖެޓީވީ ވަކިފަރާތަކަށް ބުރަނުވެ ސާބިތުވެ މިއަދުވެސް އޮތީތީ އުފާކުރައްވާކަމަށް އަލީ ވަހީދު ވިދާޅުވިއެވެ.
ތަޖުރިބާކާރު ނޫސްވެރިންގެ ގޮތުގައި ކުރިން ހަރަކާތްތެރިވި، އެ ކޮމިޝަންގެ މިހާރުގެ ރައީސް ޝަހީބު ކާރުކޮޅަކާއި މަދު ލާރިކޮޅަކަށްޓަކައި މިނިވަން ނޫސްވެރިކަން ނައްތާލުމަށް ކުރައްވަމުންގެންދަވާ މަސައްކަތަށް އޭނާ ވަރަށް ބޮޑަށް ފާޑުވިދާޅުވިއެވެ. އަދި ނޫސްވެރިކަމުގެ ތަޖުރިބާއާއިއެކު އެ ދަރަޖައަށް ޝަހީބު ވެއްޓުނީތީ ހިތާމަކުރައްވާކަމަށް އަލީ ވަހީދު ވިދާޅުވިއެވެ.
އަލީ ވަހީދު ވިދާޅުވީ، މިފަދަ އެތަށް ބައިވަރު ޖަރީމާތަކުގެ ކަންކަން އަދި ކުރިއަށް އޮތްތަނުގައި ފަޅާއަރާނެއެެވެ. އޭނާ ވިދާޅުވީ ރިޔާސީ އިންތިޚާބާއި ދޭތެރޭ މި އޮތް މަދު ދުވަސްކޮޅުގެ ތެރޭގައި އެކަންކަންފަޅާއަރާނެއެވެ.