މިއަދު މެންދުރުފަހު ޔެލޯ އެލަރޓް ނެރުމަށްފަހު މެދުރާއްޖެތެރެއާއި ދެކުނުގެ އަތޮޅުތަކަށް އަނެއްކާވެސް ވައިޓް އެލަރޓް ނެރެފިއެވެ.

މޫސުމާބެހޭ ޤައުމީ އިދާރާއިން މިއަދު އެލަރޓަކަށްފަހު އެލާޓެއް މެދު ރާއްޖެތެރެއާއި ދެކުނުގެ އަތޮޅުތަކަށް ނެރެމުންދާއިރު، މިއަދު ހަވީރު ނެރުނު ވައިޓް އެލަރޓްގެ ވަގުތު ހަމަވާނީ މިރޭ 10:30ގައެވެ.

މެޓް އޮފީހުން ބުނީ ދެކުނުގެ އަތޮޅުތަކާއި މެދުރާއްޖެތެރެއަށް ގުގުރުމާއިއެކު ބޯކޮށް ވާރޭވެހި ވިއްސާރަކުރާނެކަމަށް ލަފާކުރެވޭކަމަށެވެ އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެކަމަށް ލަފާކުރެވޭކަމަށް މެޓް އޮފީހުން ބުނެއެވެ. މެޓް އޮފީހުން މިއަދު މެންދުރުފަހު ހަމައެސަރަހައްދުތަކަށް ޔެލޯ އެލާޓްވެސް ނެރުނެވެ.

ދެކުނާއި މެދުރާއްޖެތެރެއަށް އެލާޓް ނެރުނަސް، އެހެން ހިސާބުތަކަށްވެސް ގުގުރުމާއެކު ވިއްސާރަކުރާނެކަމަށް މެޓް އޮފީހުން ބުނެއެވެ.

ވިއްސާރަވުމުގެ ސަބަބުން ދެކުނުގެ އަތޮޅުތަކުގައި ރޭ ފަތިހުއްސުރެ ވަނީ އެލަރޓް ނެރެފައެވެ. މެޓް އޮފީހުން ވަނީ މެދުރާއްޖެތެރެއާއި ދެކުނުގެ އަތޮޅުތަކުގައި މޫސުމަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.